Abram nakakio Pue Ala
12
1 Mongkorami Pue i Abram, Nauli, “Nupalehimi tampomu, tinamu hai souna umamu, hai laoko i tampo au ina Kutudoako.2 Ina Kupangkaia pemuleamu
duuna mewalikau hambua kadatua au mahile.
Ina Kuwatiko hai Kupamahile tuwomu
bona mewaliko pewati i ope-ope tauna.
3 Ina Kuwatihe tauna au mowatiko,
hai ina Kuhukuhe tauna au mampopeahi-ahiko.
Anti kaoiona,
ina Kuwatihe ope-ope tauna i humalele dunia.”
4-5 Mewali padumi Abram hangko i boea Haran moula hawana Pue iria, i tempo iti, tinuwuna pitumi pulona hai lima parena. Ia lao i tampo Kanaa hihimbela hai towawinena hai Looti pinoanana. Naanti wori hinangka anu-anuna hai ope-ope hawina au nalambi i boea Haran.
Kahawenda i tampo Kanaa, 6 mopaliliuhe polumaonda duunda hawe i boea Sike. Inditi mengkaroohe i hampoa kau marumbu i More. I tempo iti, to Kanaa maida manihe i tampo iti. 7 Roo indo, Pue mopatongawami wataNa i Abram, Nauli, “Tampo ide ina Kuweihe pemuleamu.” Ido hai Abram moaro hambua pohuwea popenomba i Pue. 8 Hangko inditi, napaliliu mbulimi polumaona lao i tampo au mobulu-bulu, ntanda i Mata alona boea Betel, hai inditi naaro haogu bambaru au rababehi hangko i koli. Hangko i pobambaruana iti, Betel ara ntanda i Katampua alo, hai Ai ara ntanda i Mata alo. Inditi napopombeusu-usumi watu mewali hambua pohuwea popenomba, hai menomba i Pue. 9 Roo indo, lao mbulimi monontohi tampo Negeb.
Abram i tampo Masiri
10 I tempo iti, tampo Kanaa narumpa rimi mahile. Ido hai pane Abram hantambi melimbahe lao i tampo Masiri bona maidahe inditi duuna liu rimi mahile. 11 Ina hawemohe i tampo Masiri, Abram mouliangaa Sarai, “Ene, kuisa oio haduako towawine au makara ntepuu. 12 Ane raitako to Masiri, hangangaa rauli towawinengkuko. Ane nodo, hangangaa ina rapapatena bona raalako. 13 Agina nuuliangaahe adingkuko bona tuwo peana hai maahi lalunda iriko anti kaoiona.”
14 Kahawenda i tampo Masiri, raita to Masiri Sarai iti makara mpuu. 15 Karaitana topobagona datu kamakarana Sarai iti, laomi rapahawe i Pirao datunda.a Ido hai napopeantimi Pirao i souna bona napotambia. 16 Anti pampokaeluna Sarai, napeinao moala laluna Abram, ido hai mowei Abram paka-pakana, nodo: hawi, dimba, towau, japi, kalide hai onta.
17 Anti poalana Sarai, Pue mopaara mampopengaa haki au melangaki i Pirao hai i ope-ope tauna au ara i souna. 18 Mewali, Pirao mokakiomi Abram, nauliangaa, “Apa tunggaiamu mobabehi nodo iriko? Moapari hai barana nuuliangaa ia iti towawinemuto? 19 Apa pongkana pane nuuli ia adimu? Anti babehiamu iti, ido hai kuala mewali towawinengku. Masala mpuuko! Ide towawinemu. Alamide hai laomoko!” 20 Hangko inditi, Pirao moparenta bahangkia topobagona bona mampopeloho Abram hai towawinena hangko i tampo Masiri hihimbela hai hinangka anu-anuna.