Karapoanakana Isaki
21
1 Hangko indo, Pue mowatimi Sara nodo au Nadandia. 2 Mewali i tempo au napatokami Pue Ala, i kasaeanami Burahima, mantimimi Sara hai moanami hadua tobalilo. 3 Burahima mohanga anangkoi iti Isaki.a 4 Handami ualu alona tinuwuna Isaki, natilemi Burahima hintoto hai hawana Pue Ala. 5 I karapoanakana Isaki, tinuwuna Burahima hangatumi parena. 6 I tempo iti, nauli Sara, “Pue Ala mampopengelena, hai ope-ope tauna au mohadi poanangku ina matanahe hihimbela hai iko. 7 Hangkoia bara ara tauna au moharunga kaina moanangku, agaiana ide-ide moanamona hadua tobalilo, nauri tobalilongku sae ntepuumi.”8 Kamahile-hileami anangkoi iti hai barapi rapatomi. I tempo iti Burahima mopaarami susa mahile.
Burahima mowurahe Hagari hai Sumaila
9 I tempo iti, Sara moita Isaki anana, napopowadi-wadi Sumaila, anana Burahima i Hagari, towawine to Masiri. 10 Kanaitana Sara apa au mewali iti, mololitami i Burahima, nauli, “Wuramide hawinta au towawine iti hihimbela hai anana. Anana iti bara peisa molambi apa-apa hangko i ope-ope au ina napososora anangku Isaki.” 11 Mapari laluna Burahima mohadi lolitana towawinena, lawi Sumaila anana wori. 12 Agaiana nauli Pue Ala i Burahima, “Inee karao inaomu kana i Hagari hai anana. Peulai peamide peundeana Sara, lawi Isakiri au ina mopaara pemuleamu moula apa au Kudandiako hangkoia. 13 Ane anana Hagari, ina Kuwei wori ngkaia pemuleana duuna mewali hambua kadatua, lawi ia anamu wori.”
14 Kahalona madondo-dondo, Burahima mangalami roti hai owai suka kahandana nawei Hagari rapobaku i rara. Anana hai bakunda napaubangia Hagari, hai natudumohe padu. Mewali meangkami Hagari, hai tetoro-torohe i pada wungi Barseba. 15 Opemi owai au raanti, nawolimi anana i pongka kau, 16 hai mohuda kira-kira hangatu mete hangko indo, lawi nauli laluna, “Barana bai moita anangku mate.” Tangana mohuda, moteriami rurumihi.
17 Rumihi worimi poteriana Sumaila. Hai poteriana iti Nahadimi Pue Ala. Ido hai malaekaNa mololita i Hagari hangko i langi, nauli, “Hagari, apa au nuposusa lalu? Ineeko langa, lawi Nahadimi Pue Ala wotuna anamu. 18 Laomoko i anamu. Nuala hai nupalera, lawi ina Kupangkangkaia pemuleana duuna mewalihe hambua kadatua au mahile.” 19 Roo indo, Pue Ala motudungiami Hagari haogu tibubu. Lao mpuumi Hagari moihii kampi owainda pane mopaenumi anana.
20 Pue Ala mamporangai liliu Sumaila duuna mahile. Ia maida i pada wungi, hai mewali tauna au matumpali moahu. 21 Tanganda maida i pada wungi Paran, Sumaila napopotambimi inana hai hadua towawine au hangko i tampo Masiri.
Podandinda Burahima hai Abimele
22 I tempo iti, datu Abimele hihimbela hai Pikol, tadulako surodadona, laohe mampombelambia Burahima. Nauli Abimele iria, “Pue Ala mamporangaiko hai modureiko i hinangka bagomu. 23 Idomi pongkana pane kuperapi bona mosumpako inde i lindona Pue Ala, datiko mobabehi tengko batu iriko ba i anangkuhe ba i ope-ope pemuleangku. Nodo kamaroana lalungku au kutudungiamoko, hangangaa nubabehi wori nodo iriko hai i ope-ope taunangku au ara i tampo au nipaidai ide.”
24 Nauli Burahima, “Mosumpana.”
25 Agaiana ara wori au naposusa lalu Burahima. Ido hai napahawemi i datu Abimele kana i babehianda hawina datu au morampaki haogu tibubuna. 26 Nahanai Abimele, nauli, “Bara kuisa kahemana au mobabehi iti, hai bara mani wori hambela nupololita iriko. Hangko ideri, kakuhadina.” 27 Hangko indo, Burahima mowei datu Abimele dimba hai japi, mewali tanda podandinda. 28 Roo nodo, laomi Burahima mopatani pitu baana ana dimba au lundara. 29 Napekune Abimele iria, nauli, “Moapari hai nubabehi nodo?”
30 Mehana Burahima, nauli, “Pitu baana ana dimba ide hangangaa nudoko hangko iriko bona nupakanoto kaikona au mokae tibubu ide.” 31 Idomi hai pane paidaa iti rahanga Barsebab lawi inditimi podandianda Burahima hai datu Abimele.