30
1 I tempo iti Raheli bara mani moana. Ido hai mohiri i wutuna, pane mololita i Yako, nauli, “Nuwei worina moana. Ane bara, agingkumi mate!”2 Kanahadina Yako lolitana Raheli, rumihi mpuu karumpuna. Ido hai mololita i Raheli, nauli, “Ide iko barana Pue Ala! Iari au mohomboki datiko moana.”
3 Nauli Raheli, “Ide Bilha hawingku, nupoluhimi bona moana. Ane moana, ara ananta au kupoana.” 4 Mewali Bilha nawei mpuumi i tobalilona, pane napoluhimi. 5 Bara mahae hangko indo, mantimi mpuumi Bilha, hai moanami hadua tobalilo. 6 Nauli Raheli, “Pue Ala mopakanotomi kadangku masala. Napehadingimi pamperapiku, hai Naweimona hadua anangkoi tobalilo.” Ido hai anangkoi iti nahanga Dania 7 Roo indo, Bilha mantimi mbulimi, hai moanami hadua tobalilo. 8 Nauli Raheli, “Kupari-pari mpuu monangi wutungku, ido hai menangina!” Ido hai anangkoi iti nahanga Naptali.b 9 Naisa Lea kadanapi ina moana, ido hai nakirami Silipa hawina napoluhi Yako. 10 Bara mahae hangko indo, moanami Silipa hadua tobalilo. 11 Nauli Lea, “Morasina!” Ido hai anangkoi iti nahanga Gad.c 12 Roo indo, moana mbulimi Silipa hadua tobalilo. 13 Hai nauli Lea, “Rumihi kamatanangku! Ide-ide ope-ope towawine ina mouliangaana, ikomi au matana.” Idomi hai anangkoi iti nahanga Aser.d
14 I tempo pepare, Rube lao molulumao i pada, hai molambi hampaka tuda-tuda au rapopopakulii tauna bona moana, hai pakuli iti naantia inana. Nauli Raheli i Lea, “Nuwei worina haodi pakuli au nalambi anamu.”
15 Mehana Lea, “Bara mani pae nupohandaka moalako tobalilongku? Hai ide ina nupetandaka mbuli moala pakuli au nalambi anangku!”
Nauli Raheli, “Ane nuweina pakulina anamu, i wengi ide peisako moluhi hai Yako.”
16 Kalumbami, mesulemi Yako hangko i pada, nadupa Lea hai nauliangaa, “Moluhike i wengi ide, lawi roomi kubaiari hai pakuli au nalambi anangku.” Mewali, i wengi iti, Yako moluhimi hai Lea.
17 Mantimi mbulimi Lea, lawi napehadingimi Pue Ala pekakaena, pane moanami hadua tobalilo au kalimana. 18 Nauli Lea, “Naweimona Pue Ala hurungina, lawi kukirami Silipa i tobalilongku.” Ido hai anangkoi iti nahanga Isakar.e 19 Roo indo, mantimi mbulimi Lea, hai moanami hadua tobalilo au kainina. 20 Nauli Lea, “Naweimona Pue Ala parasee au merae. Ide-ide ina naadaimona tobalilongku, lawi inimi anangku paka tobalilo.” Idomi pongkana anangkoi iti nahanga Sebulo.f 21 Roo indo, moana mbulimi Lea hadua towawine, hai anangkoi iti nahanga Dina.
22 Hangko inditi, Pue Ala mokatuinaomi Raheli, hai Napehadingimi pekakaena. Ido hai Nabungkahiami rara bona moana. 23 Roo nodo, mantimimi Raheli hai moanami hadua tobalilo. Mololitami Raheli, nauli, “Naingihimi Pue Ala kamaeangku. 24 Kuperapi bona natambaia mbulina Pue Ala anangku tobalilo.” Ido hai anangkoi iti nahanga Yusupu.
Pinatuwona Yako tetambai
25 Karoona Yusupu rapoanaka, nauli Yako i Laba, “Metompamona mesule i boeangku. 26 Nupaliumona padu hihimbela hai rodua towawinengku hai anangkuhe, sarongkuhe mobago irio. Uma, nuisato karumihina pobagongku irio.”
27 Nauliangaa Laba, “Pehadingi hampai lolitangku ide: kuperapi bona ikamu maida liliukau inde hai mobagoko iriko. Kuisa anti kaoiona nawatina Pue, lawi medodina. 28 Mewali, nupakanotoamona saromu; bahahangkia au nuperapi, ina kuweiko.”
29 Mehana Yako, “Uma, oio haduduamu moisa karumihina pobagongku irio duuna tetambai mpuu binatamu, lawi iko au mokadipurahe. 30 Hangko damanina hawe inde, pinatuwomu bara manihe bosa, agaiana anti kaikona Pue mowatiko duuna mewaliko tauna au pebuku. Agaiana noumbamongkai ikami? Ide-ide hangangaa mampobagoana towawinengku hai anangkuhe.”
31 Nauli Laba, “Mewali, apami au kuweiko?”
Mehana Yako, “Ineemona nuwei ba apa-apa. Ane mobago manina irio mokadipura binatamu, batena hampaka ide au kuperapi: 32 alo ide, nupaliuna moala ope-ope ana dimba au maeta hai ope-ope towau au loba ba au betuke, iti peami au mewali sarongku. 33 I bokona ina tongawa kamanotongku. Ane nuparesa binatangku hai nulambi hambaa dimba au bara maeta ba hambaa towau au bara loba ba betuke, ina nuisa kakupanangkana.”g
34 Mehana Laba, “Kupokana lolitamu iti.” 35 Mewali i alo iti, Laba mopatanimi ope-ope towau laki au mobati-bati ba loba hai ope-ope towau lundara au loba hai betuke, hai napatani wori ana dimba au maeta. Roo nodo, napohawaamohe anana moeri pinatuwo iti. 36 Hangko indo, padumohe Laba hai anana lao moanti ope-ope binatana Yako au rapatanimi duuna karaohe hangko iria, kakaraona talu alona polumaonda.
Pentarana iti iami towau hai dimbanahe Laba au nakadipura Yako.
37 Hangko indo, naalami Yako talu pakana daangkau au mata iami: kau hawar, kau badam, hai berangan, hai nakolisi bona mobati-bati. 38 Kau iti nawoli i paenuanda dimba hai towau bona raita ane maihe maenu, lawi i temponda maenu raunde motowawine. 39 Mewali ane towau ba dimba motambi molindo kau au nakolisi iti, mopaara ananda au mobati-bati ba au betuke ba au loba, 40 hai pinatuwo iti napatanihe Yako mewali kirana.
I olonda dimbana Laba ara mani au mobati-bati hai au maeta. Ane ina motowawinehe, dimba au ntanina napopombelindohe. Nodomi kanababehina Yako bona tetambai dimbana, hai dimbana iti napatani hangko i dimbana Laba.
41 Ane pinatuwo au marudu ina motowawinehe, naalami Yako daangkau au nakolisi nawoli i paenuanda. 42 Agaiana ane pinatuwo au maduhu ina motowawinehe, bara nababehi nodo. Mewali, pinatuwo au maduhu iti mewali kirana Laba, hai pinatuwo ntanina au maroho mewali kirana Yako. 43 Nodomi kanababehina Yako duuna mewali pebuku ntepuu. Ngkaiami towauna hai dimbana, nodo wori ontana, kalidena, hawina tobalilo hai hawina towawine.