<<    <     Pewalina     37     >    >> 
Yusupu hai halalunahe
37
1 Yako maida i tampo Kanaa, paida-idaana umana, 2 hai idemi tuntukana pemuleana Yako.
Hampulomi hai pitu parena tinuwuna Yusupu, meula-ulami mamporewu towau hai dimbana umana hihimbela hai wutunahe, anana Bilha hai Silipa, rodua towawine au natendahe umana. Yusupu mampogiluhe wutuna i umana lawi kadake babehianda.
3 Yakoa mampokakaia ntepuu Yusupu panehe halaluna, lawi rapoanaka i kasaeanami Yako. Ido hai hambela tempo, radauaami hantau badu mandoe au makara.4 Karaitana halaluna, Yusupu au napokakaia ntepuu umanda pane ihira, ido hai mepongkamohe mokahihi Yusupu, hai barapohe mololita maroa iria.
5 Hambela tempo, mangipimi Yusupu, hai pangipina iti napetumbuiahe halaluna, ido hai tetambaimi karakahihina.6 Nauli node irihira, “Nipehadingi, ina kutuntuakau pangipingku.7 Mangipina, kuita tanganta i bonde kakau moambi pare. Inditi kuita parengku meangka togo i tanga, hai paremi motumpahe motoleliki parengku.”
8 Rauli halaluna, “Nupehangu oiomi au ina mewali datu au makuasa irikami?” Anti pampetumbuina pangipina iti, katetetambaiari karakahihina halaluna.
9 Hambela mani Yusupu mangipi hai pangipina iti napetumbui mbuli i halalunahe, nauli, “Iko mangipi mbulina. Kuita alo, wula hai betue hampulo hai haogu motumpahe iriko.”
10 Pangipina ide napetumbuia wori umana, ido hai nauliangaa umana, node, “Pangipi apari diti? Nupehangu pae, iko, inamu hai halalumuhe ina menombamongkai irio?” 11 Mahina ntepuumohe halaluna iria, agaiana umanda mampekiri liliu pangipi iti.
Yusupu rapobalu hai raanti lao i tampo Masiri
12 Hambela tempo, wutuna Yusupu laohe mamporewu towau hai dimbana umanda hungku i Sike. 13 Nauli Yako i Yusupu, “Wutumuhe mamporewu towau hai dimba hungku i Sike. Meangkamoko laohe mai nupeita.”
Mehana Yusupu, “Io, uma.”
14 Nauli umana, “Laoko mampeitahe wutumu, towaunda hai dimbanda bona maina nupetumbuia kanoumbanda.” Mewali napopelingka mpuumi Yusupu hangko i lembo Hebron.
Bara mahae hangko indo, hawemi Yusupu i Sike.
15 Tangana molumao i pada node hou node mai mohaoki paidaanda wutuna, ia mohidupa hai hadua tobalilo. Tauna iti mekune iria, nauli, “Apari nuhaoki?”
16 Mehana Yusupu, “Wutungku maihe mamporewu towau hai dimba inde. Ba taisato kaiumbanda?”
17 Nauli tauna iti, “Barapohe inde. Kuhadi rauli melimbamohe i boea Dotan.” Ido hai meangkami Yusupu mokulelehe wutuna, hai nahumbamohe i Dotan.
18 Karao mani Yusupu raitami, hai hangko damani teduu irihira, mohawamohe ina rapapate. 19 Molololitamohe hadua hai hadua, rauli, “Peita mai olou topangipi-ngipi. 20 Tapapateke, hai watana tanawo i lalu tibubu pane tapololita i umanta kamatenami nahaka singa. Tapeita mpuu ba noumba pewalina pangipina.”
21 Pohawanda iti nahadi Rube, ido hai pane nahaokimi rara ina mopatuwo Yusupu, nauliangaahe, “Inee woia tapapate. 22 Tanawo peami i lalu tibubu i pada wungi ide, agaiana inee tapapahai ba tabebelai watana.” (Tunggaiana Rube ide bona mopatuwo Yusupu hai naanti hule i umanda.) 23 Kahawena Yusupu irihira, liliu rahaka hai rawosui baduna au makara, 24 pane rabisoso lao ranawo i lalu tibubu au bangi. 25 Roo indo, maandehe.
Tanganda maande, unga peahe moita hamporangaa to Sumaila hangko i tampo Gilead au laohe i tampo Masiri. Ontanda rapopatekei rampa-rampa hai lana mawongi. 26 Nauli Yehuda i halalunahe, “Apami bunduna adinta tapapate hai lia tawuniangi? 27 Aginami tapobalu i to Sumaila. Inee woia tapopeahi-ahi lawi ia wori mia-mia adinta.” Rapeulai mpuumi halalunahe lolitana iti. 28 I tempo iti, melempomohe topobalu-balu to Midian (au rauli wori to Sumaila), hai Yusupu raoremi wutuna hangko i lalu tibubu, pane rapobalu i to Sumaila, holona rompulo pekana doi pera. Roo indo, Yusupu raantimi lao i tampo Masiri.
29 Babehianda iti bara naisa Rube. Mesule i tibubu, napetiro barapi ara Yusupu i lalu, ido hai mohepa-hepami hampina lawi masusa laluna. 30 Indo, mesulemi Rube i adinahe hai mololita nauli, “Yusupu barapi ara i lalu tibubu! Apami au kubabehi ide-ide?”
31 Ido hai rasambalemi hambaa towau, rahongko wahena rapoemei baduna Yusupu. 32 Roo indo, badu makara au handami wahe raanti lao i umanda hai mololitahe, rauli, “Badu ide kilambi. Paresa hampai. Ba baduna Yusupu, ba bara?”
33 Naisa ntepuu Yako badu iti, pane nauli, “Tou, iti baduna anangku! Manoto nahakami woia wei singa hai nahepa-hepa.”
34 Yako liliu mohepa hampina anti kamasusana laluna, hai roo indo, mopakemi waru ngkasusa. Bahangkia alona moteriahi anana. 35 Ope-opehe anana tobalilo hai towawine mai mopalindo umanda. Agaiana ia bara mau rapalindo, nauli, “Duungku mate moteriahi liliuna anangku.” Nodo mpuumi Yusupu kanateriahina umana.
36 Hawemohe to Midian i tampo Masiri, Yusupu rapobalu mbulimi i Potipa, tadulakonda topokampai souna datu.