Burahima hai datu Abimele
20
1 Roo indo, Burahima melimbami lao i tampo Negeb au ara i tampo Kanaa ntanda i Lau. Kahawenda inditi, tetidahe i wanua Gerar i olo tampo Kades hai Sur. Mahaemohe haodi maida i wanua iti, i tempo ido, 2 mololitami Burahima i tauna au inditihe, nauli, “Sara ide adingku.” Idomi hai Abimele, datunda to Gerar, motudu taunana lao moala Sara bona napotambia. 3 Hambela tempo i tanga kaindi, mampatongawami Pue Ala i lalu pangipina Abimele, Nauli, “Oio hangangaa mateko, lawi towawine au nupopeala iti arato tobalilona!”4 Agaiana Abimele bara mani mohungkuki Sara, ido hai nauli, “Pue! Bara iko au masala. Ba ina Nupapatena hihimbela hai taunangku? 5 Burahima haduduana au manguli Sara ide adina. Nodo wori pangulina towawine iti. Tongawa kabulana lalungku, hai barana masala.”
6 Mehana Pue Ala i pangipina, Nauli, “Kuisato kabulana lalumu. Idomi hai pane Kulawakiko bona datiko mampetobo towawine iti hai datiko mobabehi dosa Iriko. 7 Agaiana ide-ide nupopasulemi i tobalilona lawi tobalilona hadua nabi. Ina napekakaengaako datiko mate. Agaiana ane bara nupopasule, oio hai ope-ope taunamu hangangaa matekau.”
8 Kahalona madondo, Abimele mokakiomohe topobagona, hai napopaisaahe apa au mewali. Karahadina apa au mewali iti, langa mpuuhe. 9 Roo nodo, Abimele mokakiomi Burahima, hai napekune, nauli, “Moapari hai nodo babehiamu irikami? Apari salangku irio pane nupaarana kapari hai rugi i poparentaku? Bara mpuu maroa babehiamu iti! 10 Moapari hai nubabehi nodo?”
11 Mehana Burahima, nauli “Kupehangu, inde bara ara tauna au mengkoru i Pue Ala, mewali kupekiri ina rapapatena anti pepokaelunda tauna inde i towawinengku. 12 Hampaka mbuli, katouana ia adingku, lawi hadua pea umangki, agaiana barangkai hangina-ngina. Kahopoana motambingkai. 13 I kanatudungku Pue Ala mopalehi umangku, molilomongkai i tamponda tauna ntanina. Ido hai kuuliangaa towawinengku: ‘Ane nupokakaia ntepuuna, iumba pea kalaoanta, hangangaa nupahaweahe tauna oio adingkuko.’ ”
14 Hangko inditi, Abimele mampopasulemi Sara i Burahima, hai nawei wori hawina, dimbana hai japina. 15 Nauli datu iti i Burahima, “Idemi tampoku au ara i lindomi. Peisako maida iumba pea peundeamu.” 16 Pane mouliangaa Sara, “Kuweimi hasabu doi pera i wutumu anti karaantimu i soungku bona raisa ope-ope tauna oio barako masala.”
17-18 Roo indo, Burahima mampekakaengaahe datu Abimele hasou, lawi anti kaSarana nahukuhe Pue alana towawinena hai ope-ope hawina barahe moana. Roohe napekakaea Burahima, maohamohe ope-ope duuna peisa mbulihe mantimi.