Yusupu hai towawinena Potipa
39
1 Yusupu raantimi to Sumaila lao i tampo Masiri, pane rapobalu i Potipa, hadua to Masiri au motadulakoi topokampai sou kadatuana Pirao. 2 Kamaidana i Potipa to Masiri iti, Yusupu nanini Pue, ido hai maroa pewalina ope-ope bagona. 3 Naitami Potipa, kaPuenami au mowati Yusupu, ido hai hinangka au napobago mewali maroa. 4 Mewali matana laluna Potipa i Yusupu, pane naangka hai nawei kuasa motadulakoi ope-ope tauna au mobago i souna, hai mokadipura hinangka au ara iria. 5 Mepongka i karaweina kuasa i Yusupu mokadipura sou hai hinangka anu-anuna, Pue mowati katuwona to Masiri iti hai hinangka au ara iria, maroa au i souna ba i bondena. 6 Ope-ope anu-anuna Potipa naweimi Yusupu mokadipura. Ido hai pane Potipa barapi mourusi hinangka bago i lalu sou, batena pearai mourusi watana haduduana.Yusupu hadua anantomoane au maroho hai malenggea. 7 Idomi hai napokaelu towawinena Potipa, hai hambela tempo nawawaha bona maturu sambelahe. 8 Agaiana Yusupu bara mau, nauliri, “Ineeko nodo! Ide iko napoinalaimona Potipa mokadipura hinangka anu-anuna. Ia barapi paraluu mampekiri ope-ope au ara i lalu sou ide. 9 Kuasangku himbelami hai kuasana. Bara mpuu ara au barana napoinalaia i raoa oio lawi sambokonako. Peisana pae mobabehi dake hai mobabehi dosa i Pue Ala?” 10 Nauri alo-alona towawinena Potipa mokelo-kelo Yusupu, agaiana Yusupu bara mau mampoluhi towawine iti.
11 Hambela tempo, Yusupu mesua i lalu sou lao mobago, hai bara ara tauna ntanina inditi. 12 I tempo iti towawinena Potipa liliu mohintaki komona Yusupu hai nadii, pane nauli, “Maiko moluhike.” Agaiana Yusupu mokarumbetu hai tekabaha, pane melangkami lao i raoa, hai komona napalehimi i taiena towawine iti. 13 Poitana Yusupu melangka hai mopalehi komona, 14 towawine iti mokakiohe taunana, nauli, “Nipeita, to Ibarani au naanti mai tobalilongku i sou ide, maike napakadake. Nasuakina i lincuku ina natiena, agaiana monganga-ngangana. 15 Anti ponganga-ngangaangku, ia melangkami lao i raoa. Ideto komona napalehi.”
16 Mewali komo iti nawoli towawinena Potipa i holana, hai mampegia pesulena tobalilona. 17 I pesulena tobalilona, napetumbuiami apa au mewali, nauli, “Ohou to Ibarani au nuanti mai, nasuakina i paturuanta ina natiena. 18 Agaiana i ponganga-ngangaangku, melangkami lao i raoa. Ideto komona napalehi.”
19 Kanahadina Potipa lolitana towawinena au mampololita adana Yusupu, rumihi mpuu karumpuna. 20 Mewali motudumi tauna mohaka Yusupu hai rapopesua i lalu tarunggu, potarungguanda tauna au masala i datu. 21 Agaiana Pue mamporangai Yusupu hai mopatongawa ahiNa au bara mokahopoa iria, ido hai naunde tadulako tarunggu. 22 Mewali, Yusupu napoinalaia tadulako tarunggu mokadipura toratarunggu hai hinangka bago inditi. 23 Tadulako tarunggu barapi paraluu mampekiri hinangka bagona, lawi bago iti napoinalaia hahami Yusupu. Hai Yusupu naporangai liliu Pue, ido hai hinangka au napobago mewali maroa.