Isaki mowati Yako
27
1 Saemi Isaki hai wurami matana, mokakiomi Esau anana au towutu, hai nauliangaa, “Anangku.”Mehana Esau, “Apari, uma?”
2 Nauli Isaki, “Nuitatona dide, saemona, tuwongku barapi mahae. 3 Nualami panamu, hai laona nupoahua i pada. 4 Ane arami rasimu, nudakaana maroa-roa moula peundeaku. Lawi ane roona maande, ina kuwatiko hangko damanina mate.”
5 Pololitanda Isaki hai Esau iti nahadi Ribeka. Kapaduna peami Esau lao moahu, 6 liliu nauli Ribeka i Yako, “Inona kuhadi lolitana umamu i Esau. Ia motudu Esau 7 lao moahu bona ane ara rasina, nadaka maroa-roa hai naantia umami naande. Ido hai nauli nodo, lawi ara tunggaiana mowati wutumu i lindona Pue hangko damani umami mate. 8 Anangku, pehadingi maroa-roa bona nubabehi apa au kuuli ide. 9 Laomide ala rombaa ana towau au marudu bona kudakaa umamu moula peundeana. 10 Roo indo, nuantia umamu naande bona ane roo maande, ina nawatiko hangko damani mate.”
11 Agaiana nauli Yako irinana, “Noumbami, lawi watana Esau mowulu; iko bara? 12 Ane napererana hai naisa kakudongkokina, barari pewati au ina naweina agaiana pehukuri!”
13 Mehana inana, “Inee nupokarao inao, anangku. Ikorai au mohuru pehuku iti. Nubabehi peami apa au kuuli ide: Laomoko moala towau iti.” 14 Mewali, laomi Yako mangala towau iti hai naantia inana pane nadaka Ribeka hintoto hai peundeana tobalilona. 15 Hangko inditi, naalami Ribeka hampina Esau au makara nawaruia Yako. 16 Tambolona hai taiena Yako bara mowulu. Ido hai nawewehimi hai koli ana towau. 17 Roo indo, naweimi halo bau hai roti au nadaka bona lao naantia umana.
18 Laomi Yako i umana nauli, “Uma.”
Mehana Isaki, “Io, hemako? Esau ba Yako?”
19 Mehana Yako, “Ikomi Esau, anamu au towutu. Uma, apa au nuhawaana inona, kubabehimi. Mearomoko hai mohudamoko. Nuandemi ide rasingku moahu bona rooko maande nuwatina.”
20 Nauli Isaki, “Anangku, moapari hai holiga gaga porasimu?”
Mehana Yako, nauli, “Pue au nupenombai, Iami au motulungina.”
21 Nauli Isaki i Yako, “Maiko hungku-hungku. Ina kupererako bona kuisa ba tou mpuuko Esau.” 22 Yako mohungkukimi umana hai napererami umana. Liliu nauli umana, “Ane wotumu, nodo wotuna Yako, agaiana taiemu, taiena mpuumi Esau.” 23 Bara naisa Isaki kaYakona lawi taiena mowulu nodo taiena Esau. Ina mowatimi Yako, 24 napekune mani iria, nauli, “Tou mpuu pae oiomi Esau?”
Mehana Yako, “Tou.”
25 Nauli Isaki, “Weina mai iti bau. Ane roona maande, hangko kuwatiriko.” Yako moweimi bau iti naande umana, hai nawei anggoro naenu. 26 Pane roo maande, nauli umana iria, “Anangku, maiko hungku-hungku hai nuangkina.” 27 Mehungkukimi Yako hai meangki. I tempo iti, naengami Isaki hampina pane nawati, nauli,
“Mawongi engana anangku,
nodo enga pada au nawati Pue.
28 Pue Ala ina mopatoa langalo hangko i langi,
bona marudu tuda-tuda i bondemu.
Ia ina mopangkaia paremu,
hai motambai wuana anggoromu.
29 Tauna hangko i ngkaia kadatua ina mewalihe hawimu,
hai bosa tauna au ntanina ina mengkoruhe irio.
Oiomi au hangangaa makuasa i halalumu,
hai pemuleana inamu hangangaa mengkoruhe i lindomu.
Tauna au mampopeahi-ahiko ina molambi pehuku,
hai tauna au mowatiko ina molambi pewati.”
Esau merapi nawati Isaki
30 Karoona pea Isaki mowati Yako, Yako liliu padu. Bara mahae hangko indo, hawemi Esau hangko i poahuana. 31 Ia wori modaka paande au matama, pane naantia umana, nauli, “Uma, mearomoko bona nuande ide bau poahungku hai bona nuwatina.”
32 Napekune Isaki, “Hemako?”
Mehana Esau, “Iko, Esau, anamu au towutu.”
33 Rumihi katingkarana Isaki, ido hai morada-rada watana, pane napekune, “Ane nodo, hemari topoahu au maimona narora inona? Hangko damaniko hawe, roomona maande bau au naantiana. Iami au kuwati, hai pewati iti mewalimi kirana hawe i hae-haena.”
34 Kanahadina Esau lolitana umana, rumihi poteriana anti kamasusana laluna, pane nauli, “Uma, nuwati worina!”
35 Nauli Isaki, “Adimu au mai modongkokina, iami au moala pewati au katouana hangangaa kuweiko.”
36 Nauli Esau, “Hintoto mpuu karahangana Yako,a lawi ide karombelangkumi nadongkoki. Nguru-nguruna narampaki katowutungku, hai ide-ide narampaki mbuli pewati au ina nuweina. Ba ara mani pewati au ina nuweina?”
37 Mehana Isaki, “Ia kupopewali nodo ampumu, hai ope-ope halaluna mewalihe hawina, hai kupangkaiami pare hai anggorona. Anangku au kupokakaia, barapi ara au peisa kuuli irio.”
38 Agaiana merapi mbulimi Esau i umana, nauli, “Uma, opemi pae pewatimu? Hangangaa ara mani pewati au peisana nuwei.” Roo indo, ia moteria masisimbuku.
39 Mehana Isaki, nauli:
“Paidaamu ina karao
hangko i langalo au toa hangko i langi,
hai karao hangko i tampo au marudu.
40 Hangangaa nupake liliu pihomu datiko rapapate,
hai ina mewaliko hawina adimu.
Agaiana ane nuewa liliu,
ina tekabahako hangko i kuasana.”
41 Koi ntepuumi inaona Esau i Yako, lawi ia mohalaki pewatina umana iria. Nauli laluna, “Barapi mahae ina matemi umangku. Ane liumi pokalentorana deade, Yako, hangangaa kupapate.”
Yako meloho lao i Laba
42 I kanahadina Ribeka tunggaiana Esau, ia mokakiomi Yako, nauliangaa, “Kuhadimi tunggaiana wutumu. Nahaokiko napapate. 43 Mewali nupeulai apa au kuuliangaako. Holigako padu lao i souna wutungku Laba i boea Haran. 44 Maida-idako iria bahangkia kamahaena, alana liu karumpuna wutumu. 45 Ane naliumi inaona babehiamu iria, ina kubambariako bona mesuleko inde. Au kupokalanga i lalu hangalo pea, ikamu ina mombepapatekau.”
46 Bara mahae hangko indo, nauli Ribeka i Isaki, “Honggoa lalungku moita towawine to Heti, sambokonahe Esau iti. Ane Yako mamposamboko wori anantowawine to Heti, agingkumi mate!”