Pohidupanda Yako hai Esau
33
1 Karao mani, Yako moitami Esau maihe hai taunana iba atuna tobalilo. Idomi hai anana Nakiraahe Lea hai Raheli hai hawinda au rodua. 2 Napopombeunturamohe hawinda rodua hihimbela hai ananda bona moioruhe hangko i Lea hai ananahe. Raheli hai Yusupu napaiboko ntepuuhe. 3 Yako moiorumi lao mohungkuki wutuna. Hungkumi iria, motumpami hawe i tampo pitu belana i lindona Esau. 4 Agaiana melangkari Esau lao mogagu Yako, liliu nakalapui hai naangki, pane mombeteriahimohe. 5 Kanaitanda Esau towawine hai anangkoi iti, napekune, nauli, “Hemahe au nupohimbelaa ide?”Mehana Yako, nauli, “Idemohe anangku au naweina Pue Ala.” 6 Roo nodo, maimohe hawina towawine hai ananda laohe motumpa i lindona Esau, 7 pane lao worihe Lea hai anana motumpa iria. Kaopeana, Yusupu hai Raheli. 8 Napekune Esau, nauli, “Apa tunggaiamu i tobu-tobuna pinatuwo au kupohidupaa inona?”
Mehana Yako, nauli, “Wutungku au kuadai, ope-ope pinatuwo iti, oiomi ampuna. Kuperapi bona maroa pea lalumu iriko.”
9 Agaiana nauli Esau, “Ngkaiato anu-anungku, barana paraluu nuparaseengi.”
10 Nauli Yako, “Ineeko nodo, lawi ane maahiko iriko, alamide apa au kupakatu irio, lawi matana mpuuna mampombelambiako. I kakuitamu inona, nodona moita Pue Ala, lawi nudoko maroana. 11 Kuperapi bona nudoko apa au kuweiko ide, lawi maahi laluna Pue Ala iriko pane Naweimona paka-pakana au kuparaluu i katuwongku.” Yako mopari-pari ntepuu wutuna bona modoko apa au nawei iti duuna naala.
12 Roo nodo, nauli Esau, “Mangkadipuramokau bona laomoke. Ina kiporangaitokau.”
13 Mehana Yako, “Nuisato kamawewengki i lalu polumaongki lawi moantina anangkoi hai ara worihe pinatuwo au hangko moana. Mogalori hangalo pea ane kipasohe lumao, hangangaa matehe. 14 Agina moiorumoko; kiula boko raiko maole-ole. Mohidupa peake i tampo Seir.”
15 Nauli Esau, “Ane nodo, kuweiko bahangkia hawingku au mamporangaikau i polumaomi.”
Mehana Yako, nauli, “Ineemi nuposusa. Au kupokatana iami kamaahimumi iriko.”
16 Mewali i alo iti, meangkami Esau mesule i tampo Seir. 17 Agaiana Yako laori i boea Suko, hai inditi moaromi bambarunda hai peongaana pinatuwonda. Idomi pongkana pane boea iti rahanga Suko.a
18 I polumaona Yako iti, mepongkahe hangko i Padan-Aram, hai kahopoana hawe maroamohe i wanua Sike i tampo Kanaa. I kahawenda, moaromohe bambarunda i pada hungku i wanua iti. 19 Pada au napobambarui iti naholo hangko i pemuleana Hemor, umana Sike. Naholo hai hangatu doi pera. 20 Inditi, naaromi Yako watu pohuwea popenomba, hai nahanga, “Pue Ala, Ampunda to Isaraeli.”b