Isaki hai datu Abimele
26
1 Hawe mbulimi rimi i tampo iti, nodo rimi au mewali i tempona mani Burahima tuwo. Ido hai Isaki lao i Abimele datunda to Pelisiti i wanua Gerar, metompa bona maidahe inditi. 2 Ia maida inditi lawi Pue mopatongawa wataNa iria, Nauli, “Ineeko lao i tampo Masiri. Maidamoko i tampo ide moula hawaNgku irio. 3 Ane nubabehi nodo, ina Kuporangaiko hai ina Kuwatiko inde, lawi humalele tampo ide ina Kuweiko hai i pemuleamu moula dandiKu au Kupahawemi i umamu Burahima. 4 Ina Kupabosa pemuleamu nodo kangkaiana betue i langi, hai humalele tampo ide ina Kuweihe. Anti kaihirana, ope-ope tauna i wongko dunia ina molambi wati. 5 Ope-ope iti ina Kubabehi, lawi Burahima mampeulaimi ope-ope hawaNgku.”6 Mewali, Isaki maidami i Gerar. 7 Hambela tempo, mekunemohe tobalilo au ara inditi kana i Ribeka. Mehana Isaki, nauli, “Ia ide adingku.” Ido hai nauli nodo, lawi langa ina rapapate tauna inditi au mampeinao moala towawinena anti kamakarana. 8 Mahaemohe maida inditi, datu Abimele tingkara moita Isaki hangko i sungkeke tanganda mombepokakaia hai Ribeka. 9 Ido hai mokakiomi Isaki, nauli, “Bara pae sambokomu towawine iti? Moapari hai nuuli adimu?”
Mehana Isaki, “Lawi kupekiri, hangangaa rapapatena ane kuuli sambokongku.”
10 Nauli Abimele, “Moapari hai nubabehi nodo irikami? Masalako! Ane rapana ara taunangku au mampoluhi sambokomu, oiomi au mopaara kamasalangki!” 11 Hangko inditi, datu Abimele mampopaingaa taunana, nauli node, “Hema pea au mosisilakai tauna ide ba towawinena, hangangaa rahuku mate.”
12 I pare iti, laomi Isaki mohawu tinuda i bondena. Mewali mpuu powiana, lawi nawati Pue. Polambiana hangatu belana kangkaiana hangko i hinawuna. 13 Katetetambaiari anu-anuna, duuna pebuku ntepuu. 14 Bosa mpuuhe hawina, dimbana hai japina. Ido hai mahinahe to Pelisiti iria, 15 pane ope-ope tibubuna lao ratabungi hai tampo. Tibubu iti au rakae hawina Burahima hangkoia.
16 Hangko inditi, nauli Abimele i Isaki, “Padumoko hangko i tampoki ide, lawi makuasa gagamoko irikami.” 17 Mewali padu mpuumi Isaki, hai melimbami i lembo Gerar. Mahae haodi ia maida inditi. 18 Ope-ope tibubu au nakae Burahima hangkoia hai au ratabungi to Pelisiti nakae hulemi Isaki. Hai tibubu iti nahanga moula hanganda au napatokami umana hangkoia.
19 Tanganda hawina Isaki mokae tibubu i lembo Gerar, molambimohe owai tumbu. 20 Agaiana mombeheherihe toporewunda to Gerar hai toporewuna Isaki, rauli, “Owai ide ikami ampuna.” Ido hai tibubu iti nahanga Isaki, Esek.a
21 Roo indo, hawina Isaki mokae mbulimohe tibubu au hambuana, agaiana ara worihe tauna au mai mampobungkaa hawina Isaki. Ido hai tibubu iti nahanga Isaki, Sitna.b 22 Hangko inditi, melimba mbulimohe mokae tibubu au kataluna. Hambela ide barapi ara posisala. Ido hai tibubu iti nahanga Isaki, Rehobot,c nauli, “Ide-ide Pue mampogiangaamoke maida i tampo au maemba ide duuna bosa pemuleanta hai maroa katuwonta.”
23 Hangko indo, melimba mbulimi Isaki, i boea Barseba. 24 I kaindi iti, Pue mampatongawa i Isaki hai mongkora, Nauli, “Ikomi Pue Ala au napenombai umamu Burahima. Ineeko langa, lawi ina Kuporangaiko. Ina Kuwatiko hai Kuweiko pemuleamu au bosa moula dandiKu i umamu au mengkoru Iriko.” 25 Mewali, Isaki moaromi hambua pohuwea popenomba, hai menomba i Pue. Inditi wori ia moaro bambaruna, hai hawina mokae mbulimohe tibubu.
26 Hangalo, maimi datu Abimele hangko i Gerar mampombelambia Isaki. Au meula iria iami Ahusat topepaturona hai Pikol tadulako surodadona. 27 Mekunemi Isaki, “Moapari hai maina nipombelambia, moleri hangkoia nipoiwalina hai niwurana hangko i tampomi?”
28 Mehanahe rauli, “Kiisato oio naporangaiko Pue. Mewali kipepekiri, agina mopaarake pototowia. Mosumpako 29 bona datiko mobabehi dake irikami, lawi bara woringkai mobabehi dake irio. Hai nuisa mpuu kamaroana lalungki irikamu. Hangkoia kipopeangkakau hangko i tampoki, hai i tempo iti, barangkai mobabehi dake irikamu; kipogiangaakau padu hangko irikami i lalu roa ngkatuwo. Hai ide-ide nawatiko Pue.” 30 Roo indo, naposusaimohe Isaki, napaandehe hai napaenuhe. 31 Kahalona madondo-dondo, mopaaramohe pototowia. Karoonda mosumpa, datu Abimele hai rangana napopelingka maroahe Isaki.
32 Alo iti wori, hawina Isaki maihe mampetumbui kaaranami owai au rahumba i tibubu au hangko rakae. 33 Pane nahanga Isaki tibubu iti Seba.d Hai mepongka indo, boea iti rahanga Barseba.e
Sambokonahe Esau