Yako meloho hangko i Laba
31
1 Bara mahae hangko indo, nahadimi Yako pololitanda anana Laba au manguli, “Yako moalami anu-anuna umanta. Ope-ope kapebukuna nalambi hangko i umanta!” 2 Naita worimi Yako poantina pinoumana, barapi wolea iria nodo hangkoia. 3 Hangko inditi, mololitami Pue i Yako, Nauli, “Mesulemoko i halalumu i tampona toiorumu, hai ina Kuporangaiko.”4 Mewali natudumohe Yako tauna lao mokakio Raheli hai Lea bona hidupa sambelahe i pada porewuana towau hai dimba. 5 Kahawenda towawinena inditi, mololitami Yako irihira, nauli, “Kuita umami barapi wolea iriko, nodo hangkoia. Agaiana Pue Ala au napenombai umangku, Iami au mamporangai liliuna. 6 Niisato noumba karumihina pobagongku i umami. 7 Agaiana nauri nodo, bosami belana naakalangina, lawi hampulomi belana napamakura sarongku hangko i apa au nadandiana. Agaiana Pue Ala bara mampogiangaa umami mobabehi dake iriko. 8 Tongawami kanawatingku Pue Ala, lawi ane nauli umami: ‘Pinatuwongku au betuke nuposaro,’ ope-ope pinatuwona moanahe au betuke. Hai ane nauli umami: ‘Pinatuwongku au mobati-bati nuposaro,’ ope-ope pinatuwona moanahe au mobati-bati. 9 Nodomi rarana Pue Ala moala pinatuwona umami hai Naweina.
10 Hambela, i temponda pinatuwo motambi, mangipina hai kuita towau au laki tanganda motambi, hai ope-opehe mobati-bati, betuke hai loba. 11 Unga pea malaekana Pue Ala mololita iriko, nauli, ‘Yako.’
Mehanana, kuuli: ‘Io, Pue.’
12 Nauli mbuli malaeka iti: ‘Peita, ope-ope towau laki au motowawine iti, mobati-bati, betuke hai lobahe. Kuoakako Kuwati nodo, lawi Kuitami ope-ope babehiana Laba irio. 13 Ikomi Pue Ala au nupenombai i Betel. Inditimi nuhua haogu watu pane nubumbuhi hai lana mawongi mewali watu popenomba Iriko. Inditi wori, mosumpako Iriko. Mewali, ide-ide mangkadipuramoko hai mesuleko i tampo kabubuana wahemu.’ ”
14 I pohadinda lolitana Yako, mehanamohe Raheli hai Lea, rauli, “Barapi ara anu-anuna umangki au kipososora. 15 Ikami ide naimbamongkai torare. Napopotambingkai hai oio, hai holongki au nadoko umangki napaope hahami. 16 Ope-ope kapebukuna umangki au naalami Pue Ala hangko iria hai Naweiko iami kirangki hai kiranda wori anangki. Aginami nubabehi apa au nahawaako Pue Ala.”
17 Mewali mangkadipurami Yako, pane napopesawimohe towawinena hai anana i onta, hai 18 padumohe monontohi tampo Kanaa, tampona Isaki umana. Ope-ope binatanda raerimi, hai hinangka anu-anunda au rahumba i tampo Padan-Aram raanti wori. 19 I kapadunda, tangana mani Laba mogundihe dimbana i pada, laomi Raheli i souna umana mopanangka watu tauna au napenombai umana hai au napoinalai mokampai sounda. 20 Hai i tempo iti, Yako moakalangi Laba, lawi bara napopaisa kapelohonda. 21 Naalami Yako ope-ope anu-anuna haduduana, hai padumohe hoholiga moweta owai Eprat monontohi tongku-tongkuna i tampo Gilead.
Laba mokulele Yako
22 Liumi talu alona, hangko naisari Laba pelohondami Yako hantambi. 23 Liliu mopateruhuhe taunana pane mokulelemi Yako. Pitumi alona polumaonda, hangko rahumbarihe i tongku-tongkuna i tampo Gilead. 24 Kaindimi, mampatongawami Pue Ala i Laba i lalu pangipina, Nauli, “Maroa-roako. Ineeko hawe mampohowaraa Yako lolita pegane ba pewati, nauri hantepo pea.” 25 Kahawena Laba inditi, Yako hantina mobambarumohe i tongku-tongkuna. Mewali Laba hai taunana mobambaru worihe hungku inditi.
26 Roo indo, laomi Laba mampombelambia Yako, hai napololitaa, nauli, “Moapari hai nupodongkoana? Nupelangkahahe anangku nodohe au ratawani. 27 Moapari hai nuakalangina? Padu ngkandiiko, barako huba mepapalakana. Ane kemetompatoko, manoto kekupopelingka maroatoko; kuposusaikau hampai, raponaniakau hai rebana hai kecapi, hangko melingkarikau. 28 Mogalorina moangki anangku hai ampuku tanda mpogagaangki, barapona tepaka. Ntuli mpuuko; babehiamu iti bara kana. 29 Ane kuunde, peisana mobabehi dake irio, agaiana inona kaindi, Pue Ala au napenombai umamu mampopaingana datiko kupopara. 30 Ide-ide ina mesuleko i boeamu lawi mabilamoko i umamu hai halalumu. Agaiana moapari hai mopanangkako watu taunangku au kupenombai hai au mokampai soungki?”
