Yako i souna Laba
29
1 Hangko indo, Yako mopaliliumi polumaona lao ntanda i Mata alo tampo Kanaa. 2 I polumaona, moita haogu tibubu i pada au ratabungi watu mahile. Ara wori talu tobuna dimba au moluku hungku i tibubu iti, lawi inditimi paenuanda. 3 Ane tegulumohe ope-ope dimba inditi, rakowami toporewu watu petuko tibubu iti pane mopaenuhe dimbanda. Roo indo, tibubu iti ratuko hule.4 Mekune Yako i toporewu iti, nauli, “Halalu, hangko iumbakau mai?”
Mehanahe, “Hangko i Haran.”
5 Napekune mbulihe, “Ba niisato pae Laba, ampuna Nahor?”
Rauli, “Kiisato.”
6 Kaliliuana, nauliangaahe, “Maroa-roato pae?”
Mehanahe, “Maroa-roato. Peita, olouto mai anana moeri dimbana, hangana Raheli.”
7 Nauli mbuli Yako, “Ide-ide, pualo mani, bara mani temponda dimba ragulu hai rapopesua i gimpu. Agina nipaenuhe hampai; roo indo, niporewu hulehe i pada.”
8 Agaiana mehanahe, rauli, “Iti bara mani peisa kipobago, ane bara manihe tegulu tobu-tobuna dimba. Ane tegulumohe ope-ope, kikowami watu petuko tibubu iti, hangko mopaenuringkai dimbaki.”
9 Tangana mani Yako mololita hai ihira, hawemi Raheli moanti dimba nodo biasana. 10 Kanaitana Yako kahawena Raheli anana Laba moeri dimbana, laomi i tibubu mohungkaki watu petuko tibubu iti, hai mopaenuhe dimbana Laba, pinoumana. 11 Hangko indo, liliu Yako moangki Raheli, hai moteria masisimbuku. 12 Indomi, nauliangaa, “Iko ide, ananana Ribeka, adina umamu.” Melangkami Raheli mesule i souna, lao napololita i umana.
13 Kanahadina Laba kahawena Yako pinoanana, hoholigami lao napombelambia. Liliu nakalapui, naangki hai naanti lao i souna. Karoona Yako motuntu hinangka au mewali, 14 Nauliangaa Laba, “Tou-tou ikita ide hawahe-waheke.”
Yako mobago i Laba bona mampotambia anana Laba
Hambulami kamahaena Yako maida i Laba, 15 mololitami Laba iria, nauli, “Bara wori maroa ane mobago mbero peako iriko, nauri mohalaluke. Hangkiami pangulimu ane kuweiko saromu?”
16 Laba ara anana rodua anantowawine. Au towutu, hangana Lea, hai au toadi, hangana Raheli. 17 Lea membalu matana, agaiana Raheli makara mpuu lenggena.
18 Yako mampokaelu Raheli, ido hai mololita i Laba, nauli, “Uma, mauna mobago irio pitu parena bona anamu Raheli kupotambia.”
19 Nauli Laba, “Maroa maniri oio au kuwei pane tauna ntani. Maidamoko iriko.” 20 Mewali mobagomi Yako pitu parena, agaiana pitu parena iti nahadi nodo pea bahangkia alona, lawi rumihi pampokaeluna Raheli.
21 Roo indo, mololitami Yako i Laba, “Nuweimona anamu au ina mewali sambokongku, lawi hopomi tempona pobagongku.” 22 Pane nakakio Laba ope-ope tauna au maida hungku iria bona mopaara susa mahile hai maande sambelahe. 23 Agaiana i kaindi iti, Laba moala Lea, hai naanti i Yako bona napoluhimi. 24 Hai Silipa hawina Laba nawei i Lea mewali hawina.
25 Agaiana madondona, naita Yako Leari. Ido hai Yako mololita i Laba, “Moapari hai nodo babehiamu iriko? Bara pae mobagomona bona nuweina Raheli? Moapari hai nupakanawona?”
26 Mehana Laba, nauli, “Moula adangki, anangki au toadi bara peisa mampehindorungi wutuna motambi. 27 Nupahanda hampai pitu alona susana potambimi ide, hangko kuweiriko Raheli asala mobago mbuliko pitu parena iriko.”
28 Lolitana iti napokana Yako, hai hopomi pitu alona posusa petauna, Laba mokirami Raheli naposamboko Yako. 29 Hai Bilha hawina Laba nawei i Raheli mewali hawina. 30 I tempo iti, Yako mamposambokomi Raheli, hai napokakaia mpuu hangko i Lea. Roo indo, mobago mani pitu parena i Laba.
Ananahe Yako
31 Naita Pue, Lea bara gaga napokakaia tobalilona, ido hai Nawati bona moana, agaiana Raheli lalo. 32 Mewali, mantimimi Lea hai moana hadua tobalilo, nauli, “Naitami Pue kamaparingku. Ide-ide ina napokakaiana tobalilongku.” Anana iti nahanga Rube.a 33 Mantimi mbulimi Lea, hai moanami hadua tobalilo, ido hai nauli, “Tou-tou mpuu Pue moisa kadangku napokakaia tobalilongku, ido hai moana mbulina hadua tobalilo.” Mewali nahanga anangkoi iti Simeo.b 34 Mantimi mbuli Lea, hai moanami hadua tobalilo, nauli, “Ide-ide tobalilongku ina mentakami laluna iriko, lawi moanamona talu tobalilo.” Idomi pongkana anana iti nahanga Lewi.c 35 Hangko indo, mantimi mbulimi Lea, hai moanami hadua tobalilo, nauli, “Hambela ide, motoiana Pue.” Idomi pongkana anana iti nahanga Yehuda.d Roo indo, Lea barapi moana.