Ribeka napepambolii Isaki
24
1 Bahangkia kamahaena hangko indo, sae ntepuumi Burahima, hai ia nawati Pue i paka-pakana. 2 I tempo iti, mololitami Burahima i hawina au tepoinalai au mokadipura ope-ope anu-anuna, nauli, “Woli taiemu i patongke paangku, 3 hai mosumpako i lalu hangana Pue, Pue Ala au ampu tampo hai langi hai hinangka ihina bona datiko mohaokia anangku Isaki towawinena i tampo Kanaa ide. 4 Aginari laoko i tampo kabubuana wahengku, hai nuhaoki hadua anantowawine i olonda tinangku au ina napotambia anangku Isaki.”5 Mekune hawina iria, nauli, “Ampu, noumbami ane towawine iti bara mau mopalehi souna, hai bara mau meula iriko mai inde? Ba peisa kuanti peami anamu lao i tampo kabubuana wahemu?”
6 Agaiana nahanai Burahima, nauli, “Inee hawe nuanti anangku lao indo! 7 Pue, Pue Ala, ampu langi, Iami au moantina hangko i souna umangku hai hangko i tamponda halalungku, hai mosumpami iriko node: ‘Pemuleamu ina Kuwei tampo ide.’ Mewali, Ia wori ina motudu malaekaNa moniniko bona nuhumba hadua anantowawine au hintoto napotambia anangku. 8 Agaiana ane anantowawine iti bara mau meula irio mai inde, oio tekabahamoko hangko i posumpamu. Kehapimi noumba, bara peisa anangku nuanti lao indo.” 9 Hangko indo, hawi iti, mowolimi taiena i patongke paana Burahima, hai mosumpa ina mampeulai awilina ampuna.
10 Roo nodo, hawi iti moalami hampulo baana onta hai anu-anuna ampuna au masuli, hai liliu meangka lao i boeana Nahor i tampo Aram-Mesopotamia. 11 I kahawena inditi, kalumbami, tempondami towawine lao mantambu i tibubu. I tempo iti, napopengkaroomohe ontana i raoa boea hungku i tibubu. 12 Roo indo, mekakaemi hawi iti, nauli, “Pue au napenombai ampuku Burahima, Nutulungi wongkoia bona alo ide tepabukei tunggaiaku. Nupatongawa ahiMu i ampuku Burahima. 13 Nuitana meangka i hola tibubu ide. Barapi mahae anantowawine hangko i boea ina maimohe mantambu i tibubu ide. 14 Mewali, ane hawe hadua anantowawine, ina kuuliangaa: ‘Tulungina, popendaulu mai gumbamu bona maenuna.’ Ane nahanaina node: ‘Paenumide, hai ope-ope ontamu ina kupaenu’, ina kuisa kaianami au Nupilei bona napotambia Isaki au mengkoru Irio, hai ina kuisa wori kamaahiMu i ampuku Burahima.”
15-16 Tangana mekakae, unga pea hawe hadua anantowawine au makara au bara mani moisa tobalilo, hangana Ribeka. Ribeka iti, anana Betuel, hai tosaena Betuel iami Milka hai Nahor, wutuna Burahima. I tempo iti, Ribeka mohompo gumbana monontohi tibubu. Kahawena i tibubu, naihiimi gumbana hai molumao ina mesule. 17 Hawina Burahima melangkami hoholiga lao mohungkuki anantowawine iti, hai nauliangaa, “Kuperapi nuweina owai haodi hangko i gumbamu bona kuenu.”
18 Mehana Ribeka, nauli, “Tua, paenumide.” Napopendaulu hoholiga gumbana hangko i owangana, hai mopaenumi hawi iti.
19 Karoona hawi iti napaenu, mololitami anantowawine iti iria, nauli, “Tua, kupaenu worihe ide ontamu duunda baha.” 20 Hangko indo, hoholigami mampotau owai napopoihii dula, napopopaenuhe onta. Roo nodo, melangka mbuli lao i tibubu moihii gumbana, hai napaenuahe onta iti duunda baha. 21 Hawina Burahima mokamata ngkandii apa au nababehi anantowawine iti, lawi napeinao moisa babila Pue mopabukei mpuu tunggaiana ampuna.
22 I karoonda ope-ope onta iti maenu, hawina Burahima moalami dali bulawa hai roogu kala bulawa, 23 pane mekune, nauli, “Hema umamu? Ba peisana mohambengi i soumu hihimbela hai rangangkuhe?”
24 Mehana Ribeka, nauli, “Umangku Betuel, ananda Nahor hai Milka. 25 Tua, i soungki arato pohambengia, hai ara wori paande binata.”
26 Roo indo, motumpami hawi iti menomba i Pue, nauli, 27 “Kutoiako Pue, Pue Ala au napenombai ampuku Burahima. Tongawami ahiMu au bara mokahopoa i ampuku! Oio au moninina panena hawe i halaluna inde.”
28 Hangko inditi, melangkami Ribeka lao i souna inana, hai napololitami apa au mewali. 29-30 Inditi ara wori Laba, Wutuna Ribeka. Kanahadina Laba lolitana adina iti hai kanaitana dali iti hai kala bulawa i taiena adina, liliu mesuwu hangko i sou lao mogagu hawina Burahima au tangana meangka hai ontana hungku i tibubu. 31 Nauli Laba, “Tua, nawatiko Pue. Ineeko inde i raoa. Maiko laoke i soungki. Kipatimamami lincu au ina tapaidai, hai kipasilolonga worimi paidaanda ontamu.”
