Yehuda hai Tamar
38
1 I tempo iti, Yehuda mopalehihe halaluna hai maida hihimbela hai hadua tobalilo au rahanga Hira hangko i wanua Adulam. 2 Inditi, Yehuda mombeisa hai hadua anantowawine to Kanaa, anana Sua, alana napotambia. 3 I posambokonda, moanahe talu tobalilo. Ananda au towutu rahanga Er. 4 Ananda au kadua nahanga inana Onan. 5 Ananda au katalu nahanga inana Sela. I karapoanakana ananda au katalu iti, Yehuda ara i Kesib.6 Mahilemi Er anana au towutu, napopotambimi Yehuda hai hadua towawine au rahanga Tamar. 7 Agaiana kadake mpuu babehiana Er i peitana Pue, ido hai Nahuku mate.
8 Bara mahae hangko indo, Yehuda mololitami i Onan, adina Er, nauli, “Laomoko i bembana wutumu hai nupoluhi. Pabukeimide apa au hintoto moula ada agamanta, lawi oio wata adina maniko tobalilona. Ane nubabehi nodo, ina ara pemuleana wutumu.” 9 Agaiana naisa Onan, ane moanahe deade, bara ina raimba anana haduduana agaiana ananari wutuna. Ido hai i bela-belana mampoluhi bembana wutuna, remunaa napogiangaa pea mabubu i raoa datihe moana. 10 Babehiana iti mopaara karumpuna Pue, ido hai napapate wori Pue. 11 Hangko indo, Yehuda mololitami i Tamar maniana, nauli, “Mesulemoko i tosaemu, hai maidamoko inditi, hai nukingki kabembamu duuna mahile anangku Sela.” Agaiana barari iti au natunggai Yehuda, lawi langa inee pae deade Sela napapate wori Pue Ala nodohe wutuna au rodua. Mesule mpuumi Tamar i souna tosaena.
12 Bahangkiami parena liu, matemi towawinena Yehuda. Hopomi kamapepena hulena, Yehuda mowawaha Hira, to Adulam iti bona laohe i boea Timna, pogundia wulu dimbana. 13 I tempo iti, Tamar mohadimi bambari kamaina Yehuda pengantina i Timna ina mogundi wulu dimbana. 14 Nauli laluna, “Mahilemi Sela anana Yehuda au totoadi, agaiana duuna ide-ide bara mani rapopotambi hai iko.” Ido hai mopahurumi hampi kabembana, motuko lindona hai tolombu, hai mohuda i baba bente boea Enaim i wiwi rara lao i Timna. 15 Yehuda moita towawine iti, agaiana napehangu hadua towawine au bara maroa adana, lawi metolombu. 16 Nahungkukimi Yehuda towawine iti pane naperapi iria bona napoluhi. Bara naisa Yehuda towawine iti iami maniana.
Mehana towawine iti, nauli, “Ane nodo, apa au ina nuweina?”
17 Nauli Yehuda, “Ina kuweiko hambaa towau au mangura mani.”
Mehana towawine iti, “Peisato, asala ara au nuweina au mewali pekingkiaku hangko damani hawe towau au nupakatuana.”
18 Napekune Yehuda, “Apa au nuperapi?”
Mehana, “Nuweina penemu au mobarara, hai laimu.” Nawei mpuumi Yehuda ope-ope au naperapi iti, hai moluhimohe, ido hai mantimimi Tamar. 19 Pesulena Tamar i souna, nabungkahimi tolombuna, pane napusa mbulimi hampi kabembana.
20 Bara mahae hangko indo, Yehuda motudumi Hira, himadana, lao i boea Enaim moanti towau au mangura, hai merapi hule hinangka anu-anuna au nakira i towawine iti mewali pekingkiana, agaiana towawine iti bara nalambi Hira. 21 Napekune Hira i to Enaim, “Iumbami towawine au bara maroa adana au paka mepegia i wiwi rara ide?”
Mehanahe, “Bara ara towawine au bara maroa adana inde.”
22 Mewali mesulemi Hira i Yehuda, nauli, “Bara kulambi towawine iti. Moula lolitanda to Enaim, bara ara towawine au bara maroa adana au mepegia indolou.”
23 Kanahadina Yehuda lolitana, mololitami nauli, “Bara moapa ane iriato anu-anungku au kupakingkia bona datike maea mohaoki hule. Kupari-parimi kubaiari, agaiana towawine iti bara nupombelambia.”
24 Talumi wulana hangko inditi, nahadimi Yehuda bambarina Tamar maniana tuwo nodo hadua towawine au bara maroa adana hai mantimimi.
Ido hai mohawami Yehuda, nauli, “Niala mai towawine iti rahuwe duuna mate.”
25 Tangana Tamar raanti i raoa, napakatumi tewaina i pengantina, nauli, “Iko napakantimina tauna au ampuna anu-anu ide. Niparesa hema ampu pene au mobarara hai lai ide.”
26 Kanaisana Yehuda itimi anu-anuna, mololitami nauli, “Towawine iti bara masala. Melumbu mpuu notona pane notongku, lawi barana mopabukei dandiku iria moula ada agamanta. Katou-touana hangangaa kupopotambi hai Sela anangku.” Ido hai Yehuda barapi hambela mampoluhi Tamar.
27 Tempona Tamar ina moana, tongawami poropana anana. 28 Tangana moana, hadua hangko i anangkoi au moropa iti mampopesuwu taiena hambali. Mewali taiena anangkoi iti nakingki sando hai nakalai lero au malei hai mololita, nauli, “Anangkoi ide au mesupa ioru.” 29 Agaiana anangkoi iti modii suleri taiena, hai au haduanari mesupa ioru. Roo indo, nauli sando, “Maroho mpuuko mopari-pari mesuwu.” Ido hai anangkoi au mesupa ioru rahanga Peresi.b 30 Hangko inditi, mesupami adina au rakalai lero malei, hai rahanga Sera.c