Pemuleana Esau
36
1 Idemohe pemuleana Esau au rahanga wori Edom. 2 Esau mamposamboko talu towawine to Kanaa, iami Ada anana Elon to Heti, Oholibama anana Ana ampuna Sibeon to Hewi, hai 3 Basmat anana Sumaila adina Nebayot. 4 Ada mampoanaka hadua tobalilo, hangana Elipas. Basmat mampoanaka hadua tobalilo, hangana Rehuel. 5 Oholibama mampoanaka talu tobalilo, iamohe: Yeus, Yaelam hai Kora. Ope-ope ananda iti mesupahe i tampo Kanaa.6 Hangko inditi, Esau mopalehimi Yako lao i tampo ntanina, moanti ope-ope towawinena, ananahe, tauna au maidahe i souna, pinatuwona hai hinangka anu-anuna au nalambi i tampo Kanaa. 7 Esau mogaahe hai Yako, lawi ngkaia pinatuwonda hai anu-anunda, hai tampo au rapaidai iti barapi handa rapaidai hai rapaandei pinatuwonda 8 Mewali Esau, au rahanga wori Edom, maida roomi i tongku-tongkuna i tampo Seir.
9 Idemohe pemuleana Esau au mewali toiorunda to Edom au maidahe i tongku-tongkuna i tampo Seir.
10-13 Ada sambokona Esau moana hadua tobalilo, hangana Elipas.
Elipas mopaara lima tobalilo iami: Teman, Omar, Sepo, Gaetam hai Kenas.
Ara wori hadua towawine au natenda Elipas, hangana Timna. Moana hadua tobalilo, hangana Amale.
Basmat sambokona Esau moana wori hadua tobalilo au rahanga Rehuel.
Hai Rehuel mopaara iba anangkoi tobalilo, iamohe: Nahat, Sera, Sama hai Misa.
14 Sambokona Esau au rahanga Oholibama iami anana Ana, ampuna Sibeon. Oholibama moana talu tobalilo, iamohe: Yeus, Yaelam hai Kora.
15 Idemohe pemuleana Esau au mewali tadulakonda hantina-hantina:
Elipas, anana Esau au towutu, mopaara bahangkia tadulako hantina-hantina, iamohe: Teman, Omar, Sepo, Kenas, 16 Kora, Gaetam hai Amale. Itimohe tadulakonda to Edom hantina-hantina, pemuleanahe Ada sambokona Esau.
17 Rehuel anana Esau mopaara bahangkia tadulako hantina-hantina, iamohe: Nahat, Sera, Sama hai Misa. Ope-ope tinanda iti iami pemuleana Basmat sambokona Esau.
18 Oholibama, sambokona Esau, anana Ana, mopaara bahangkia tadulako hantina-hantina, iamohe: Yeus, Yaelam hai Kora.
19 Ope-ope tadulako hai tina iti iami pemuleanahe Esau (au rahanga wori Edom).
Pemuleana Seir
20-21 Seir iami hadua to Hori au maida i tampo Edom hangkoia. Idemohe pemuleana au mewali tadulakonda hantina-hantina: Lotan, Sobal, Sibeon, Ana, Dison, Eser hai Disan.
22 Lotan mopaara Hori hai Heman. (Lotan ara halaluna towawine, hangana Timna.)
23 Sobal mopaara Alwan, Manahat, Ebal, Sepo hai Onam.
24 Sibeon mopaara Aya hai Ana. (Ana idemi au mohumba pentumbua owai mamu i pada wungi i porewuana kalidena umana).
25 Ana mopaara Dison hai hadua towawine au rahanga Oholibama.
26 Dison mopaara Hemdan, Esban, Yitran hai Keran.
27 Eser mopaara Bilhan, Saawan hai Akan.
28 Disan mopaara Us hai Aran.
29-30 Idemohe tadulakonda to Hori hantina-hantina au maida i tampo Seir: Lotan, Sobal, Sibeon, Ana, Dison, Eser hai Disan.
Datu-datu i tampo Edom
31 Hangko damanihe ara datu au moparenta to Isaraeli, datu idemohe au mombeusu-usu moparenta i tampo Edom.
32 Nguru-nguruna Bela, anana Beor, moparenta hangko i wanua Dinhaba.
33 Matemi Bela, napahuru Yobab, anana Sera, au hangko i wanua Bosra.
34 Matemi Yobab, napahuru Husiam hangko i tamponda to Teman.
35 Matemi Husiam, napahuru Hadad, anana Bedad, au moparenta hangko i wanua Awit. (Hadad itimi au monangi to Midian i tampo Moabi.)
36 Matemi Hadad, napahuru Samla hangko i wanua Masreka.
37 Matemi Samla, napahuru Saulu hangko i wanua Rehobot i wiwi owai Eprat.
38 Matemi Saulu, napahuru Baal-Hanan, anana Akbor.
39 Matemi Baal-Hanan anana Akbor, napahuru Hadar hangko i wanua Pahu, sambokona rahanga Mehetabeel, anana Matred, ampuna Mesahab.
40-43 Idemohe pemuleana Esau au rauli worihe to Edom au mewalihe tadulakonda hantina-hantina: Timna, Alwa, Yetet, Oholibama, Ela, Pinon, Kenas, Teman, Mibsar, Magdiel hai Iram. Tampo au rapaidai hantina-hantina rahanga moula hanganda tadulakonda.