Podandina Pue Ala hai Abram
15
1 Hangko inditi, mongkorami Pue i Abram i lalu hambua pampetudungia, nauli,“Abram, ineeko langa.
Ina Kukampaiko hangko i hinangka rugi hai silaka,
hai ina Kuweiko rasi au mahile ntepuu.”
2-3 Agaiana nauli Abram, “Pue Ala, barana Nupopemule. Au mampososora anu-anungku hangalo, batena pea Elieser, hawingku to Damsik. Mewali apami bunduna Nuweina anu-anu au ngkaia?”
4 Hangko indo, nahadi mbulimi Abram lolitana Pue iria au manguli, “Bara hawimu au ina mampososora anu-anumu, agaiana ina Kuweiko anamu, hadua tobalilo. Iami au ina mampososora anu-anumu.” 5 Roo indo, Pue moanti Abram lao i raoa, hai Nauliangaa, “Pengoamide i langi hai nupeita betue, ina nodo kabosanda pemuleamu duunda barapi peisa raimba.”
6 Abram mepoinalai i Pue Ala, ido hai naimba Pue Ala manoto i peitaNa.
7 Hangko indo, nauli mbuli Pue iria, “Ikomi Pue au mampopesuwuko hangko i tampo Ur-Kasdim hai moweiko tampo ide mewali sosoramu.”
8 Agaiana mekune Abram, nauli, “O, Pue Ala, noumbami kakuisana tampo ide mewali sosorangku?”
9 Mehana Pue, Nauli, “NualaaNa hambaa japi lundara, hambaa towau lundara hai hambaa dimba laki, tinuwunda talu parena. Hangangaa nuala wori hambaa tokuku hai hambaa manggebodo.” 10 Mewali, naala mpuumi Abram ope-ope binata iti hintoto hai hawana Pue. Hambaa japi, hambaa towau hai hambaa dimba iti nabikahe mewali ronggaa, hai nadedehe napopombelindo. Agaiana tadasi iti bara nabika. 11 Roo indo, bahangkia tadasi kaloa mengkatoahe bona moandehe onto binata iti, agaiana nawurahe Abram.
12 Ina tampumi alo, leta mposomi Abram. Mangipimi, hai i lalu pangipina, meruu mpuu kamakaindina, ido hai rumihi mpuu kalangana. 13 Hangko inditi, nauli Pue iria, “Bona nupoinalai ntepuu, pemuleamu ina maidahe i tamponda tauna ntanina, hai i lalu iba atuna parena kamahaena ina rapohawihe hai rapopeahi-ahihe i tampo iti. 14 Agaiana hambela tempo, tauna au mampohawihe ina Kuhukuhe, hai i kapadunda pemuleamu mopalehi tampo iti, ina moantihe ngkaia anu-anu hangko inditi. 15 Ane oio, ina ngkararu tinuwumu, hai ina mateko hai katinda lalu. 16 Ara iba lapina pemuleamu au ina rapohawihe, hangko mesulerihe inde. Ide-ide bara mani temponda to Amori iti Kuwura hangko i tampo ide, rumihi ntepuurai kakadakenda, hangko Kuhukurihe.”
17 Tampumi alo hai kaindimi, unga pea Abram moita haogu kori au morambua hai hambua hulu au rore moliu i olonda onto binata au rabika-bika inona. 18 Tempo iti peami Pue modandi i Abram, Nauli, “ModandiNa irio, humalele tampo ide ina Kuweihe pemuleamu, mepongka i pariolo tampo Masiri hawe i owai Eprat. 19 Tepesua wori tamponda to Keni, to Kenas, to Kadmon, 20 to Heti, to Feris, to Repaim, 21 to Amori, to Kanaa, to Girgasi hai to Yebusi.”