Yako hai taunana mesulehe i Betel
35
1 Hangko inditi, Pue Ala mololita i Yako, nauli, “Mesulemoko i Betel, i pampatongawaaNgku irio i pelangkamu hangko i wutumu Esau. Maidamoko inditi hai nubabehimi hambua pohuwea popenomba Iriko.”2 Ido hai Yako mampohawaahe hantambiana hai ope-ope tauna au napohimbelaa, nauli, “Nitendemi hinangka lengge anitu au rababehi hangko i watu ba i kau. Hai nibabehimide ada mpobahoi wata moula ada agamanta, hai nipakemi hampi au bara kedai. 3 Hangangaa nibabehi nodo, lawi ina laoke i Betel. Indolou ina moarona haogu watu pohuwea popenomba i Pue Ala, au motulungimona i lalu kaparingku hai au mamporangaina iumba-umba pea kalaoangku.” 4 Karahadina lolitana, rahuhumi i Yako ope-ope lengge anitu au rababehi hangko i watu ba i kau, hai nodo wori dalinda. Ope-ope iti natawumi Yako i woi hampoa kau marumbu hungku i boea Sike.
5 I peangkanda Yako hai tinana, Pue Ala mopaarami kalanga i ope-ope tauna au maidahe i boea au hungku inditi bona langahe moewa ba mowulai Yako hai ranganahe. 6 Kahopoana, hawemohe i tampo Kanaa i wanua Betel au rahanga wori Lus. 7 Inditi naaromi Yako haogu pohuwea popenomba, hai nahanga El-Betel,a lawi inditimi Pue Ala mopatongawa wataNa i Yako i pelangkana hangko i wutuna. 8 Inditi wori Debora, topokadipura Ribeka, inana Yako, matemi hai ratawu i woi kau marumbu ntanda i Lau boea iti. Idomi pongkana kau iti rahanga, “Kau Poteriangaa”.
Pue Ala mowati Yako i Betel
9 Hawemi Yako i Betel hangko i tampo Padan-Aram, Pue Ala mopatongawa mbulimi wataNa i Yako, hai Nawati, 10 Nauli, “Oio barapoko rahanga Yako, agaiana rahangamoko Isaraeli.”b
11 Roo indo, nauli mbuli Pue Ala, “Ikomi Pue Ala Au Makuasa. Memule-mulemoko duuna bosakau. Hangko i pemuleamu ina Kupopewali hambua kadatua au mahile hai ngkaia kadatua ntanina, hai bosa pemuleamu ina mewalihe datu. 12 Tampo ide au Kuwei i Burahima hai Isaki ina Kuwei woriko hai rapososora wori pemuleamu.” 13 Roo mololita nodo, Pue Ala mopalehimi Yako, 14 hai nahuami Yako haogu watu pepopainga au mewali tanda kainditinami Pue Ala mololita iria. Watu iti nabumbuhi anggoro hai lana mawongi mewali popenombana i Pue Ala. 15 Paidaa iti nahanga Betel.c
Kapatena Raheli
16 Roo indo, Yako hai tinana mopalehihe Betel, karao manihe hangko i boea Efrata, hawemi tempona Raheli moana. Hai mapari mpuu poanana, 17 ido hai mololitami sando iria, nauli, “Ineeko langa. Ide-ide moana mbuliko hadua tobalilo.” 18 Ina opemi inaona, Raheli mohanga anana iti Ben-oni,d agaiana Yako mohanga Benami.e
19 Matemi Raheli, ratawu i wiwi rara au monontohi boea Efrata, au ide-ide rahanga Beteleme. 20 Inditimi Yako mampopeangka haogu watu pepopainga, hai duuna ide-ide talumbana Raheli rapekatandai hai watu iti. 21 Roo indo, napaliliumi Yako polumaona moliu boea Migdal-Eder pane moarohe bambarunda i hambali boea iti. 22 Tanganda inditi, Rube mampoluhimi Bilha au natenda umana. Babehinda iti nahadimi umanda.
Ananahe Yako
Ananahe Yako tobalilo hampulo hai rodua.
23 Ananahe i Lea: au towutu Rube, pane Simeo, Lewi, Yehuda, Isakar hai au toadi Sebulo.
24 Ananahe i Raheli iami: Yusupu hai Benami, adina.
25 Ananahe i Bilha, hawina Raheli au naposamboko iami: au towutu Dani hai au toadi Naptali.
26 Ananahe i Silpa, hawina Lea au naposamboko, iami: au towutu Gad hai au toadi Aser.
Itimohe anana Yako tobalilo au rapoanaka i Padan-Aram.
Kapatena Isaki