Abram hai Looti mogaa
13
1 Padu mpuumi Abram hangko i tampo Masiri lao monontohi tampo Negeb (au ara i tampo Kanaa ntanda i Lau). Towawinena hai Looti meula worihe, hai hinangkana anu-anunda raanti. 2 I tempo ido, pebuku mpuumi Abram; ngkaia dimbana, towauna, japina hai ngkaia wori salaka hai bulawana. 3 Hangko i tampo Negeb, Abram molumao hangko i paidaa hambua lao i paidaa au hambuana monontohi boea Betel. Bara mahae hangko indo, hawemi i hambua paidaa i olo boea Betel hai boea Ai, pobambaruana hangkoia 4 hai poaroana pohuwea popenomba. Inditimi ia menomba i Pue.5 Nodo wori Looti. Ngkaia dimbana, towauna hai japina. Ara wori bambaruna hai taunana. 6 Anti kadana maemba pada iti, bara handa rapaidai rodua topohalalu iti, lawi bosa mpuu pinatuwonda. 7 Idomi hai pane toporewunda Abram hai Looti mobungkahe. (Tempo iti, to Kanaa hai to Feris maida manihe i tampo iti.) 8 Mewali, mololitami Abram i Looti, nauli, “Ikita ide topohalaluke. Bara maroa ane toporewunta mobungkahe. 9 Aginami mogaake. Nupetiro humalele tampo au ara i lindota hai nupilei umba au nuunde. Ane oio lao ntanda i kabeo, iko laona ntanda i koana. Ane oio lao ntanda i koana, iko hangangaa laona ntanda i kabeo.”
10 Napetiromi Looti humalele tampo iti, hai naitami kamaruduna tampo i lembona owai Yarade hawe-hawe i wanua Soar. Inditi ngkaia owaina, raita nodo bondena Pue hai nodo tampo Masiri. (Ide mewali hangko damani Pue mogero wanua Sodomo hai Gomora.) 11 Kahopoana Looti mopilei ope-ope tampo i lembona owai Yarade, hai melimbami lao ntanda i Mata alo. Nodomi pogaanda topohalalu iti. 12 Abram maida liliu pea i tampo Kanaa, agaiana Looti melimbami hai mobabehi bambaruna i lembo hungku i wanua Sodomo hai i wanua ntanina. 13 Wanua Sodomo iti rapaidai tauna au kadake ntepuu babehianda hai au madosa mpuuhe i peitana Pue.
Abram melimba lao i Hebron
14 I kapaduna Looti, mongkorami Pue i Abram, Nauli, “Hangko i tampo au nupeangkai ide, nupetiro ngkarao mantoleli. 15 Ina Kuweiko humalele tampo au nupetiro ide bona mewali kiramu hai kiranda pemuleamu hawe i hae-haena. 16 Ina Kupabosa pemuleamu nodo kangkaiana awu i dunia au bara peisa raimba. 17 Laomi nupeita humalele tampo au Kuweiko ide.” 18 Hangko indo, Abram molimbanga bambaruna hungku i bahangkia kau marumbu (kau iti, kauna hadua tauna au rahanga Mamrea) hungku i boea Hebron, hai inditimi mampopombeusu-usu watu moaro hambua pohuwea popenomba i Pue.