Pewalina 6

Kakadakena Manusia

1 Mahae-hae, tetambaimi kabosanda tauna duunda tuwo i humalele dunia, hai kabosa-bosaa worihe ananda au towawine. 2 Anantomoanenda tomakuasa^a moita kamakaranda anantowawine to i dunia, hai rapotambia hema pea au raunde. 3 Mongkorami Pue, Nauli, “InaoNgku bara ina maida liliu i manusia hawe i hae-haena lawi manusia hangangaa mate. Mepongka ide-ide tinuwunda bara peisa melumbu hangko i hangatu rompulo parena.”^b 4 I tempo iti, arahe tauna au mahile ntepuu au tuwo i dunia. Ihira pemuleanda anantowawine au motambihe hai tauna au napoana Pue Ala. Pemuleanda iti mewalihe tadulako au maroho hai au teadai hangkoia.

5 Naitami Pue karumihina kakadakenda tauna i dunia; ope-ope pekirinda kadake haha. 6 Ido hai menosomi Pue. Nauli laluNa, “Keaginami manusia ide barahe Kupopewali i dunia.” 7 Nauli mbuli Pue, “Ina Kupatunahe hihimbela hai hinangkana tadasi hai binata au ntanina. MenosoNa lawi barapi Kuunde apa au Kupopewali.” 8 Agaiana ara hadua tauna au mopamatana laluna Pue, iami Noho.

Noho

9-10 Idemi tuntukana Noho. Anana talu, paka tobalilo iamohe, Sem, Yafet hai Ham. Noho ide, tauna au manoto laluna, au bara rasalai tauna hai au maroa mpuu pohintuwuna hai Pue Ala. 11 Agaiana i tempo ido, ope-ope tauna ntanina kadakehe i peitana Pue Ala, hai iumba-umba pea rumihi kamasekenda. 12 Pue Ala moita dunia ide bukemi hai dake, lawi ope-ope tauna moula peahe lalunda au motengko.

13 Mewali, mongkorami Pue Ala i Noho, Nauli, “Kubotusimi, ina Kupatunahe hinangkana au tuwo i dunia ide, lawi anti pebabehianda manusia, dunia ide bukemi hai dake.

14 Mewali hangangaa nubabehi haogu duanga mahile hangko i kau gofir. I lalu duangamu iti, hangangaa nubabehi wori lincu-lincu. I raoana hai i laluna hangangaa nutaru.15 Kangkalangana duanga iti hangangaa hangatu talu pulona hai talu mete, kamaembana rompulo hai romete, hai kapangkana hampulo hai talu mete.16 Hangangaa ara wori atuna, hai pariolona atu hai rindi hangangaa iba pulona hai iba senti. Duanga ide hangangaa talu usuna, hai nubabehi babana i tumpipina.17 Hangangaa nubabehi nodo, lawi ina Kupaara owai au molaboa dunia ide duuna ope-ope au tuwo i dunia matehe maliso,18 agaiana irio, ina Kupaara hambua dandi au ina mopahintuwu oio hai Iko. Mesuamokau i duanga mahile iti hihimbela hai towawinemu, anamuhe hai towawinenda.19 Hangangaa nupopesuahe i lalu duangamu paka-pakana tadasi hai binata au tuwohe i dunia, ntuama hai ntina, balilo hai wawine datihe mate maliso.20 Ope-ope binata iti ina hawehe irio bona tuwohe.21 Hangangaa nuanti hinangkana paande au nuparaluu hai au hintoto raande ope-ope binata iti.”22 Hinangkana au nahawaa Pue Ala napeulai mpuumi.