Podandina Pue Ala hai Noho
9
1 Roo indo, Pue Ala mowati Noho hihimbela hai ananahe, Nauli, “Memule-mulemokau bona bosahe pemuleami mampaidai humalele dunia. 2 Hinangka binata, tadasi, hai ikane ina langahe irikamu. Ope-ope Kuweikau bona nikuasaihe. 3 Hangkoia Kuweikau hinangka tuda-tuda mewali paandemi. Ide-ide Kuwei worimokau ope-ope au tuwo i dunia mewali paandemi. 4 Agaiana inee mpuukau moande bau au ara mani wahena, lawi wahe iti au mopaara katuwo. 5 Ane hadua tauna mopapate hangka manusiana, ia hangangaa rapapate. Nodo wori ane hambaa binata mopapate manusia, binata iti hangangaa rapapate wori. 6 Manusia Kuteru moula lenggeKu hai poantiKu. Idomi hai hema pea au mopapate hadua tauna, ia hangangaa rapapate wori.7 Memule-mulemokau duuna humalele dunia ide nipaidai.”
8 Napaliliumi Pue Ala lolitaNa i Noho hai i ananahe, Nauli, 9 “Ide-ide mopaaraNa dandi irikamu hai i ope-ope pemuleami, 10 hai i hinangka tadasi hai binata au mesuwu hihimbela hai ikamu hangko i duanga mahile. 11 Idemi dandiKu irikamu: dunia ide barapi ina Kulaboa hai owai, hai hinangka au tuwo i dunia barapi ina Kupamaropu hai owai. 12 Ide-ide ina Kuweikau hampaka tanda au mopakaroho dandiKu irikamu hai ope-ope pemuleami hai i hinangka au tuwo i dunia. 13 Ina Kupaara mporagia i gawu au mewali tanda podandiKu i hinangka au tuwo i dunia. 14 Ane Kupaara gawu i wongko dunia hai ara mporagia i olona, 15-16 ina Kuita hai Kukatuinao podandiKu au bara mokahopoa irikamu hai i ope-ope au tuwo i dunia. Ane niita mporagia iti, ina niisa kadanapi ina Kulaboa dunia ide hai owai, alana maropu hinangka au tuwo. 17 Itimi tanda podandiKu au Kupaara i hinangka au tuwo i wongko dunia.”
Noho hai ananahe
18 Mesuwuhe ope-ope anana Noho hangko i duanga mahile iti iami, Sem, Yafet hai Ham. (Ham iami umana Kanaa au mewali toiorunda to Kanaa.) 19 Anana Noho iti mewalihe toiorunda ope-ope tauna i humalele dunia.
20 Bagona Noho, iami topobonde. Iami au nguru-nguruna mobabehi bonde anggoro. 21 Hambela tempo, Noho maenu anggoro duuna malangu. Nawosuimohe hampina pane lao maturu i lalu bambaruna. 22 Ham moita umana au bara mehampi, hai roo indo mesuwu lao i raoa mopahawe i wutunahe apa au naita iti. 23 Hangko inditi, laomohe Sem hai Yafet moantihe hantau komo rabinihi i taleunda. Molumao ntaleuhe mesua i bambaru, hai komo iti rakomokia umanda au tangana leta. Molumao ntaleuhe datihe moita umanda au mengkabela. 24 Nahadiami Noho hangko i kamalanguna, nahadimi apa au nababehi Ham, anana au toadi. 25 Ido hai nauli:
“Kanaa hangangaa tegane anti babehiana Ham umana!
Ia ina mewali hawinda wutuna au tepaiwoi mpuu tuwona.”
26 Nauli mbuli Noho,
“Tetoiami Pue au napenombai Sem.
Pogiangaa Kanaa mewali hawina.
27 Kuperapi i Pue Ala
bona paidaana Yafeta rapamaemba,
hai bona pemuleana maida sambelahe hai pemuleana Sem,
agaiana Kanaa pogiangaa mewali hawinda.”