Manusia manawo i lalu dosa
3
1 Ara hambaa ile au melumbu akalana hangko i hinangka binata au napopewali Pue Ala. Hambela tempo, ile iti mekune i towawine, nauli, “Tou mpuu pae barakau napaliu Pue Ala moande hinangkana wuangkau au ara i bonde ide?”2 Mehana towawine iti, “Hinangkana wuangkau au ara i bonde ide peisatohe kiande, 3 agaiana kana i kau au ara i tanga-tanga bonde ide, Pue Ala mongkora node, ‘Inee mpuu niande wuana ba nitobo, lawi ane niande ba nitobo hangangaa matekau.’ ”
4 Mehana ile, nauli, “Iti bara tou; barakau ina mate. 5 Pue Ala manguli nodo, lawi Naisa, ane niande wuangkau iti, ina tebungkahi pekirimi. Hai ikamu ina himbela hai Pue Ala, lawi ina niisa apa au maroa hai apa au kadake.”
6 I kanatotokina towawine wuangkau iti, naita makara mpuu hai matama raande. Nauli laluna maroa mpuu ane kuisa hinangkana. Ido hai napupumi wuangkau iti, hai naande, hai liliu nawei wori tobalilona bona naande. 7 Roo nodo, liliu tebungkahi mpuumi pekirinda, hai raisami kadanda mehampi. Idomi hai mangalahe tawe kau ara, raparampi rapopotabungi watanda.
8 Kalumbami, tohamboko iti mohadimohe Pue Ala molulumao i lalu bonde iti, ido hai mentabungihe i olo-olo kau bona datihe Naita.
10 Mehana Adama, “Idetona Pue. I kakuhadiMu molulumao i bonde, ido hai langana panena mentabungi lawi barana mehampi.”
11 Mekune Pue Ala, Nauli, “Hema au mouliangaako kadamu mehampi? Inee mpuu pae nuandemi wuangkau au Kuhomboakau inee niande.”
12 Mehana Adama, “Towawine au Nuweina kuporanga, iami au moweina wuangkau iti pane kuande.”
13 Mekune mbuli Pue Ala i towawine iti, “Moapari hai nubabehi nodo?”
Mehana towawine iti, “Naakalangina ile, ido hai kuande wuangkau iti.”
Pehukuna Pue Ala
14 Roo nodo, Pue Ala mololita i ile iti, Nauli node,
“Anti pebabehiamu iti,
oio hangangaa rahuku.
Hangko i hinangka binata,
batena oio au tegane.
Mepongka ide-ide duumu mate,
oio hangangaa mendeleko hai taimu,
hai awu tampo pea paandemu.
15 Ina Kupopoiwaliko hai towawine iti.
Pemuleamu hai pemuleana ina mombepoiwali liliuhe.
Pemuleana ina motampaidoki waamu,a
hai oio ina motilo tangkadona pemuleana.”
16 Hangko indo, nauli Pue Ala i towawine iti:
“Iko ina motambai mpuu kamaparimu
i tempomu mantimi ba moana.
Agaiana kehapiri nodo,
batena pea nuunde moiluhi hai tobalilomu,
hai tobalilomu ina makuasa irio.”
17 Nauli mbuli Pue Ala i Adama,
“Anti pampeulaimu lolitana towawinemu,
ido hai nuandemi wuangkau au Kuuliangaakau: ‘Inee niande.’
Anti babehiamu iti,
tampo teganemi.
Ido hai hangangaa mapari nuhadi masaoki paandemu.
Mepongka ide-ide duumu mate,
hangangaa mobago mantimiko,
bona tampo ide nupolambii paandemu sukana nupotuwo.
18 Ngkaia hehi hai dui ina tuwo i tampo.
Apa au tuwo i pada ina mewali paandemu.
19 Ina mapari nuhadi mobago.
Hangangaa mobago mantimiko,
hangko molambiriko paandemu.
Nodomi katuwomu duuna mesule huleko i tampo,
lawi hangko i tampo Kuteruko,
hai ina mesuleko mewali tampo.”
20 Hangko inditi, Adama mohanga towawinena iti Hewab lawi iami au ina rapoina ope-ope tauna au tuwo i dunia. 21 Roo indo, Pue Ala mobabehiahe hampinda hangko i koli binata hai Nahampiangaahe.
Adama hai Hewa rawurahe hangko i bonde Eden
22 Nauli Pue Ala, “Ide-ide manusia himbelamohe hai Ikita, lawi raisami apa au maroa hai apa au kadake. Mewali hangangaa Tapakaraohe hangko i bonde ide datihe moande wua kau ngkatuwo alana tuwo liliuhe hawe i hae-haena.” 23 Ido hai tohamboko iti Nawuramohe Pue Ala hangko i bonde Eden, hai Natuduhe mampobago tampo, lawi hangko i tampo itimi watanda Nateru hangkoia.
