Pewalina 2

1 Nodomi Pue Ala mampopewali langi, tampo hai hinangka ihina i lalu ini alona kamahaena. 2 I alo kapitu, Pue Ala mengkaroomi lawi hopomi bagoNa. 3 Alo kapitu iti Nawati hai Napamalelaha, lawi i alo iti, Ia mengkaroomi hangko i ope-ope bagoNa au roo hahamohe Napobago. 4 Nodomi lolitakana pewalina langi hai tampo.

Bonde i Eden

I tempona Pue Ala mampopewali langi hai tampo, 5 bara mani ara tuda-tuda au membeti hai tuwo, bara mani wori ara hehi hai kau i tampo, lawi Pue bara mani mampopendaulu uda i tampo hai bara mani ara tauna au mampobago tampo iti. 6 Agaiana owai au i woi tampo mepongkami melomba mopamasii tampo. 7 I tempo itimi, Pue Ala moteru hadua manusia hangko i awu tampo. Roo indo, Pue Ala motawue onge manusia iti bona molambi inao ngkatuwo, pane tuwo mpuumi.

8 Kaliliuana Pue Ala mobabehi halimbo bonde i tampo Eden ntanda i Mata alo, hai Napopaidami inditi, manusia au Napopewali iti. 9 I bonde iti, Pue Ala mopatuwo mampopengaa kau au makara hai au matama wuana. I tanga-tanga bonde iti ara rompoa kau, iami: hampoa kau ngkatuwo hai hampoa kau au mopakanoto apa au maroa hai apa au kadake.

10 Ara hambua owai au moili hangko i tampo Eden au moowaihi bonde iti. I raoa bonde, owai iti mopenga iba. 11 Pengana au kaisa, hangana Piso, au moili motoleliki tampo Hawila au nakaarai bulawa. 12 (Bulawa inditi maroa; hai indo ara wori anu-anu mawongi hai watu paramata.) 13 Pengana au kadua, hangana Gihon, au moili motoleliki tampo Kusi. 14 Pengana au katalu, hangana Tigris, au moili i hambali tampo Asur ntanda i Mata alo, hai pengana au kaiba, hangana Eprat.

15 Pue Ala mampopaida Adama i bonde iti bona napobago hai nakadipura.

16 Pue Ala mampohawaami Adama, Nauli, “Hinangka wuangkau au ara i bonde ide peisa nuande,17 agaiana wuangkau au mopakanoto apa au maroa hai apa au kadake, inee mpuu nuande. Ane nuande iti, hangangaa mateko.”

18 Mololita mbulimi Pue Ala, Nauli, “Bara maroa ane tauna iti tuwo sadudua. Hangangaa Kuteru rangana au hintoto motulungi i bagona.” 19 Naalami tampo haodi hai moteru mampopengaa binata au tuwo i lore hai tadasi au ara i laerawa. Hinangkana binata naantihe Pue Ala i lindona Adama bona naitahe hai nahangahe. Nodomi karahanganda binata i lore hai i laerawa. 20 Mewali manusia iti mohangahe hinangkana binata au i lore hai au i laerawa, agaiana bara mani mpuu ara au hintoto motulungi i bagona.

21 Hangko indo, Pue Ala mopaleta mposo Adama, hai Naala ohona hangkau pane Natuko hule hai onto. 22 Hangko i oho iti, Nateru hadua towawine, hai Naanti i Adama. 23 Nauli Adama:

Idemi ia au himbela hai iko!

Buuna hangko i buungku.

Ontona hangko i ontoku.

Ina kuhanga towawine,

lawi ia raala hangko i tobalilo.

24 Ido hai tobalilo hangangaa mopalehi umana hai inana, hai tuwo hihimbela hai towawinena bona mewalihe hawata-wata.

25 Tobalilo hai towawine iti, barahe mehampi, agaiana barahe mombepokaea.