Sara mate hai Burahima meholo tampo rapotalumba
23
1 Handami hangatu rompulo hai pitu parena tinuwuna Sara, 2 matemi i boea Kiryat-Arba (au rauli wori Hebron) i tampo Kanaa. Wiora mpuu laluna Burahima hai moteriahi towawinena au matemi.3 Roo indo, napalehi sangkami towawinena au tangana rapowata, hai lao i to Heti au maida i tampo iti, 4 nauli, “Iko ide topesua peana au maida i olomi. Ane peisa, kuperapi bona niweina meholo halimbo bonde kupotawui towawinengku.”
5 Mehanahe rauli: 6 “Tua, kiadaiko lawi oio hadua tadulako au maroho i olongki. Mewali matana lalungki ane nupilei halimbo tampo au tepamaroa i tampoki nupotawui towawinemu.”
7 Roo indo, motumpami Burahima i lindonda, nauli, 8 “Ane nipokana pamperapiku bona motawuna towawinengku inde, niperapiana i Epron, anana Sohar, 9 bona napobaluana lia watu i Mapela au ara i wiwi bondena. Holona ina kubaiari buke-buke i lindomi bona tampo iti mewalimi tampoku au ina kipotalumba.”
10 Hangko indo, Epron, au tangana mohuda sambela hai to Heti hungku i baba bente wanua, mohanai Burahima i lindonda tauna iti, nauli, 11 “Tinangku inde mewalihe sabingku. Tua, tampo iti bara paraluu nuholo, lawi bondeku hai lia watu au ara inditi kuhuhumi irio bona nupotawui towawinemu.”
12 Mewali Burahima molingkudumi hai motumpa i lindonda to Heti, 13 hai nauli i Epron, “Kuperapi bona nupehadingi lolitangku. Kupeinao moholo bondemu. Dokomide holona bona towawinengku kutawu inditi.”
14 Mehana Epron, nauli, 15 “Tua, halimbo tampo iti, holona iba pea atuna doi pera. Apa pae pobunduana doi iti irikita rodua? Nutawumi inditi towawinemu.” 16 Napokanami Burahima holona. Naimbami doina hintoto hai pangulina Epron, iami iba atuna doi pera. Doi iti ratimba i timbanga au rapake topobalu-balu, pane nabaiarimi i Epron i lindonda ope-ope to Heti au ara inditi.
17 Mewali, tampona Epron i Mapela hungku i Mamre mewalimi tampona Burahima. I tampo iti, ara bonde, lia, hai ngkaia wori kau. 18 Ope-ope to Heti au teruhu hungku i baba bente wanua, mosabikihe kanaholona Burahima tampo iti.