Kai hai Habeli
4
1 I pombekadipuranda Adama hai Hewa, moanamohe hadua tobalilo. I tempo iti, nauli Hewa, “Anti petulungina Pue iriko, kulambi hadua tobalilo.” Ido hai ananda rahanga Kai.a 2 Roo indo, moana mbulimi hadua tobalilo, hangana Habeli. Habeli iti mewali toporewu dimba, hai Kai mewali topobonde. 3 Bara mahae hangko indo, Kai moalami hangkira hangko i powiana, hai napopenomba i Pue. 4 Nodo wori Habeli, moalami bahangkia ulu ana dimbana, nasambale, hai ontona au marombu napopenomba i Pue. Habeli hai popenombana napokatana Pue, 5 agaiana Kai hai popenombana bara Napokatana. Ido hai rumihi mpuu karumpuna Kai hai matua lindona. 6 Mololitami Pue iria, Nauli, “Moapari hai rumpuko? Moapari hai matua lindomu? 7 Ane maroa babehiamu, hangangaa Kupokatanako. Agaiana ane kadake babehiamu, hangangaa nakuasaiko dosa. Dosa iti naunde mokuasai lalumu, agaiana hangangaa nuewa duuna nunangi.”8 Roo nodo, Kai mowawaha Habeli, nauli, “Maiko, laoke i bonde.” Tanganda i bonde, Kai mowombe adina, hai napapate.
9 Pue mekune i Kai, Nauli, “Iumbami adimu?”
Mehana Kai, “Bara kuisa. Ide iko barana topokampai adingku!”
10 Liliu nauli Pue, “Moapari hai nubabehi dake ide? Wahena adimu au mabubu i tampo meraroa Iriko bona Kuhurungi babehiamu au kadake. 11 Idemi hukuamu:
Rawuramoko hangko i tampo ide,
lawi tampo ide nakabubuimi wahena adimu au nupapate.
12 Ane nupantuda-ntudai tampo ide,
tuda-tudamu bara ina mowua.
Hangangaa mewaliko topolilo
au melimba-limba.”
13 Mololitami Kai i Pue, nauli,
“Mantimi gaga hukuangku ide.
Bara kusauru mohalea!
14 Nuwurana kakarao hangko i paidaa ide
hai karao worina hangko Irio.
Ina mewalina topolilo
au melimba-limba i dunia ide.
Mewali, hema pea au mampohidupaana
hangangaa rapapatena.”
15 Agaiana nauli Pue, “Bara nodo. Hema au mopapateko, tauna iti ina molambi pehuku pitu belana karumihina hangko i apa au nababehi irio.” Roo mololita nodo, Nawolimi tanda i Kai bona inee rapapate hema-hema au mampohidupaa. 16 Mewali, padumi Kai hangko i lindona Pue, hai maida i tampo au rahanga Nod.b Tampo iti ara ntanda i Mata alona bonde Eden.
Pemuleana Kai
17 Kai hai towawinena moanahe hadua tobalilo au rahanga Heno. Roo indo, Kai moaro hambua wanua. Wanua iti nahanga Heno moula hangana anana. 18 Heno mopaara Irad. Irad mopaara Mehuyael. Mehuyael mopaara Metusael, hai Metusael mopaara Lamek. 19 Lamek iti, rodua towawinena, hanganda Ada hai Sila. 20 Ada mampoanaka Yabal. Yabal hai pemuleana au nguru-nguruna mokadipura binata hai maidahe i bambaru. 21 Adina rahanga Yubal. Yubal hai pemuleana au nguru-nguruna mokecapi hai motulali. 22 Sila mampoanaka wori hadua tobalilo au rahanga Tubal-Kai. Tubal-Kai hai pemuleana au nguru-nguruna mobabehi hinangkana parewa hangko i tambaga hai besi. Adina Tubal-Kai au towawine, rahanga Naama.
23 Hambela tempo, mololitami Lamek i rodua towawinena, nauli,
“Ada hai Sila, nipehadingi wotungku,
Ee ikamu towawinena Lamek, nitaa talingami i lolitangku ide:
Mopapatemona hadua tobalilo lawi nabelaina;
mopapatena hadua pamuda au mopapahaina.
24 Ane ara hadua au mopakarugi Kai,
rabalasi pitu belana karumihina.
Agaiana iko, ane rasilakaina tauna,
ia ina rabalasi pitu pulona hai pitu belana karumihina.”
Set hai Enos
25 Adama hai Hewa moana mbulihe hadua tobalilo. Nauli Hewa, “Naweina Pue Ala hadua tobalilo, pahuruna Habeli au napapatemi Kai.” Ido hai nahanga Set.c 26 Set mopaara hadua tobalilo, au nahanga Enos.
Tempo itimi, tauna mepongkahe mokabelai hangana Pue ane menombahe.d