Yusupu mampololita lempona pangipina datunda to Masiri
41
1 Liumi rompare, mangipimi Pirao, datunda to Masiri. I lalu pangipina iti, naita ia meangka i wiwi owai Nil. 2 Unga pea moita pitu baana japi au marudu hai mahile mesuwuhe mai hangko i owai Nil hai mangkukuhe i wiwi owai iti. 
5 Bara mahae tekaleli mbulimi Pirao hai mangipi. I lalu pangipina iti, naita hangkau pare mowua pitu wulina au buke poihina. 6 Hangko indo, moita wori pitu wulina pare au wara hai bangi anti pewuina himburu hangko i pada wungi. 7 Pare au wara iti moame pare au moihi. Roo indo, pehadimi Pirao hai naisa kamangipina.
8 Mearo madondo, bara maroa pehadina, ido hai napopekakiomohe ope-ope topangisa hai tomapande i tampo Masiri, hai napetumbuiahe pangipina iti. Agaiana bara ara au moisa lempona.
9 Nauli topokadipura paenu i Pirao, “Alo ide mangakumona salangku i datu lawi 10 hangkoia datu rumpu i toporoti hai iriko, ido hai rapopesuangkai i lalu tarunggu i souna tadulako topokampai souna datu. 11 I lalu hambengia mangipingkai, hai pangipingki iti bara himbela lempona. 12 Ara hadua anantomoane to Ibarani au ratarunggu sambelangkai. Ia hawina tadulako topokampai souna datu. Kipetumbui pangipingki iria, hai nauliangaamongkai lempona. 13 Manoto mpuu au napololita iti mewali haha, lawi datu mampopesulemona i bagongku hangkoia, agaiana toporoti iti ratoe duuna mate.”
14 Kanahadina Pirao lolitana topokadipura paenu iti, liliu motudu tauna lao moala Yusupu, hai rapopesuwu hoholiga hangko i tarunggu. Roo Yusupu mokou weluana hai mempahuru, laomi i Pirao. 15 Nauli Pirao iria, “Iko mangipina, agaiana bara ara hadua tauna au peisa mopakanoto lempona. Ara au mopahawe iriko kanuisana molempo pangipi.”
16 Mehana Yusupu, “Bara wongkoia iko, datu, agaiana Pue Ala peari au mopatongawa lempona.”
17 Roo indo, nauli Pirao, “I lalu pangipingku, meangkana i wiwi owai Nil. 18 Unga pea mesupa hangko i owai iti pitu baana japi au marudu hai mahile mangkukuhe i wiwi owai. 19 Roo indo, mesupa wori mai pitu baana japi ntanina au maduhu ntepuu; watanda maduhu, buu pearai nabungkuhi koli. Bara mani ara kuita japi au nodo kamaduhunda i tampo Masiri. 20 Japi au maduhu iti moamehe pitu baana japi au marudu inona, 21 agaiana japi au maduhu iti, mia-mia pea kamaduhunda. Hangko indo, pehadimona.
22 Bara mahae tekalelina hai mangipi mbulina; inditi kuita hangkau pare mowua pitu wulina au buke poihina. 23 Hai tuwo wori pitu wulina pare au wara hai bangi lawi paka nawui-wui himburu au hangko i pada wungi. 24 Pare au wara iti moamehe pare au buke poihina. Pangipingku au rompaka ide roomi kupetumbuia topangisa, agaiana bara huba hadua au peisa mopakanoto lempona.”
25 Roo indo, nauli Yusupu i Pirao, “Rompaka pangipi iti, himbela pea lempona. Pue Ala mopatongawami i datu apa au ina mewali. 26 Pitu baana japi au marudu hai pitu wulina pare au buke poihina, lempona pitu parena katuwonda tauna maroa; rompaka iti himbela pea lempona. 27 Pitu baana japi maduhu hai pitu wulina pare au wara, lempona pitu parena kamahaena tauna ina narumpahe rimi.
