<<    <     Pewalina     5     >    >> 
Pemuleana Adama
5
1 Idemi pombeusuna pemuleana Adama. I tempona Pue Ala mampopewali manusia, Nababehihe moula wataNa haduduaNa. 2 Napopewalihe tobalilo hai towawine. Nawatihe hai Nahangahe “manusia”.
3 Hangatumi talu pulona parena tinuwuna Adama, ia mopaara mbuli hadua tobalilo au ina himbela hai lenggena, hai nahanga Set. 4 Hangko indo, Adama tuwo mani ualu atuna parena, hai ara mani anana au ntanina.
5 Tinuwuna hahio atuna talu pulona parena, hangko materi.
6 Handami tinuwuna Set hangatu lima parena, ia mopaara hadua tobalilo, hangana Enos. 7 Hangko indo, Set tuwo mani ualu atuna hai pitu parena, hai ara mani anana au ntanina. 8 Tinuwuna hahio atuna hampulo hai rompare, hangko materi.
9 Handami tinuwuna Enos hahio pulona parena, ia mopaara hadua tobalilo, hangana Kenan. 10 Hangko indo, Enos tuwo mani ualu atuna hampulo hai lima parena, hai ara mani anana au ntanina. 11 Tinuwuna hahio atuna hai lima parena, hangko materi.
12 Handami tinuwuna Kenan pitu pulona parena, ia mopaara hadua tobalilo, hangana Mahalaleel. 13 Hangko indo, Kenan tuwo mani ualu atuna iba pulona parena, hai ara mani anana au ntanina. 14 Tinuwuna hahio atuna hampulo parena, hangko materi.
15 Handami tinuwuna Mahalaleel ini pulona hai lima parena, ia mopaara hadua tobalilo, hangana Yared. 16 Hangko indo, Mahalaleel tuwo mani ualu atuna talu pulona parena, hai ara mani anana au ntanina. 17 Tinuwuna ualu atuna hahio pulona hai lima parena, hangko materi.
18 Handami tinuwuna Yared hangatu ini pulona hai rompare, ia mopaara hadua tobalilo, hangana Heno. 19 Hangko indo, Yared tuwo mani ualu atuna parena, hai ara mani anana au ntanina. 20 Tinuwuna hahio atuna ini pulona hai rompare, hangko materi.
21 Handami tinuwuna Heno ini pulona hai lima parena, ia mopaara hadua tobalilo, hangana Metusala. 22 Hangko indo, ia tuwo mani talu atuna parena. I tempo iti maroa mpuu pohintuwuna hai Pue Ala, hai ara mani anana au ntanina. 23 Heno iti tuwo i dunia duuna tinuwuna talu atuna ini pulona hai lima parena. 24 Maroa mpuu pohintuwuna hai Pue Ala, hai kahopoana naoremi Pue Ala; barapi raita i dunia.
25 Handami tinuwuna Metusala hangatu ualu pulona hai pitu parena, ia mopaara hadua tobalilo, hangana Lamek. 26 Hangko indo, Metusala tuwo mani pitu atuna ualu pulona hai rompare, hai ara mani anana au ntanina. 27 Tinuwuna hahio atuna ini pulona hai hahio parena, hangko materi.
28 Handami tinuwuna Lamek hangatu ualu pulona hai rompare, ia mopaara hadua tobalilo. 29 Nauli Lamek, “Anangkoi ide ina mopalindoke i pobagonta au mantimi, lawi tampo au tapobago ide naganemi Pue.” Idomi hai Lamek mohanga anangkoi iti Noho.a 30 Hangko indo, Lamek tuwo mani lima atuna hahio pulona hai lima parena, hai ara mani anana au ntanina. 31 Tinuwuna pitu atuna pitu pulona hai pitu parena, hangko materi.
32 Handami tinuwuna Noho lima atuna parena, ia mopaara talu tobalilo, iamohe Sem, Ham hai Yafet.