Pue Ala mampohawaa Burahima bona mampopenomba Isaki
22
1 Hambela tempo, Pue Ala mampetandaka pepoinalaina Burahima, Nauliangaa, “Burahima.”Mehana Burahima, “Idetona, Pue.”
2 Nauli mbuli Pue Ala, “Laomoko i tampo Moria, hai nuantimi Isaki, anamu au haduduana au nupokakaia ntepuu. Indolou ara hambua bulu au ina Kutudungiako. Inditi, hangangaa nusambale anamu mewali popenombamu Iriko.”
3 Kahalona madondo-dondo, Burahima molampiimi kalidena. Roo indo, mobehomi kau au ina napointui popenombana, natombo hai nahawira i kalidena. Masilolongami ope-ope, meangkami hihimbela hai Isaki hai rodua hawina, laohe i paidaa au ina natudungia Pue Ala. 4 Talumi alonda lumao, naita ngkaraomi bulu iti. 5 Nauliangaahe hawina au rodua, “Indemokau mepegia hihimbela hai kalidenta. Ikami ntaliana laongkai indora menomba i Pue Ala. Roo indo, ina mesulengkai irikamu.”
6 Hangko inditi, Burahima mohawira kau pohuwea popenomba i owangana Isaki, ia moanti wori ladi hai api. Tanganda molumao, 7 Isaki mokakio umana, nauli, “Uma!”
Mehana Burahima, nauli, “Apari anangku?”
Nauli Isaki, “Inde arami api hai kau, agaiana iumbami ana dimba au ina tapopenomba?”
8 Mehana Burahima, nauli, “Pue Ala au ina mopaara ana dimba iti,” pane rapaliliumi polumaonda.
9 Kahawenda i paidaa au napakanoto Pue Ala, Burahima moaro hambua pohuwea popenomba, hai moparampi kau i wongkona. Roo nodo, mohilumi anana, pane nawoli i wongko kau iti. 10 Roo nodo, Burahima moalami ladina ina napoposambale anana. 11 Agaiana malaekana Pue mekakio hangko i langi, nauli, “Burahima, Burahima!”
Mehana Burahima, nauli, “Idetona, Pue.”
12 Liliu nauli malaekana Pue, “Inee nupapate ba nupopoapa anangkoi iti. Ide-ide Kuisami karumihina pengkorumu Iriko, lawi anamu au haduduana baraNa nupokabohia.”
13 Membalilimi Burahima, liliu naita hambaa dimba laki au tokai tanduna i walaa. Naala pearai dimba iti, pane napopenombami i Pue Ala mewali pahuruna anana. 14 Ido hai Burahima mohangami paidaa iti, “Pue mopasilolonga apa au raparaluu.” Duuna ide-ide, rauli tauna, “I wongko bulu paidaana Pue, Ia mopasilolonga apa au raparaluu.”
15 Hambela mani malaeka iti mololita hangko i langi i Burahima, 16 nauli, “Nodemi pangulina Pue: ‘MosumpaNa i lalu hangaNgku, anti kanupeulaina hawaNgku hai kadana nupokabohi anamu au haduduana, 17 ina Kuwatiko bona maroa katuwomu hai ina Kupabosa pemuleamu nodo kangkaia betue i langi hai nodo wungi i wiwi ntahi. Pemuleamu iti ina monangihe iwalinda hai mopaidaihe boeanda. 18 Hangko i pemuleamu, ope-ope tauna i wongko dunia ina molambihe pewati. Ope-ope iti ina Kubabehi, lawi nupeulaimi hawaNgku.’ ” 19 Roo indo, Burahima hai Isaki laomohe i hawina au rodua, pane mesule sambelahe i souna Burahima au ara i boea Barseba.
Pemuleana Nahor
20 Tangana Burahima inditi, nahadimi bambari kana i Nahor wutuna hai Milka towawinena, moanahe ualu paka tobalilo, iamohe: 21 au towutu Us, meusu Bus, Kemuel (umana Aram), 22 Kesed, Haso, Pildas, Yidlap hai Betuel, 23 umana Ribeka. 24 Nahor mampotambia wori hadua hawi, hangana Reuma, hai i towawine iti, ia mopaarahe Teba, Gaham, Tahas hai Maaka.