Yusupu mopakanoto lempona pangipinda toratarunggu
40
1 Bara mahae hangko inditi, rodua hawina datunda to Masiri, iami topokadipura paenuna hai toporotina, mobabehihe sala i datu. 2 Mewali rumpumi datu i tauna au rodua iti, 3 ido hai rapopesuahe i tarunggu i souna tadulako topokampai souna datu i karatarungguana Yusupu. 4 Mahae worihe tauna iti ratarunggu, hai tadulako topokampai souna datu motudu Yusupu mokadipurahe.5 Hambela tempo i tanga kaindi, topokadipura paenuna datu hai toporotina mangipihe. Pangipinda iti bara himbela lempona. 6 I kahawena Yusupu madondo, naita masusa lalunda. 7 Ido hai napekunehe, “Moapari pane masusa lalumi alo ide?”
8 Mehanahe, rauli, “Inona kaindi mangipingkai, agaiana bara ara au moisa lempona.”
Nauli Yusupu, “Batena pea Pue Ala au makuasa mopakanoto lempona pangipi. Nipetuntu mai iti pangipimi.”
9 Nauli topokadipura paenu iti, “I lalu pangipingku kuita ara hampoa anggoro i lindoku. 10 Patoana mopenga talu. Penga-pengana mepongka motawe hai mowombo alana mowua hawe mangka. 11 I pangipingku iti mokingkina paenuana datu. Mewali wua anggoro iti kupupu hai kupie i paenuana datu pane kuhuhua.”
12 Nauli Yusupu, “Idemi lempona talu pengana iti lempona talu alona. 13 Talu pearai alona, ina napopesuwumoko datu, naampungiko hai napopobago huleko i bagomu hangkoia. Oio ina mokadipura mbuliko paenuna datu. 14 Agaiana ane maroami katuwomu, ineena naliu inaomu. Kuperapi nupahawe i datu noumba kana i katuwongku bona napopesuwu wongkoia hangko i tarunggu ide. 15 Ide iko hangkoia rapelangkahana mai tauna hangko i tampoki to Ibarani, hai hungkaku inde i tampo Masiri, bara manina hambela mobabehi dake au hintotona ratarunggua node.”
16 Napehadingi toporoti lempona pangipina topokadipura paenuna datu iti maroa, mololita wori i Yusupu, nauli, “Mangipi worina node; mohoana roti talu bingkana. 17 Bingka au i wongko moihi mampopengaa roti kuantia datu, agaiana hawehe tadasi mai motilo-tilo roti iti.”
18 Mehana Yusupu, “Idemi lempona pangipimu: talu bingkana lempona talu pearai alona. 19 I lalu talu alona, datu ina motudu tauna mopapateko; watamu ina ratoe i kau hai ontomu ratilo-tilo tadasi.”
20 Talu alona hangko inditi, datu mopaara susa mahile mamposusai alo pesupaana, hai mokakiohe ope-ope topobagona. Nahawami bona topokadipura paenuna hai toporotina rapopesuwuhe hangko i tarunggu raantihe i lindonda ope-ope topobagona. 21 Topokadipura paenuna datu rapopobago mbulimi i bagona hangkoia. 22 Agaiana toporotina ratoe duuna mate nodo au nauli Yusupu. 23 Anti kamaroanami tuwona topokadipura paenuna datu iti, ido hai barapi mokakatuinao Yusupu.