Dina hai Sike
34
1 Hambela tempo, Dina ananda Yako hai Lea lao mesonda-sonda i bahangkia anantowawine to Kanaa. 2 I tempo ido, ara hadua anantuana, hangana Sike anana Heno to Hewi au mokamumu tampo iti. I poitana Dina, Sike liliu mampotio Dina, hai naposamboko ngkandii. 3 Anti kamahilena laluna i Dina, napokakaia hai napari-pari bona mentaka mpuu laluna iria. 4 Nauli Sike i umana, “Kuperapi i uma nuperapiana anantowawine iti i tosaena bona kupotambia.”5 Kanahadina Yako watana anana radaihimi, ia bara peisa mobabehi ba apa-apa lawi ananahe tobalilo tanganda mani morewu i pada. Ido hai napegiari mai pesulenda.
6 Hawe mpuumi Hemor, umana Sike, i Yako bona mololita iria. 7 Bara mahae hangko indo, mesulemohe anana Yako hangko i pada. Karahadina peami apa au mewali, tingkarahe hai rumihi karumpunda, lawi babehiana Sike i anana Yako iti mopakoimi hanganda ope-ope to Isaraeli. 8 Nauli Hemor i Yako hai ananahe, “Anangku Sike mahile laluna mamposamboko Dina. Ido hai kuperapi maroa irikita bona anangku hai anamu tapopombekadipuramohe. 9 Agina mopaarake pohintuwu bona tinamu hai tinangku mombesua i lalu posamboko hai 10 bona peisakau maida i olongki i tampo ide iumba pea niunde hai peisa worikau mobalu-balu inde hai mampoampumokau tampo ide.”
11 Hangko inditi, nauli Sike i umana Dina hai halalunahe, “Ane maahi lalumi iriko, nipabukei perapingku ide bona kuweikau apa pea au niunde. 12 Niuli peami ba apa au nipeinao hai nipakanotoana holona ba adana, hai ina kuweikau apa au niperapi bona nipokana peana mamposamboko towawine iti.”
13 Anti babehiana Sike au mopakedaimi watana Dina, ananahe Yako modongkokimohe Sike hai Hemor, 14 rauli, “Kipokaea ane kipokana iti adingki mampotobalilo tauna au bara ratile. 15 Kipokana pamperapimi asala nipeulai hampaka adangki au node: ope-ope tobalilo irikamu hangangaa ratile bona mewalikau nodo ikami. 16 Ane roo nodo, hangko kipokanari pamperapimi mombesua i posamboko. Roo nodo, peisangkai maida i olomi hai mewalike hantina. 17 Agaiana ane bara niunde mampeulai adangki hai barakau mau ratile, adingki hangangaa kiala hule hai ina padungkai hangko inde.”
18 Hemor hai Sike mampokana pamperapinda iti. 19 Anti kamahilena laluna i Dina, ido hai napeinao mpuu Sike mampeulai pamperapinda. (Sike iti au teadai mpuu i lalu souna umana.)
20 Hangko indo, laomohe Hemor hai Sike i pogomboa i babaka bente wanua hai mololitahe i tauna, rauli, 21 “To Isaraeli iti himadantahe, mewali kiperapi bona nipogiangaahe maida sambelake i tampo ide, hai peisa worihe mobalu-balu inde, lawi tampo ide maemba mani. Ikita peisa worike motambi hai ihira, nodo wori ihira peisahe motambi hai anantowawinenta. 22 Agaiana tauna iti, bara raunde maida sambelake mewali hantina ane bara taula adanda au node: ope-ope tobalilo hangangaa ratile nodo ihira. 23 Ane tababehi nodo, ope-ope pinatuwonda hai anu-anunda hangangaa mewali wori kiranta. Agina tapokana pamperapinda bona maida sambelake.” 24 Ope-ope tauna au teruhu iti mampokanahe lolitanda Hemor hai Sike, ido hai ope-ope tobalilo i wanua iti ratilemohe.
25 Talumi alona hangko indo, tanganda mani mampomahai petilea, rodua wutuna Dina au rahanga Simeo hai Lewi, moalamohe pihonda hai laohe i wanua iti. Pesuanda i wanua iti bara raisa tauna, hai mopapatemohe ope-ope tobalilo inditi 26 tepesua Hemor hai Sike. Roo indo, Dina raalami hangko i souna Sike, hai padumohe. 27 Karoonda mepapate, anana Yako laomohe mamuru i lalu wanua iti, lawi inditi adinda rapakedai. 28 Ngkaia au rarampaki tepesua towaunda, dimba, japi, kalide hai hinangka au ralambi i lalu hai i raoa wanua iti. 29 Towawinenda hai ananda ratawanihe, hai ope-ope kapebukunda raantimi, tepesua hinangka au rahumba i lalu sounda.
30 I pesulenda, nauli Yako i Simeo hai Lewi, “Nipakasusamona hai nipakadakemi hangangku i to Kanaa hai to Feris au maidahe i tampo ide. Ikita ide, haodi pea imbata. Ane hintuwuhe tauna iti hai raewake, manotomi kaina rapaonenta.”
31 Agaiana mehanahe, “Maroa pae adingki rapakedai nodo hadua towawine au kadake babehiana?”