Abram motulungi Looti
14
1 I tempo ido, datu au maida hungku inditi mombealahe. Ara iba datu au moewahe lima datu. Iba datu iti iamohe:Amrapel hangko i tampo Sinear,
Ariok hangko i tampo Elasar,
Kedorlaomer hangko i tampo Elam
hai Tideal hangko i tampo Goyim.
2 Datu iti moewahe lima datu iamohe:
Bera hangko i wanua Sodomo,
Birsa hangko i wanua Gumora,
Sinab hangko i wanua Adma,
Semeber hangko i wanua Seboim
hai hadua datu hangko i wanua Bela au rauli wori Soar.
3 Lima datu iti mohintuwuhe mogulu surodadonda i lembo Sidim au ide-ide rauli Tahi Mate. 4 I lalu hampulo hai rompare kamahaena, lima datu iti naparentahe datu Kedorlaomer, agaiana roo indo i pare kahampulo hai talu, laohe moewa datu iti. 5 Liumi hampare, laomi datu Kedorlaomer hai talu datu hampohintuwuana, hai monangihe to Repaim i boea Asterot-Karnaim, to Susim i boea Ham, to Emim i ngamba Sawe-Kiriataim, 6 hai to Hori i tampo Seir au mobulu-bulu. To Hori iti rawulaihe hawe-hawe i El-Paran i wiwi pada wungi. 7 Roo indo, surodado au mewulaihe iti, mesule hulehe i En-Mispat, au ide-ide rauli Kades. Inditimi, monangihe to Amale pane mokuasaihe ope-ope tamponda, hai monangi worihe to Amori au maidahe i Haseson-Tamar.
8 Hangko indo, hinangka datu au hangko i Sodomo, Gumora, Adma, Seboim hai Bela mopasilolongamohe surodadonda i lembo Sidim, pane mombealahe. 9 Lima datu iti moewahe iba datu au hangko i Elam, Goyim, Sinear hai Elasar. 10 I lembo iti, ngkaia kalolu mahile au kehi aspal. I temponda datunda to Sodomo hai datunda to Gomora melangka rawulaihe iwalinda, arahe surodadonda au manawo i kalolu iti. Au ntanina melangkahe lao i bulu. 11 Mewali datu au iba iti menangimohe. Ido hai moantimohe hinangka anu-anunda to Sodomo hai to Gomora tepesua ope-ope paandenda. 12 Looti, pinoanana Abram au maida i Sodomo, raanti wori hihimbela hai anu-anuna.
13 Abram, to Ibarani iti, maida hungku i bahangkia kau marumbu. Kau marumbu iti iami kauna hadua to Amori au rahanga Mamre. Mamre hai halalunahe, hanganda Eskol hai Aner, napohimadahe Abram. I tempo ido, ara hadua tauna au melangka hangko i pombealaa iti lao mopahawe i Abram apa au mewali. 14 Kanahadina Abram pinoanana ratawani iwalinda, ia mopateruhumohe hinangka taunana au maroho hai au keate mombeala, kabosanda talu atuna hampulo hai ualu. Roo nodo, laomohe mowulai datu au iba iti hawe-hawe i wanua Dan. 15 I tanga kaindi, Abram mogaa-gaamohe taunana i lalu bahangkia gaana, hai laomohe mebungka alanda iwalinda iti ranangi. Roo indo, rawulaihe hawe-hawe i boea Hoba, ntanda i Raa wanua Damsik. 16 Hinangka anu-anuna Looti au rapamuru iwali nalambi hulehe Abram, nodo wori Looti hai ope-ope towawine au ratawani hai tawani ntanina.
Melkisedek mowati Abram
17 Karoona Abram monangihe Datu Kedorlaomer hai datu hampohintuwuana, mesulemi i tampona. I pesulena, datunda to Sodomo laomi modupa Abram i lembo Sawe au rahanga wori lembo Datu. 18 I tempo iti, hawe worimi hadua datu au rahanga Melkisedek, iami datu hangko i Salem au mewali tadulako mpenomba au mobago i Pue Ala au i Wongko Tuwona. Melkisedek iti moantia Abram roti hai anggoro, 19 nauli:
“Nawatiko Pue Ala au makuasa,
au mampopewali langi hai tampo.
20 Tetoiami Pue Ala au makuasa,
au mampopenangiko hangko i iwalimu.”
Roo nodo, Abram mohuhumi i Melkisedeka hangkira hampulo hangko i ope-ope anu-anu au narampaki hule hangko i iwalinda.
21 Roo indo, datunda to Sodomo mololita i Abram, nauli, “Alamide anu-anu au nuperampai hule mai, agaiana taunangku nupopasulea pea wongkoia.”
22 Agaiana nahanai Abram, nauli, “Mosumpana i lindona Pue Ala au makuasa, au mampopewali langi hai tampo. 23 Barana ina mangala ba apa-apa hangko irio. Mogalori hambotu lero ba pekapu kandupa, barana mau moala dati nuuli anti kaoiona panena mewali pebuku. 24 Bara kuunde moala ba apa-apa bona kupoanu haduduangku. Batena pea kudoko apa au raandemi taunangku. Agaiana ane hampohintuwuakuhe, iami Aner, Eskol hai Mamre, kuperapi bona peisahe moala kiranda.”