Pue Ala mohuleki dandiNa i Burahima
18
1 Pue mampatongawa mbulimi i Burahima hungku i kau marumbu i Mamre. Tempo iti, rumihi mpuu kamapanana alo, hai Burahima mohuda pea i baba bambaruna. 2 Mengoami Burahima, hai unga pea moita talu tobalilo au meangka i lindona. Liliu laohe nagagu hai motumpami hawe i tampo, 3 hai nauliangaahe, “Ane tapokana Tua, ineeke hampai mopaliliu polumaonta ane bara manike mehupe i bambaruta. Nipogiangaana hampai bona kurorakau inde. 4 Laona hampai moala owai bona nipopobahoi bitimi. Nipakaoha wowemi i woi kau ide. 5 Ina kupaandekau hampai bona maroho hulekau mopaliliu polumaomi, lawi hawemokau i bambaruki ide.”Rauli, “Peisato. Anti kamaroana lalumu, idomi hai mehupengkai.”
6 Mesuami Burahima hoholiga i bambaruna mouliangaa Sara, “Nuala holiga tapu au maroa talu bungkuna, hai nubabehi roti moleogu.” 7 Roo indo, melangkami lao i paidaa binatana mopakala hambaa ana japi au marudu, hai nawei hadua hawina au malingkati modaka bona polo raande. 8 Roo nodo, naalami susu hai susu au moogu, hai bau au lehami, hai naroraahe torarena. Tanganda maande, naporangaihe Burahima i woi kau iti.
9 Hangko indo, mekunemohe, “Iumbari Sara towawinemu?”
Mehana Burahima, “Olouto i bambaru.”
10 Hadua hangko irihira mololita nauli, “Pare mai ina mesulena inde, hai i tempo iti, towawinemu Sara ina moana hadua tobalilo.”
Lolita iti napehadingito Sara i baba bambarunda i taleunda torare iti. 11 Sara hai Burahima, saemohe, hai Sara barapi motorare. 12 Ido hai mengele ngkabuni Sara, hai nauli laluna, “Saemona hai barapi kubuku. Peisa manina pae mosamboko hai tobalilongku? Lawi tobalilongku sae worimi.”
13 Mewali mekunemi Pue i Burahima, nauli, “Moapari hai pane Sara mengeleri? Moapari hai napobata-bata lalu mani kaina moanana anti kasaenami? 14 Ara pae au bara nabuku napopewali Pue? Nodo au Kuulimi inona, pare mai ina mesuleNa inde, hai i tempo itimi Sara ina moana hadua tobalilo.”
15 Anti kalangana, mesuwumi Sara, nauli, “Barana mengele.”
Agaiana nahanai Pue, nauli, “Tou, mengeleko inona.”
Burahima mampekakaengaahe to Sodomo
16 Roo indo, torare au talu iti meangkamohe lao monontohi wanua Sodomo, hai naporangaihe Burahima. Bara mahae, mampetiromohe Sodomo.
17 Nauli Pue i laluna, “Bara maroa Kuwuniangia Burahima apa au ina Kubabehi, 18 lawi pemuleana ina mewalihe ngamba au mahile hai makuasa. Anti kaiana, ina Kuwatihe ope-ope tauna i dunia. 19 Iami au Kupilei mopaturohe anana hai pemuleana bona mobabehihe peundeaKu moula apa au maroa hai au manoto. Ane iti rapeulai, ina Kupabukei dandiKu i Burahima.”
20 Roo indo, mongkorami Pue i Burahima, Nauli, “Kuhadimi poterianda tauna au manguli kadake mpuu babehianda to Sodomo hai to Gumora. Anti poterianda iti, 21 ina laoNa indo moparesa ope-ope babehianda bona Kuisa tou ba bara.”
22 Rodua hangko i torare iti moioruhe lao i Sodomo. Agaiana Pue mengkaroo mani hihimbela hai Burahima. 23 Burahima mohungkuki Pue hai mekune, nauli, “Ina Nuropuihe pae tauna au manoto lalunda hihimbela hai tauna au kadake? 24 Ane rapana ara mani lima pulona tauna au manoto laluna maida i wanua iti, ina Nugero pea pae wanua iti? Barahe pae Nuampungi anti lima pulona tauna au manoto lalunda? 25 Inee tauna au manoto laluna iti raropui sambelahe hai tauna au kadake. Inee Pue! Lawi ane Nubabehi nodo, tauna au manoto laluna hangangaa rahuku sambelahe hai tauna au kadake. Peisa pae Topobotusi dunia ide mobabehi au bara hintoto?”
26 Nahanai Pue, nauli, “Kehapiri lima pearai pulona tauna au manoto laluna Kulambi i wanua Sodomo, bara ina Kugero wanua iti. Ina tuwohe ope-ope tauna anti tauna lima pulona iti.”
27 Nauli mbuli Burahima, “Pue, kuperapi ampu lawi kuumpuki mbuli lolitangku. Ide iko manusia peana, barana makuasa mopakanoto. 28 Agaiana noumba ane iba pearai pulona hai lima au manoto lalunda, ina Nugero pea pae wanua iti?”
Nauli Pue, “Ane iba pearai pulona hai lima tauna au manoto laluna, wanua iti bara Kugero.”
29 Napekune mbuli Burahima, nauli, “Noumba ane ara manihe iba pulona tauna au manoto laluna?”
Mehana Pue, nauli, “Ane iba pearai pulona tauna au manoto lalunda, bara Kupopewali tunggaiaKu.”
30 Nauli Burahima, “Pue, ineeKo rumpu. Pogiangaa manina mololita. Noumba ane talu pearai pulona tauna au manoto?”
Nauli Pue, “Ane Kuhumba mani talu pulona tauna au manoto, bara ina Kugero wanua iti.”
31 Nauli mbuli Burahima, “Pue, merapina ampu. Kupengkabaiki mbuli mopahawena lolitangku. Noumba ane rompulo pearai tauna au manoto lalunda?”
Mehana Pue, nauli, “Ane Kuhumba mani rompulo tauna au manoto lalunda, bara ina Kugero wanua iti.”
32 Kaopeana, nauli mbuli Burahima, “Pue, ineeko rumpu. Mololita manina hambela. Noumba ane ralambi hampulo pearai tauna au manoto?”