Petile iami tanda podandina Pue Ala hai Burahima
17
1 Handami hahio pulona hai hahio parena tinuwuna Abram, mampatongawami Pue iria, Nauli, “Ikomi Pue Ala Au Makuasa. Mengkorumoko Iriko hai nupeulai liliu hinangka peundeaKu. 2 Ina mopaaraNa dandi irio hai oio wori Iriko, hai ina Kuweiko pemuleamu au bosa ntepuu.” 3 Motumpami Abram hawe i tampo, hai Pue Ala mongkora mbulimi iria, Nauli, 4-5 “Idemi dandiKu au kupaara irio. ModandiNa irio bona mewaliko umanda bosa tauna i humalele dunia. Idomi hai hangamu barapi Abram,a agaiana rahangamoko Burahima.b 6 Ina Kuweiko bosa pemuleamu duuna mewalihe ngkaia tina, hai bosa pemuleamu ina mewalihe datu.7 MopaaramoNa podandi au bara mokahopoa irio hai ope-ope pemuleamu, nodo wori oio hai pemuleamu, Iriko. Ikomi Pue Ala au nupenombai, hai au rapenombai pemuleamu hawe i hae-haena. 8 Ide-ide tampo Kanaa nipaidai nodo peakau torare. Agaiana tampo ide ina Kuweiko hai i ope-ope pemuleamu hawe i hae-haena, hai Ikomi au mewali Pue Ala au rapenombai.”
9 Mongkora mbuli Pue Ala i Burahima, Nauli, “Hangangaa matunduko i dandi ide, oio hai ope-ope pemuleamu. 10 Idemi podandi au hangangaa nikingki hihimbela hai ope-ope pemuleamu: ope-ope tobalilo i olomi hangangaa ratilekau, 11 lawi iti au ina mewali tanda au mampopaingaakau kaarana dandiKu irikamu. 12 Mewali, mepongka ide-ide, ane ara anami tobalilo hai ualumi alona tinuwuna, hangangaa nitilehe, tepesua ope-ope tauna au rapoanaka i soumi maroa anami ba hawimi. Mogalori hawimi au niholo hangko i tauna ntanina, hangangaa nitilehe. 13 Ope-ope tobalilo hangangaa ratile, maroa au mesupahe i soumi ba hawi au niholo, lawi iti au mewali tanda i watami, mopatongawa kaarana dandiKu irikamu au bara mokahopoa. 14 Ope-ope tobalilo au bara ratile, barapohe raimba taunaNgku, lawi barahe matundu i dandiKu.”
15 Mongkora mbulimi Pue Ala i Burahima, Nauli, “Ineemoko mokakio sambokomu Sarai; lawi mepongka ide-ide rahangami Sara.c 16 Sara ina Kuwati alana moana hadua tobalilo au Kuweiko, hai Sara ina Kupopewali inanda bosa tina. Hangko i pemuleana, ina arahe datu.”
17 Motumpami Burahima hawe i tampo menomba i Pue Ala, agaiana mengeleri hai nauli laluna, “Ara pae hadua tobalilo au hangatumi parena tinuwuna, ara mani anana? Ane Sara, towawinengku, tinuwuna hahiomi pulona parena. Nabuku mani pae moana?” 18 Roo indo, mololitami i Pue Ala, nauli, “Ane maroa, Sumailami au mampehurungai sosorangku au Nudandiana.”
19 Agaiana nauli Pue Ala, “Bara, Sara sambokomu ina mampoanaka hadua tobalilo au ina nuhanga Isaki.d I anamu iti ina Kupakanotoa dandiKu au bara mokahopoa hai i ope-ope pemuleana. 20 Agaiana ina kupehadingi wori perapimu kana i Sumaila. Idomi hai pane ina Kuwati hai Kupabosa mpuu pemuleana. Ia ina mewali toiorunda hampulo hai rodua tadulako, hai pemuleanahe ina Kupopewali tina au mahile. 21 Agaiana dandiKu ina Kupabukei i Isaki, anamu au ina napoanaka Sara pare mai i tempona nodo tempo ide.” 22 Roo mongkora nodo, Pue Ala mopalehimi Burahima.
23 Alo iti peawomi, Burahima mampeulai hawana Pue Ala, motilemi Sumaila hai ope-ope tobalilo au ara i souna, tepesua hawina au mesupahe i souna hai hawina au raholo hangko i tauna ntanina. 24 I karatilena Burahima, tinuwuna hahiomi pulona hai hahio parena, 25 hai Sumaila, anana, hampulomi hai talu parena tinuwuna. 26 Ihira rorodua ratilehe i alo iti, 27 nodo worihe ope-ope hawina.