Peantoa i Babeli
11
1 I tempo iti tauna i humalele dunia, hampaka pea basanda hai himbela leteka pololitanda. 2 I temponda mokakahao ntanda i Mata alo, hawemohe i hambua lembo i tampo Sinear, hai maidamohe inditi. 3 Hambela tempo, mololitahe hadua hai hadua, rauli, “Maroa ane mobabehike watu tela hai tatunu leha-leha bona matua.” Mobabehi mpuumohe watu tela, hai rababehi wori taru au rapake mampopodai watu tela iti. 4 Roo nodo, mohawamohe, rauli, “Maimokau taaromi hambua wanua, hai taaro wori haogu sou peantoa au mahile hai kapangkana hawe i langi. Hangangaa tababehi nodo bona tebambari kamahilena hanganta hai datike tegaa-gaa i humalele dunia.”5 Tanganda moaro wanua hai sou peantoa iti, mendaulumi Pue mampeita apa au rababehi manusia, 6 pane Nauli, “Peita, tauna idehe hambua pea basanda, hai maida sambelahe i lalu hangamba. Ide hangko pepongkana bagonda. Ane mahae-hae nodo, apa pea au ratunggai hangangaa ina mewali. 7 MendaulumoKe lao mampopontani-ntani basanda bona barapohe mombeisa mpobasa hadua hai hadua.” 8 Napopontani-ntani mpuumi basanda duuna mengkaroohe moaro wanua iti hai mahawu-hawumohe i humalele dunia. 9 Ido hai wanua iti rahanga Babeli,a lawi inditimi Pue mampopontani-ntani basanda duuna mahawu-hawuhe i humalele dunia.
Pemuleanahe Sem
10 Idemi pemuleana Sem. Liumi rompare dunia nalaboa owai, Sem mopaara hadua tobalilo au rahanga Arpaksad. I tempo iti, tinuwuna Sem hangatu parena. 11 Hangko indo Sem tuwo mani lima atuna parena, hai ara mani anana au ntanina.
12 Handami tinuwuna Arpaksad talu pulona hai lima parena, ia mopaara hadua tobalilo au rahanga Sela. 13 Roo indo, Arpaksad tuwo mani iba atuna hai talu parena, hai ara mani anana au ntanina.
14 Handami tinuwuna Sela talu pulona parena, ia mopaara hadua tobalilo au rahanga Eber. 15 Roo indo, Sela tuwo mani iba atuna hai talu parena, hai ara mani anana au ntanina.
16 Handami tinuwuna Eber talu pulona hai iba parena, ia mopaara hadua tobalilo au rahanga Peleg. 17 Roo indo, Eber tuwo mani iba atuna talu pulona parena, hai ara mani anana au ntanina.
18 Handami tinuwuna Peleg talu pulona parena, ia mopaara hadua tobalilo au rahanga Rehu. 19 Roo indo, Peleg tuwo mani rongatu hai hahio parena, hai ara mani anana au ntanina.
20 Handami tinuwuna Rehu talu pulona hai rompare, ia mopaara hadua tobalilo au rahanga Serug. 21 Roo indo, Rehu tuwo mani rongatu hai pitu parena, hai ara mani anana au ntanina.
22 Handami tinuwuna Serug talu pulona parena, ia mopaara hadua tobalilo au rahanga Nahor. 23 Roo indo, Serug tuwo mani rongatu parena, hai ara mani anana au ntanina.
24 Handami tinuwuna Nahor rompulo hai hahio parena, ia mopaara hadua tobalilo au rahanga Tera. 25 Roo indo, Nahor tuwo mani hangatu hampulo hai hahio parena, hai ara mani anana au ntanina.
26 Liumi tinuwuna Tera pitu pulona parena, ia mopaara talu tobalilo, hanganda: Abram, Nahor hai Haran.
Pemuleana Tera
27 Idemi pemuleana Tera. Tera mopaara Abram, Nahor hai Haran. Haran mopaara hadua tobalilo au rahanga Looti. 28 I tempona mani umana tuwo, Haran mate i tampo pesupaana i wanua Ur i tamponda to Kasdim. 29 Abram mampotambia Sarai, hai Nahor mampotambia Milka anana Haran. (Ara mani anana Haran, hangana Yiska.) 30 Sarai iti bara moana lawi lalo.