Dosanda to Sodomo
19
1 Kalumbami, malaeka au rodua iti hawemohe i Sodomo. Tangana Looti mohuda i baba bente wanua Sodomo, naitami kahawenda malaeka iti. Liliu meangka laohe napombelambia hai motumpa hawe i tampo, 2 nauli, “Ampuku, mehupemoke hampai i soungku. Nibahoimi bitimi hai mohambengimokau inde. Kahalori nipaliliu polumaomi.”Mehanahe, rauli, “Bara, ina maturungkai i kinta au soa i tanga wanua ide.”
3 Agaiana naperapi ntepuu Looti bona mehupehe i souna, hai kahopoana mesua mpuumohe i lalu souna. Roo indo, napasilolongami paandenda, natunuamohe roti au bara raragii, hai maandemohe.
4 Hangko damanihe maturu, ope-ope tobalilo i humalele wanua iti, mepongka hangko i pamuda hawe-hawe i tosae, maihe motoleliki souna Looti. 5 Monganga-ngangamohe ampu boea iti, rauli, “Iumbamohe tauna au mai irio? Popesuwuhe mai bona kiposambokohe!”
6 Membolomi Looti hangko i souna, hai motuko babana, 7 pane mouliangaahe to Sodomo iti nauli, “Halalungku, kuperapi ntepuu irikamu bona ineekau mobabehi dake iti. 8 Nipehadingi maroa. Arahe anangku rodua anantowawine au bara manihe moisa tobalilo. Aginami ihira au kuweikau, hai nibabehi apa pea peundeami. Kuperapi pea ineehe ide torarengku, lawi hangangaa kuperuruihe.”
9 Agaiana rauli tauna iti i Looti, “Peloho! Oio topesua peako. Oiori pae au ina moatorongkai? Ina meliu karumihina kakipapahaimu panehe tauna au rodua iti!” Roo indo, rahumbangami Looti hai ina laohe mogero baba. 10 Agaiana torare au rodua iti, liliuhe modii Looti mesua i sou, pane motukohe baba. 11 Roo indo, rapabilomohe ope-ope tauna au ara i raoa sou iti duuna barapi raisa babana.
Looti mopalehi Sodomo
12 Hangko indo, rauli tauna au rodua iti i Looti, “Ane arahe anamu, maniamu ba halalumu au ntanina i wanua ide, hangangaa nuantihe meloho hangko inde, 13 lawi wanua ide ina kigero. Nahadimi Pue hai Naisami babehianda tauna i wanua ide au kadake ntepuu. Ido hai Natudungkai mai mopatuna wanua Sodomo hai hinangka ihina.”
14 Roo indo, laomi Looti mampombelambia hampomanunda anana au rodua, hai nauliangaahe, “Holigamokau mesuwu hangko inde, lawi wanua ide ina nagero Pue.” Agaiana nabuhu inaonda woworongkena pea Looti.
15 Madondo-dondo, rodua malaeka iti mopahumpehe Looti, rauli, “Holigamokau padu hihimbela hai towawinemu hai anamu au rodua bona datikau mate ane wanua ide rahuku.” 16 Mogaa mani laluna Looti, agaiana anti kamaahina laluna Pue iria, ido hai pane malaeka au rodua iti moninihe Looti hai sambokona hai anana au rodua meloho hangko i wanua Sodomo. 17 Kahawenda i raoa wanua, hadua malaeka mouliangaahe, “Pelangkakau, nipatuwo watami. Ineekau membambalili hai ineekau mengkaroo i lembona. Melangkamokau lao i bulu, datikau mate!”
18 Agaiana nauli Looti, “Inee wongkamia nitudu melangka lao i bulu. 19 Maroa lalumi iriko. Tou-tou mpuu nitulungimona hai nipatuwomona. Agaiana bulu olou karao. Bara kubuku. Kupokalanga narumpangkai au mepakarugi i tanga rara, hai matengkai hangko damaningkai hawe inditi. 20 Peita, i lindota ara boea kokoi au bara gaga karao. Ane peisa, nipopelangkamongkai indolou bona tuwo peangkai.”
21 Mehana malaeka, “Peisa. Wanua au kokoi iti bara kugero, 22 agaiana hangangaa melangkakau hoholiga, lawi bara mani peisa kubabehi ba apa-apa ane bara manikau hawe indolou.”
Wanua iti rahanga Soar, lawi lempona Soar ‘kokoi’.
Kamagerona wanua Sodomo hai Gomora
23 Membetomi alo, hawemi Looti i Soar. 24 Unga pea Pue mopatoa uda watu belerang au moapi i wongko wanua Sodomo hai Gomora 25 duuna wanua au roogu iti magonu hawe-hawe i humalele lembo iti. Tuda-tuda, binata hai manusia, ope haha maropu. 26 Agaiana towawinena Looti, membaliliri, ido hai mewali watu bure.
27 Kahalona madondo, laomi Burahima hoholiga i peangkaana mololita hai Pue hangkoia. 28 Metiromi ntanda i Sodomo hai Gomora, hai i humalele lembo iti, naitami rambu makumba hangko i tampo iti, nodo rambu topehuwe. 29 Nodomi wanua iti nagero Pue Ala. Agaiana Nabuhuinaomi pamperapina Burahima, ido hai Looti, Napopeloho hangko damani wanua iti Nagero.
Pepongkana toiorunda to Moabi hai to Amon
30 Looti langa maida liliu i Soar, ido hai laomi i bulu hihimbela hai anana towawine au rodua, hai maidamohe inditi i lalu lia. 31 Hambela tempo, anana au towutu mololita i adina, nauli, “Umanta saemi, hai bara ara tobalilo inde au peisa tapotambia bona moanake. 32 Aginami umanta iti tapamalangu hai tapoluhi bona moana peake dati mabotu pemuleana umanta.” 33 Kaindi iti, umanda rapaenu mpuumi anggoro hawe malangu, pane laomi napoluhi anana au towutu. Anti kamalanguna, umanda iti barapi naisa apa au mewali.
34 Kahalona anana au towutu mololita mbuli i adina, nauli, “Inona kaindi, mampoluhimona umanta. Deade kaindi, tapamalangu mbuli bona lao wori nupoluhi. Ane tababehi nodo, hangalo ikita rodua ina ara ananta, hai ina mopaliliuke pemuleana umanta.” 35 Rapamalangu mbulimi Looti, hai laomi napoluhi anana au toadi. Anti kamalanguna, umanda iti barapi naisa apa au mewali. 36 Mewali, mantimimohe anana rodua iti hangko i umanda. 37 Anana au towutu moana hadua tobalilo au nahanga Moabi. Iami au mopaarahe to Moabi au tuwo manihe ide-ide. 38 Anana au toadi moana wori hadua tobalilo au nahanga Ben-Ami. Iami au mopaarahe to Amon au tuwo manihe ide-ide.