Pemuleana Burahima hangko i Ketura
25
1 Burahima motambi mbulimi hai hadua towawine, hangana Ketura. 2 Anana Burahima au napoanaka towawine iti, iami: Simran, Yoksan, Medan, Midian, Isbak hai Sua. 3 Yoksan mopaara Seba hai Dedan, hai pemuleana Dedan iami to Asur, to Letus hai to Leum. 4 Midian mopaara: Epa, Eper, Heno, Abida hai Elda. Ope-ope tauna iti tepesua pemuleana Ketura.5 Ope-ope anu-anuna Burahima napososora Isaki, 6 agaiana hangko nakatuwo-tuwoi mani, nakiraia worimohe ananda towawinena au natenda, hai natuduhe melimba ntanda i Mata alona tampo Kanaa bona karaohe hangko i Isaki.
Kapatena Burahima hai karatawuna
7-8 Katuwona Burahima maroa hai matinuwu. Handami hangatu pitu pulona hai lima parena tinuwuna, hangko materi. 9 Isaki hai Sumaila motawuhe watana umanda i lia watu Mapela i halimbo bonde ntanda i Mata alona Mamre. Hangkoia bonde iti Epron ampuna. (Epron iti iami anana Sohar, to Heti.) 10 Agaiana kahopoana, tampo iti naholomi Burahima. Inditi worimi, Sara towawinena Burahima ratawu. 11 Matemi Burahima, Pue Ala mowati Isaki, anana. I tempo iti, Isaki maida hungku i tibubu Lahai-Roi.
Pemuleana Sumaila
12 Sumaila iami anana Burahima hangko i Hagari au mewali hawina Sara hangko i tampo Masiri. 13 Sumaila mopaara hampulo hai rodua anana. Idemi hanganda moula pombeusuna karapoanakanda: au towutu Nebayot, au kadua Kedar, pane Adbeel, Mibsam, 14 Misma, Duma, Masa, 15 Hadad, Tema, Yetur, Napisi hai au totoadi iami Kedma. 16 Ananahe Sumaila ide mewalihe toiorunda hampulo hai rontina. Boeanda hantina-hantina rahanga moula hanganda anana. 17 Handami tinuwuna Sumaila hangatu talu pulona hai pitu parena, hangko materi. 18 Pemuleana ide,a maidahe i olo tampo Hawila hai Sur ntanda i Mata alona tampo Masiri mototoi tampo Asur. Ihirami au moewa pemuleana Burahima au ntanina.
Karapoanakana Esau hai Yako
19 Idemi tuntukana Isaki, anana Burahima. 20 Handami tinuwuna Isaki iba pulona parena, motambimi hai Ribeka, adina Laba anana Betuel. Betuel iti, hadua to Aram au maida i tampo Padan-Aram. 21 Bahangkiami kamahaena hangko indo, Ribeka bara mani moana. Ido hai napekakaea Isaki, hai pekakaena iti napehadingi Pue, mewali mantimi mpuumi Ribeka. 22 Au nakantimia iti, anangkoi au moropa. Hangko damanihe mesupa, mombesunggi-sunggimohe i lalu taina. Nauli Ribeka, “Moapa hai node pewalina i watangku?” Ido hai merapi paturo i Pue.
23 Nauli Pue iria:
“Au nukantimia iti
iami rontina au mombepoiwali.
Maroho mani adina pane wutuna.
Au towutu ina mengkoru i adina.”
24 Hawemi tempona Ribeka moana, mesupami rodua tobalilo. 25 Au towutu lenggena malei-lei, hai mowulu watana. Ido hai rahanga Esau.b 26 I pesupanda, anana au toadi taiena mokingki tangkadona Esau. Ido hai rahanga Yako.c I karapoanakanda toporopa iti, tinuwuna Isaki inimi pulona parena.
Esau mampobalu katowutuna
27 Kamahae-haea, kamahile-hileahe anangkoi rodua iti. Esau mapande moahu, hai naunde maida-ida i pada. Yako manara poantina, hai naunde pea maida-ida i sou. 28 Isaki mampokakaia Esau lawi naunde moande rasina Esau moahu, agaiana Ribeka mampokakaia Yako.
29 Hambela tempo, tangana Yako modaka tambue malei, hawemi Esau hangko i poahuana, hai rumihi kamarimina. 30 Nauli Esau i Yako, “Nuwei wongkoia haodi tambue malei au nudaka iti. Marimi mpuuna dide!” Idomi pongkana pane rahanga wori Edom.d
31 Mehana Yako, “Peisatoko kuwei, agaiana hangangaa nupalimba hampai katowutumu iriko.”
32 Nauli Esau, “Apa bunduna katowutungku, pane mateohona?”