Pemuleandahe Sem, Ham hai Yafet
10
1 Idemi pemuleanda Sem, Ham hai Yefet ananahe Noho. Karoona dunia nalaboa owai, mopaarahe bosa ananda au tobalilo.2 Pemuleana Yafet iamohe: Gomer, Magog, Madai, Yawan, Tubal, Mesek hai Tiras.
3 Pemuleana Gomer iamohe: Askenas, Ripat hai Togarma.
4 Pemuleana Yawan iamohe: Elisa, Tarsis, to Kitim, hai to Dodanim.
5 Pemuleanda tauna ide maidahe i wiwi ntahi. Ope-opehe iti pemuleanahe Yafet moula tinanda, tamponda hai basanda au montani-ntani.
6 Pemuleana Ham iamohe: Kus, Misraim,a Put hai Kanaa.
7 Pemuleana Kus iamohe: Seba, Hawila, Sabta, Raema hai Sabteka.
Pemuleana Raema iamohe: Seba hai Dedan.
8 Kus mopaara hadua tobalilo, hangana Nimrod. Iami au nguru-nguruna mewali tadulako au maroho hai makuasa. 9 Ia mewali wori hadua topoahu au mapande lawi nawati Pue. Idomi hai paka rauli tauna i ananda, “Tapeperapi bona nawatiko Pue Ala, hai bona mewaliko topoahu au mapande nodo Nimrod.” 10 Nguru-nguruna kadatuana iami wanua Babeli, Erek hai Akad i tampo Sinear. 11 Hangko inditi, Nimrod lao wori i tampo Asur, hai moaro wanua Niniwe, Rehobot-Ir, Kala 12 hai hambua wanua au rahanga Resen au ara i olo wanua Niniwe hai Kala.
13 Pemuleana Misraim iamohe: to Ludim, to Anamim, to Lehabim, to Naptuhim, 14 to Patrusim, to Kasluhim hai to Kaptorim. To Kasluhim iti iami toiorunda to Pelisiti.
15 Ananahe Kanaa iami au towutu Sidon hai Heti. 16 Kanaa iti mewali wori toiorunda to Yebusi, to Amori, to Girgasi, 17 to Hewi, to Arki, to Sini, 18 to Arwadi, to Semari hai to Hamati.
To Kanaa iti mahawu-hawuhe duuna maemba tamponda. 19 Tampana tamponda iti mepongka i wanua Sidon ntanda i Raa hawe i wanua Gerar ntanda i Lau hungku i Gasa hai ntanda i Mata alo mepongka i Sodomo, Gomora, Adma, Seboim, hawe i wanua Lasa.
20 Ope-ope iti pemuleana Ham moula tinanda, tamponda hai basanda au montani-ntani.
21 Sem, wutuna Yafet, iami toiorunda ope-ope to Ibarani.b
22 Pemuleana Sem iamohe: Elam, Asur, Arpaksad, Lud hai Aram.
23 Pemuleana Aram iamohe: Us, Hul, Geter hai Mas.
24 Arpaksad mopaara Sela, hai Sela mopaara Eber.
25 Eber mopaara rodua tobalilo, au towutu hangana Peleg hai au toadi hangana Yoktan. Au towutu rahanga Peleg,c lawi i tempo iti tauna mogaa-gaamohe moula tinanda tauna.
26 Pemuleana Yoktan iamohe: Almodad, Selep, Hasar-Mawet, Yerah, 27 Hadoram, Usal, Dikla, 28 Obal, Abimael, Seba, 29 Opir, Hawila hai Yobab. Ope-opehe iti pemuleanahe Yoktan.
30 Tampana tamponda mepongka i Mesa hawe-hawe i Separ ntanda i Mata alo. Tamponda au hungku i Separ mobulu-bulu.
31 Idemohe pemuleana Sem moula tinanda, tamponda hai basanda au montani-ntani.
32 Idemohe pemuleana Noho moula potinanda hai tamponda i karoona dunia ide nalaboa owai. Hangko irihira itimi, mahawu-hawu ope-ope tauna i humalele dunia.