32 Mewali, meulami hawina Burahima i Laba. Kahawenda i sou, Laba motaurami antianda onta, hai moalami hehi napaandeahe. Roo indo, naalami owai pobahoia bitina hawi iti hai ranganahe. 33 Roo nodo, rahuhuamohe paandenda, agaiana hawina Burahima mololita, nauli, “Barana mau maande ane bara mani kupahowa lolita au kuanti.”
Nauli Laba, “Maroa ane nupololitami.”
34 Mewali, mepongkami hawi iti mololita, nauli, “Ide iko hawinana Burahima. 35 Ampuku Burahima nawati mpuu Pue pane ia mewali pebuku. Pue mowei ngkaia dimba, towau, japi, onta, hai kalide. Ngkaia wori salaka hai bulawa. Bosa worihe hawina tobalilo hai towawine. 36 I kasaeanami Sara, towawinena Burahima, moanamohe hadua tobalilo. Ope-ope anu-anuna ampuku napososora anana iti. 37 Natudumona mosumpa hai modandi bona moulana hawana, nauli, ‘Ineeko mopilei sambokona anangku hangko i anantowawine au maidahe i tampo Kanaa ide. 38 Aginari laoko i souna umangku hai halalungku, hai nuala hadua anantowawine bona naposamboko anangku.’ 39 Pane kupekune iria, ‘Noumba ane anantowawine iti bara naunde meula iriko?’ 40 Hai mehana, nauli, ‘Pue au kupenombai ina motudu malaekaNa mamporangaiko bona tunggaiamu iti tepabukei. Ina molambiko sambokona anangku hangko i olonda tinangku, pemuleana umangku. 41 Ane pamperapimu iti bara rapabukei, tekabahamoko hangko i sumpamu.’
42 Kahawengku inona i tibubu, mekakaena i lalungku: ‘Pue au napenombai ampuku Burahima, kuperapi Irio bona Nupopewali apa au kutunggai. 43 Meangkana i hola tibubu ide. Ane hawe hadua anantowawine au mai mantambu, ina kuperapi iria bona naweina owai hangko i gumbana kuenu. 44 Pue, ane hungkana naweina owai kuenu, hai mopaenu worihe ontaku, ina kuisa kaiana au Nupilei mewali sambokona anana ampuku Burahima.’ 45 Bara mani hopo pekakaengku, liliu hawe Ribeka mohompo gumbana, hai mantambu i tibubu. Roo nodo, kuuli iria, ‘Kuperapi nuweina owai kuenu.’ 46 Liliu nataura gumbana hangko i owangana, hai nauli: ‘Tua, maenumoke, hai ontamu kupaenu worihe.’ Roo indo, maenuna, hai ope-ope ontaku napaenu worihe. 47 Ido hai kupekune: ‘Hema umamu?’ Mehana, nauli, ‘Umangku Betuel, ananda Nahor hai Milka.’ Hangko inditi, kupataka dali bulawa i ongena hai kukalaiami kala bulawa. 48 Roo nodo, motumpana menomba motoia Pue, Pue Ala au napenombai ampuku, Burahima, lawi Iami au moninina pane hawena inde i halaluna ampuku. Hai Ia au motulungina mampohidupaa anantowawine ide bona napotambia anana ampuku. 49 Mewali ide-ide, ane maahikau hai bula lalumi i ampuku, niuliangaana kanoumbana bona kuisa apa au hangangaa kubabehi.”
50 Mehanahe Laba hai Betuel, “Au mewali ide, napakanotomi Pue, apa mani pae kiuli! 51 Idemi Ribeka. Niantimi bona naposamboko anana ampumu hintoto hai apa au natudungiako Pue.” 52 Kanahadina hawina Burahima pololitanda, motumpami hawe i tampo menomba i Pue, 53 pane napopesuwumi hampi, parewa bulawa hai pera. Ope-ope iti nawei Ribeka. Parewa au masuli nawei worihe wutuna hai inana Ribeka. 54 Roo indo, hawina Burahima hai rangana, maandemohe hai maenu, hai mohambengimohe inditi.
Pearonda madondo, mololitami hawina Burahima, nauli, “Mepalakanamona ina mesule i ampuku.”
55 Agaiana wutuna hai inana Ribeka mololitahe, rauli, “Nupalikangaa hampai Ribeka irikami huba haminggumi ba hampulo alona, hangko peisari lao.”
56 Agaiana nauli hawi iti, “Ineemona nitaha lawi natulungimona Pue duuna tepabukeimi tunggaiana ampuku. Nipaliumona mesule iria.”
57 Mehanahe, rauli, “Takakio hampai mai Ribeka bona taisa noumba pekirina.” 58 Rakakio mpuumi Ribeka hai rapekune, “Noumba meulamoko irihira?”
Mehana Ribeka, nauli, “Io, meulamona.”
59 Mewali rapaliumi Ribeka hai hadua topekadipurana meula i hawina Burahima hai ranganahe. 60 Pane Ribeka rawati hai lolita ide,
“Ribeka, tapeperapi
bona mewaliko inanda isabuna tauna
hai bona pemuleamu monangihe ope-ope iwalinda.”
61 Hangko inditi, mangkadipuramohe Ribeka hai bahangkia anantowawine au mewali hawina, pane mesawihe i onta meula i hawina Burahima.
62 I tempo iti, Isaki au maida i tampo Negeb, mesulemi hangko i tibubu au rauli “Lahai-Roi.” 63 Kakalumba, mesuwumi hangko i bambaruna ina molulumao mampepeita bondena, unga peari moita mai onta. 64 Tangana nodo, mengowami Ribeka, hai moitami Isaki, liliu mengkaware hangko i ontana, 65 hai mekune i hawina Burahima, nauli, “Tobalilo au maike nanontohi olou hema?”
Mehana hawi iti, nauli, “Iami anana ampuku.” Ido hai naalami Ribeka bobona napopotabungi lindona.