31 Mehana Yako, “Padu ngkandiingkai, lawi kupokalanga mole nutahahe pae anamu datihe meula iriko. 32 Kana i watu taunamu au nukabelai inona, ane rapana nuhumba irikami, hema pea au mopanangka hangangaa rapapate. I lindonda halalunta ide, nuparesa hampai ba ara mpuu anu-anumu irikami. Ane ara, nuala hule.” Mole barari naisa Yako Rahelito au mopanangka watu tauna iti.
33 Nguru-nguruna, mesuami Laba i bambaruna Yako mohaoki watu taunanahe. Hangko indo, mesua mbuli i bambaruna Lea hai i bambarunda rodua hawinda, agaiana bara nahumba. Kahopoana mesua i bambaruna Raheli. 34 Hangko damani hawe umana, Raheli moala watu tauna itihe nahohoka i lampi onta, pane napohudai. Mesuami Laba i bambaruna Raheli, nahaoki mantoleli agaiana bara wori nalambi. 35 Nauli Raheli i umana, “Uma, ineeko rumpu, barana peisa meangka modupako, lawi tangangku nahumba.” Watu tauna itihe nahaoki maroa-roa mpuuhe Laba, agaiana barahe nalambi.
36 Mewali rumpumi Yako, hai mololita, nauli, “Dake apami au kubabehi? Apari salangku panena nuwulai? 37 Ide-ide roomi nuparesa ope-ope anu-anungku. Ara pae anu-anumu nulambi au kipotio mai? Popesupa anu-anumu iti i lindota bona raita halalunta hai bona raisa hema au tou. 38 Rompulomi parengku maida irio. Dimba hai towaumu kukadipura maroa pane memule-mulehe. Bara huba hambaa towaumu au kusambale hai kuande. 39 Ane hambaa mate nahaka binata maila, barapi kuanti watana irio. Ikomi au mopahuru hai pinatuwongku. Ane ara au rapanangka maroa mabaa ba kaindi, batena nupopepahuru iriko. 40 Mobago liliuna irio. Ane mabaa, nasimbakina alo au makere. Ane kaindi, mohoruna kuli, hai bosa belangku bara peisa leta lawi mampeparaina pinatuwomu. 41 Rompulomi parengku maida irio, hai handami pari au kutodiha. Mobagona hampulo hai iba parena irio bona rodua anamu au towawine nuweina kuposamboko. Mobago mbulina ini parena irio pane molambina dimba hai towau ide. I lalu pobagongku irio, hampulomi belana nupamakura sarongku hangko i apa au nudandiana. 42 Ane rapana, barana naporangai Pue Ala au rapenombai totuangku Burahima hai umangku Isaki, kemesule mbero peana hai taie au soa. Agaiana naitami Pue Ala kamaparingku i pobagongku, ido hai inona kaindi Nakambaroako i lalu pangipimu.”
Podandinda Laba hai Yako
43 Mewali nahanaimi Laba lolitana Yako, nauli, “Towawinemu au rodua iti, anangkuhe; anamihe iti, ampukuhe, hai ope-ope pinatuwomu ide, iko ampuna. Katouana ope-ope au nuita ide, ikomi ampuna. Agaiana tapanoumba pae? Idehe anangku hai ampuku barapohe peisa kutaha. 44 Agina mopaarake podandi. Tapopombeusu-usumi watu ide mewali tanda podandita.”
45 Hangko indo, naalami Yako haogu watu hai nahua mewali watu pepopainga. 46 Pane motudumohe hahalaluna morampu watu hai rapopombeusu-usu maroa inditi. Roo nodo, maande sambelamohe hungku i watu iti.
47 Watu au rapopombeusu-usu iti nahanga Laba Yegar-Sahaduta, hai nahanga wori Yako Galed.a 48 Nauli Laba i Yako, “Watu au rapopombeusu-usu ide mewali pepopainga i podandita.” Idomi pongkana pane watu iti rahanga Galed. 49 Watu iti rahanga wori Mispa,b lawi nauli Laba, “Tapeperapi i Pue bona Nakampaike i katuwonta datike molingkai dandita, naurike mombekaraohi. 50 Ane anangkuhe ide nupobabehiahe dake ba nupotambia ntanihe, kehapiri bara raisa tauna, maroa-roako lawi Pue Ala au mosabikiko. 51 Watu au rapopombeusu-usu hai watu au rahua ide 52 mewali pariolo au mampopaingaake dati kulingkai mole laona pae mampombealaako. Nodo wori oio, barako peisa molingkai pariolo ide mole maiko pae mampombealaana. 53 Pue Ala au napenombai Burahima totuamu hai au napenombai Nahor umangku au ina mewali topebotusinta au mopakanoto ba tou-tou mpuu mopabukeike dandita ide.”
Roo nodo, mosumpami Yako mokabelai hangana Pue Ala au napenombai Isaki umana. I posumpana iti, napakanoto pampeulainami dandinda. 54 Hai i wongko bulu iti, nasambalemi hambaa pinatuwo napopenomba i Pue Ala. Roo nodo, nakakiomohe ope-ope maande sambela, hai roohe maande, mohambengihe inditi. 55 Kahalona madondo-dondo, naangkimohe Laba anana hai ampuna hai nawatihe, pane mesulemi i paidaana.