Hagari hai Sumaila
16
1 Sarai, towawinena Abram, bara mani ara anana, agaiana ara hawina hangko i tampo Masiri, hadua anantowawine, hangana Hagari. 2 Ido hai mololitami Sarai i Abram, nauli, “Barana nawei Pue moana. Agina nuposambokomi ide hawingku bona ane ia peisa moana, anana kupoana.” Napokanami Abram apa au nauli towawinena. 3 Nodomi Sarai mokira hawina naposamboko Abram. I tempo iti, hampulomi parena Abram maida i tampo Kanaa. 4 Bara mahae hangko indo, Abram hai Hagari hampapaturua mpuumohe alana mantimimi towawine iti. I kanaisana Hagari kamantiminami, mampemahilemi hai barapi mengkoru i Sarai.5 Ido hai nauli Sarai i Abram, “Kuweiko hawingku Hagari, agaiana i kanaisana kamantiminami, barapi mengkoru iriko. Oiomi au mopaara kamasalana iriko. Kuharunga Pue ina mobotusike i kara-karanta ide.”
6 Mehana Abram, “Ane hawimu iti, oio au makuasa iria. Babehimide apa au maroa moula pekirimu.” Mepongka indo, Sarai mopakaparimi Hagari duuna meloho.
7 I kapaduna Hagari, ia lao napombelambia malaekana Pue hungku i pentumbua owai i pada wungi i rara au monontohi Sur. 8 Nauli malaeka iti, “Hagari, hawina Sarai, hangko iumbako mai hai ina iumbako hou?”
Mehana Hagari, “Melohona mai hangko i ampuku, Sarai.”
9 Nauli mbuli malaeka iti, “Mesulemoko i ampumu, hai mengkoruko iria.”
10 Napaliliumi malaeka iti lolitana, nauli,
“Ina Kuweiko bosa pemuleamu
duunda barapi peisa raimba.
11 Barapoko mahae ina moana hadua tobalilo.
Anamu iti nuhanga Sumaila,a
lawi nahadimi Pue poteriamu i lalu kapari au morumpako.
12 Anamu iti ina tuwo nodo hambaa kalide au maila.
Ia ina moewa tauna, hai ina raewa tauna.
Ia ina moewa halaluna.”
13 Roo indo, nauli Hagari i laluna, “Tou mpuu pae kuitami Pue au mohailena?” Ido hai ia mohanga Pue Ala “El-Roi”.b 14 Ido wori pongkana pane tibubu au ara i olona Kades hai Bered rahanga tibubu Lahai-Roi.c
15 Bara mahae hangko indo, moana mpuumi Hagari hadua tobalilo, hai Abram mohanga anangkoi iti Sumaila.
16 Tempo iti, tinuwuna Abram ualumi pulona hai ini parena.