28
1 Hangko indo, Isaki mokakio Yako, pane nawati hai nauliangaa, “Ineeko mamposamboko to Kanaa. 2 Aginari laoko i Padan-Arama i souna Betuel umana inamu, hai nuposamboko hadua anantowawine anana Laba, pinoumamu. 3 Taperapi i Pue Ala au makuasa bona Nawatiko i posambokomu duuna bosa anamu hai ampumu hai bona pemuleamu iti mewalihe toiorunda ngkaia kadatua. 4 Taperapi wori bona Pue Ala mowatiko hawe-hawe i pemuleamu bona tampo ide nipososora moula dandina Pue Ala hangkoia i Burahima umangku. Ide-ide maida manike nodo torare inde, agaiana i alo au ina mai, tampo ide ina mewali tampomi.” 5 Roo nodo, Yako napopeangkami umana lao i Padan-Aram i Laba, anana Betuel, to Aram iti. Laba iami wutuna Ribeka, inanda Yako hai Esau.Esau motambi hule
6 Hangko indo, nahadimi Esau apa au nauli umana i tempona mowati Yako. Mewali naisami, Yako natudu umana lao i tampo Padan-Aram bona mohaoki sambokona inditi, hai kanakontona umana mamposamboko to Kanaa. 7 Naisa worimi Esau pengkoruna Yako i hawanda tosaena hai kapaduna lao i tampo Padan-Aram. 8 Kahopoana, tongawami i Esau kadana naunde umana, towawinena lawi to Kanaahe. 9 Ido hai laomi Esau i Sumaila, anana Burahima, bona mampotambia Mahalat, anana Sumaila. Mahalat iti iami adina Nebayot.
Pangipina Yako i Betel
10 I tempo iti, melingkami Yako hangko i boea Barseba lao i boea Haran. 11 Tampumi alo, hawemi i hambua paidaa hai mohambengi inditi. Naalami haogu watu napolonga hai maturumi. 12 Bara mahae hangko indo, mangipimi. I lalu pangipina, moitami hambua tuka au meangka hangko i tampo hawe i langi. I tuka iti, moita malaekana Pue Ala mendaulu mengkahehe. 13 I hola tuka,b meangkami Pue hai mongkora, Nauli, “Ikomi Pue, Pue Ala au napenombai Burahima totuamu hai au napenombai Isaki, umamu. Tampo pohabengiamu ide, ina kuweiko hawe-hawe i pemuleamu. 14 Ina kupabosa pemuleamu nodo kangkaiana awu tampo, hai ina moembahihe ngamba ntanda i Mata alo, ntanda i Katampua alo, ntanda i Raa hai ntanda i Lau. Anti kaoiona hai pemuleamuhe, ope-ope tauna i wongko dunia ina molambi wati. 15 Iko ina mamporangaiko hai mokampaiko iumba pea kalaoamu, hai ina Kuantiko mesule i tampo ide, lawi Kuporangai liliuko hai ina Kupabukei ope-ope au Kudandiamoko.”
16 I kapehadina Yako kaindi iti, nauli laluna, “Hangko kuisari Pue tou-tou mpuu ara i paidaa ide.” 17 Liliu langa, pane nauli, “Melangaki mpuu paidaa ide! Tongawami ide souna Pue Ala; idemi baba suruga!”
18 Kahalona madondo-dondo, Yako mangalami watu au napolonga inona, pane nahua hai nabumbuhi hai lana saitun bona mewali watu pepopainga kamampatongawana Pue Ala iria. 19 Paidaa iti nahanga Betel.c (Hangkoia wanua iti rahanga Lus.) 20 Indo, mosumpami Yako i Pue Ala, nauli, “Ane Nuporangaina hai Nukampaina i polumaongku ide, hai Nuweina paandeku hai hampiku, 21 hai Nuanti hule maroana i souna umangku, Oio ina mewali Ampuku, hai batena Oio au kupenombai. 22 Hai ina kukira Irio hangkira hampulo hangko i ope-ope anu-anungku au Nuweina. Hai watu pepopainga au kuaro ide ina mewali penombaa Irio.”