Pewalina 7

Dunia nalaboa owai

1 Mongkorami Pue i Noho, Nauli, “I olonda tauna i dunia, oio pea au mampeulai hinangka hawaNgku. Mewali, mesuamokau hantambi i lalu duanga mahile hihimbela hai tinamu. 2 Nupopesuamohe pitu bokona hangko i paka-pakana binata au peisa rapopenomba Iriko. Ane binata au ntanina, hamboko pea au nuanti. 3 Nupopesua worihe pitu bokona hangko i paka-pakana tadasi. Ope-ope iti hangangaa nubabehi bona arahe hangko i hampaka-hampaka binata au tuwo hangko i pelaboa owai alana memule mbulihe i dunia. 4 Pitu rai alona ina Kupopendaulu uda au bara ombo i lalu iba pulona alona hai iba pulona wengina alana tunami ope-ope au tuwo i dunia au Kupopewali hangkoia.” 5 Ope-ope au nahawa Pue, napeulai mpuumi Noho.

6 I tempona dunia nalaboa owai, tinuwuna Noho ini atuna parena. 7 Noho hai towawinena, hihimbela hai ananda hai towawinenda, mesuamohe i lalu duanga mahile bona tehoremahe hangko i pelaboa owai. 8 Hawe worimohe paka-pakana tadasi hai binata, maroa au peisa rapopenomba i Pue Ala maroa au bara, nodo worihe binata au mendele. 9 Maihe i Noho hahamboko hai mesuamohe i lalu duanga mahile, lawi nodo parentana Pue Ala. 10 Pitumi alona hangko i pongkorana Pue i Noho, dunia mepongkami nalaboa owai.

11 Inimi atuna parena tinuwuna Noho, i alo kahampulo hai pitu i wula kadua, tebungkahimi hinangkana rara owai i lalu tampo. Hai langi tebungkahi worimi duuna kebuu uda. 12 Uda iti toa liliu i lalu iba pulona alona hai iba pulona wengina kamahaena. 13 I tempo iti, Noho hai towawinena mesuamohe i lalu duanga mahile hihimbela hai ananahe, iami Sem, Ham hai Yafet hai towawinenda. 14 Hihimbela hai ihira ara worihe paka-pakana tadasi hai binata, maroa au manondo hai au maila, maroa au mahile ba au kokoi ba au mendele. 15-16 Moula hawana Pue Ala i Noho, ope-ope binata iti mesuahe i lalu duanga mahile hihimbela hai ia, hampaka-hampaka hahambokohe. Mesuamohe ope-ope, natukomi Pue baba duanga iti.

17-18 I lalu iba pulona alona hai iba pulona wengina iti, kamapangka-pangkaami owai au molaboa dunia duuna tampumi tampo, hai duanga iti monanto-nantomi i wongko owai.19 Tetetambai liliumi kangkaiana owai alana tampumi ope-ope bulu.20 Nodo mpuumi pewalina duuna kapangka owai iti pitu mete hangko i wongko bulu.21-23 Pue Ala mopatuna hinangkana au tuwo i dunia ide, iami manusia, mampopengaa tadasi hai hinangkana binata, maroa au maila ba au manondo, maroa au mahile ba au kokoi. Batena pearai Noho hai hinangkana au ara i lalu duangana au bara Napatuna Pue Ala.24 I lalu hangatu lima pulona alona, owai iti mobukehi dunia ide.