Yako mampasilolonga bona mohidupa hai Esau
32
1 Roo indo, Yako mopaliliumi polumaona. Unga peahe hawe bahangkia malaekana Pue Ala mampombelambia Yako. 2 Kanaitanda Yako malaeka iti, liliu nauli, “Idemi paidaana Pue Ala.” Ido hai nahangami Yako paidaa iti Mahanaim.a3 Roo nodo, natudumohe Yako bahangkia taunana moioru lao i tampo Seir, tamponda to Edom bona mampombelambiahe Esau, wutuna. 4 Nauliangaahe, “Nipahawe tewaingku i wutungku Esau node: ‘Idemi Yako hawimu au mahaemi maida i Laba. 5 Arami japingku, kalidengku, dimbaku hai towaungku, hai hawingkuhe. Wutungku au kuadai, kupahawe bambari ide irio, hai kuharunga nudoko wongkoia.’ ”
6 Pesulenda toratudu iti i Yako, rauli, “Mombelambimongkai hai wutumu Esau, hai ide-ide tangana mai i rara maiko nadupa, hai mamporangahe iba atuna tobalilo.” 7 Mohadi bambari iti, langa mpuumi Yako. Ido hai nagaamohe taunana au meula iria mewali ronggaa, nodo worihe towau, dimba, onta hai japina. 8 Nauli laluna, “Ane Esau mai mampombealaa au hanggaa, ara manihe hanggaa au peisa mopatuwo watanda.”
9 Hangko inditi, mekakaemi Yako, nauli, “O, Pue Ala au rapenombai totuangku Burahima hai umangku Isaki, pehadingi wongkoia. Oiomi au motuduna mesule i tampoku hai i halalungkuhe, hai Nudandimi ina Nukadipura maroana. 10 Katouana barana hintoto modoko ahiMu au bara mokahopoa i lalu katuwongku. I kapadungku hangko i souna umangku hai i powetangku owai Yarade hangkoia, bara huba apa au kuanti, batena pea lai au kukingki. Agaiana i pesulengku ide, bosamongkai, mewalimongkai rontobu. 11 Kupedoma Irio bona Nupelae wongkoia hangko i Esau wutungku, lawi kupokalanga ina napombealaana hai mopakarugi ope-ope towawinengku hai anangkuhe. 12 Agaiana Nudandimi hangkoia ina Nukadipura maroana hai ina Nupabosa pemuleangku nodo kangkaiana wungi i wiwi ntahi au bara peisa raimba.” 13 Mohambengimi Yako inditi.
Kahalona madondo, naalami hanggaa hangko i binatana bona nawei Esau, 14 iami towau lundara rongatu baana, towau laki rompulo baana, dimba wawine rongatu baana, dimba balilo rompulo baana, 15 talu pulona baana onta wawine hihimbela hai ananda, japi lundara iba pulona baana, japi laki hampulo baana, kalide wawine rompulo baana, hai kalide au balilo hampulo baana. 16 Napatanihe pinatuwo iti hantobu-hantobu, hai natuduahe hawina mokampai, nauliangaahe, “Moiorumokau, hai nikampaihe hantobu-hantobu pinatuwo iti, datihe mombehungkuki.” 17 Napohawaami Yako hawina au moioru ntepuu, nauli, “Ane hidupako hai Esau wutungku hai ane napekuneko node, ‘Hema ampumu? Iumbako lao? Hai hema wori ampuna pinatuwo au nueri ide?’ 18 Hangangaa mehanako node: ‘Ide pinatuwonahe hawimu Yako. Ide mai pakatuna, au napopeampu i Esau, tuana. Hawimu Yako, olouto mai i boko.’ ” 19-20 Nodo wori hawana Yako i hawina au kadua hai au katalu hai ope-ope au moeri hantobu-hantobu pinatuwo iti. Hangangaa himbela pehananda ane mohidupahe hai Esau. Lawi nauli laluna Yako, “Ane nadoko Esau ope-ope au kupakatua ide, ina maroa laluna iriko i pohidupangki.” 21 Mewali au napakatu iti raantihe hawina au moioru, agaiana Yako mohambengi mani i bambaruna.
Yako mampombetiengaa malaeka
22 Kaindi iti peawomi, mearomi Yako moantihe towawinena rodua hai hawina au towawine rodua hai ananahe hampulo hai hadua, pane mowetahe owai Yabok. 23 Kahawenda towawinena hai ananahe ntanda orupena owai, nawetaha worimohe anu-anuna hai taunana. 24 Mewali ia pearai haduduana i hambali.
Roo indo, hawemi hadua tobalilo mampombetiengaa Yako duuna madondo. 25 I kanaisana tauna iti kadana menangi, mopahaimi kumbiana Yako alana marugimi patongke paana. 26 Nauli tauna iti, “Nukabahamona lawi ina mesupami alo!”
Agaiana mehana Yako, nauli, “Barako kukabaha ane bara manina nuwati.”
27 Napekune tauna iti, “Hema hangamu?”
Mehana, “Yako.”
28 Nauli mbuli tauna iti, “Barapoko rahanga Yako. Hangamu rabalikimi mewali Isaraeli,b lawi mampombetiengaamoko Pue Ala hai manusia, hai menangiko.”
29 Nauli Yako, “Nuuliangaana hangamu.”
Agaiana mehana tauna iti, “Apari nupekunea hangangku?” Roo nodo, mowatimi Yako.
30 Mewali, nauli Yako, “Mampombelindoamona Pue Ala agaiana tuwo manina.” Ido hai paidaa iti nahanga Peniel.c 31 Mesupami alo, padumi Yako hangko i Peniel hai mokakudami lawi marugimi patongke paana. 32 Duuna ide-ide pemuleana Isaraeli barahe moande onto au mentaka i patoa paa binata, lawi mokatuinaohe noumba Pue Ala mopakarugi kumbiana Yako.