28 Idemi au kupahawe irio, datu, lawi napatongawami Pue Ala i datu apa au ina mewali. 29 I lalu pitu parena, tauna ina handaka polambinda hai maroa katuwonta i humalele tampo Masiri. 30-31 Agaiana roo iti, ina hawe karimi pitu wori parena, hai kamatananta iti ina naliu inaonta, lawi tempo kapari ina morumpa tampo ide duuna maduhu. 32 Rombela datu mangipi. Lempona, Pue Ala ina mopatongawa apa au ina Napopewali moula peundeaNa, hai batena holiga pewalina.
33 Mewali, ane maroa datu, nupileimi hadua tauna au mapande hai manoto laluna nuwei kuasa mokadipura tampo ide. 34-35 Datu hangangaa moangkahe topobago au ntanina hai nuweihe kuasa moruru hangkira lima hangko i polambianda mowia i lalu pitu parena i tempo mabuhu bona ragulu i boea-boeana hai rakampai. 36 Pare iti hangangaa rapatimama bona ara paandenda tauna i lalu pitu parena tempo rimi au ina mewali i tampo Masiri ide. Mewali ane nubabehi nodo, taunamu inde barahe ina mateoho.”
Yusupu ralanti mewali gubernur i tampo Masiri
37 Pirao hai ope-ope topobagona mampokana pelambiana Yusupu. 38 Nauli Pirao irihira, “Manoto barapi ara tauna ntanina talambi au himbela hai Yusupu, lawi ia nanini inaona Pue Ala.”
39 Hangko inditi, nauli Pirao i Yusupu, “Pue Ala au mampopaisa ope-ope ide irio. Mewali, tongawa oiomi au matopa hai mataru pekirimu i paka-pakana panehe tauna ntanina. 40 Oiomi au ina kuwei kuasa i sou kadatuangku, hai ope-ope taunangku hangangaa mampeulai hawamu. Iko pearai au mewali toiwongkomu.”
41-42 Roo iti, Pirao mowosui sisikale kadatua hai nasisikaleia Yusupu, pane nauli, “Ide-ide kulantiko mewali gubernur i tampo Masiri.” Hangko indo, rawaruiami badu mandoe au maalusu banana hai raenoi eno bulawa. 43 Roo indo, raweimi kareta kadatua au kadua napengkahei, hai tauna molumao ioru kareta iti monganga-nganga mepopaisa, nauli, “Gubernur ina melempo hai hangangaa nibila!” Nodomi karalantina Yusupu moparenta i tampo Masiri.
44 Nauli Pirao iria, “Ikomi datu, hai ina kupahawe i ope-ope tauna, ane barahe mesabi irio, bara mpuuhe peisa mobabehi apa-apa i tampo Masiri.” 45-46 Roo indo, Pirao mohanga wori Yusupu: Sapnat-Panea. Rawei wori sambokona au rahanga Asnat, anana Potipera au mewali tadulako sou penombaa i wanua On.
I pepongkana pobagona i tampo Masiri, tinuwuna Yusupu, talu pulona parena. Roo indo, melingkami Yusupu hangko i sou kadatua lao motoleliki ope-ope boea i tampo Masiri. 47 I lalu pitu parena, tauna maroa tuwonda. Hinangka powianda mewali ntepuu, pelumbunami wua mpare. 48 Nahawakami Yusupu bona pelabiana polambinda ope-ope tauna hangko i bondenda, i lalu pitu parena iti, rarampu hai raanti rawoli i boea. 49 Anti kangkaiana gaga pare au ragulu iti, mengkaroomi Yusupu mohoka, lawi kangkaiana pare iti nodo wungi i wiwi ntahi.
53 Hopomi pitu parena kamaroana katuwonda tauna i tampo Masiri, 54 hawemi tempo rimi. I lalu pitu parena, tauna i humalele dunia narumpa rimi hintoto hai apa au nauli Yusupu. Batena pea i tampo Masiri au ara paande. 55 Mepongkami tempo rimi morumpa to Masiri, laomohe merapi paandenda i Pirao. Agaiana natuduhe Pirao, nauli, “Laorikau i Yusupu, hai nipeulai hinangkana apa au nahawaka irikamu.”