Kamausuna owai
8
1 Nauri nodo kanalaboana dunia, Pue Ala mia-mia mokadipura Noho hai ope-ope binata au ara i lalu duanga iti. Ido hai napaarami Pue Ala himburu kebuu bona owai mepongka mausu. 2 Rara owai au ara i lalu tampo hai au ara i langi Natukomi. Barapi keuda i dunia 3 alana owai mausu liliu. Liumi hangatu lima pulona alona iti, barapi mapangka owai i dunia. 4 Mewali i kahampulona hai pitu alona i wula kapitu, duanga iti tehompomi i wongko bulu Ararat. 5 Hangko indo, owai au mobukehi dunia mausu liliu, hai i alo kaisa i wula kahampulo, raitami wowo bulu.6 Handami iba pulona alona, Noho mobungkahimi sungkeke duangana, 7 hai mopaloho hambaa tadasi kaloa. Tadasi iti bara mesule i duanga mahile, node hou node mai pearai membaro duuna owai mausu ntepuu. 8 Roo indo, Noho mopaloho mbulimi tadasi manggebodo bona naisa mpuu kamausunami owai, 9 agaiana tadasi iti bara mani molambi pemuangaana, lawi owai mobukehi mani humalele tampo. Ido hai tadasi iti mesule hule i duanga mahile. I pesulena tadasi iti, Noho moulu taiena hai modoko tadasi iti mesua. 10 Napetumua mani Noho pitu alona, hai napaloho mbuli tadasi manggebodo iti. 11 Kalumbami, mesulemi tadasi iti i Noho hai mampohama hampeka tawe saitun. Hangko indo, naisami Noho kamausuna owai. 12 Kaliliuana napegia mbuli pitu alona, hai napaloho hule tadasi manggebodo iti, agaiana tadasi iti barapi mesule iria.
13 Handami tinuwuna Noho ini atuna hai hampare, i alo kaisa i wula kaisa, owai mausu ntepuumi. Mewali nabungkahimi Noho atu duanga mahile iti, hai napeita mantoleli. Naita barapi mahae tampo ina bangi. 14 I alo karompulo hai pitu i wula kadua, bangi mpuumi ope-ope tampo.
15 Mongkora mbulimi Pue Ala i Noho, Nauli, 16 “Mesuwumoko hangko i duanga iti hihimbela hai towawinemu, hai anamuhe hai towawinenda. 17 Nupopesuwumohe ope-ope tadasi hai binata, maroa au mahile ba au kokoi bona memulehe i humalele dunia.” 18 Mesuwu mpuumi Noho hangko i duanga iti hihimbela hai towawinena, ananahe hai towawinenda. 19 Mesuwuwomohe ope-ope tadasi hai binata hangko i duanga mahile, paka-pakana hahambokohe.
Noho moanti popenombana
20 I pesuwuna Noho hangko i duanga mahile, napopombeusu-usumi watu moaro hambua pohuwea popenomba i Pue. Roo nodo, naalamohe hangko i paka-pakana tadasi hai binata au hintoto rapopenomba. Binata iti nahuhuhe i Pue, mewali popenomba rahuwe. 21 Pue mampokatana popenombana Noho au mawongi iti. Ido hai nauli laluNa,
“Dunia ide barapi ina Kugane hai Kulaboa
mohurungi babehia manusia.
Nauri kadake lalunda tauna mepongkapi hangko i kaanangkoinda,
barapi ina Kupamaropu hinangkana au tuwo i dunia
nodo au Kubabehi ide.
22 I tempona mani dunia ide ara,
hangangaa ara liliu:
tempo mantuda hai tempo mepare,
tempo makuli hai tempo mapana,
tempo madii hai tempo keuda,
hai hangangaa ara wori
mabaa hai kaindi.”