Pewalina
Lolitakana pewalina dunia
1
1 Nguru-nguruna Pue Ala mampopewali langi hai tampo.
2 Tempo iti dunia bara mani molenggea hai bara mani ara au tuwo. Ope-ope nabukehi mani owai, hai rumihi mani kamakaindina, agaiana Inaona Pue Ala mokale liliu i wongko owai.
3 Hangko inditi, Pue Ala mongkora, Nauli, “Mewalimi baa!” Liliu mewali mpuu mabaa.
4 Matana laluNa moita kamaroana apa au Napopewali. Roo indo, Nagaami au mabaa hai au makaindi.
5 Au mabaa Nahanga “mabaa”, au makaindi Nahanga “kaindi”. Liumi kaindi, madondomi. Itimi alo au kaisa.
6 Roo nodo, mongkorami Pue Ala, Nauli, “Hangangaa ara laerawa au mogaa ope-ope owai i rombua paidaa.”
7 Nodomi Pue Ala mampopewali laerawa, hai mampopogaa owai i rombua paidaa, au ara i woi laerawa hai au ara i wongko.
8 Laerawa iti Nahanga “langi”. Liumi kaindi, madondomi. Itimi alo au kadua.
9 Roo indo, mongkora mbulimi Pue Ala, Nauli, “Owai au ara i woi laerawa hangangaa moili i hambua paidaa bona mesupa tampo.” Nodo mpuumi pewalina.
10 Tampo au bangi iti nahanga Pue Ala “lore,” hai poteruhua owai Nahanga “tahi”. Matana laluNa moita kamaroana hinangkana au Napopewali iti.
11 Roo nodo, Nauli mbuli Pue Ala, “Tampo hangangaa nakatuwoi hinangkana hehi hai kau, maroa au motumbe ba au molihu wuana bona ara hehi hai kau i dunia.” Nodo mpuumi,
12 tampo nakatuwoi mampopengaa hehi hai kau. Matana Pue Ala moita kamaroana hinangkana iti.
13 Liumi kaindi, madondomi. Itimi alo katalu.
14-15 Roo nodo, mongkora mbulimi Pue Ala, Nauli, “Hangangaa ara au mewangka i langi au mopamabaa dunia bona tegaa mabaa hai kaindi. Itimi pepongkana alo, wula hai pare.” Nodo mpuumi pewalina.
16 Pue Ala mampopewali rombua pewangka au mahile, iami alo au mokuasai mabaa, hai wula au mokuasai kaindi. I raoa hangko i alo hai wula, Napopewali wori ngkaia betue.
17 Ope-ope iti Nawolihe i langi bona mowangkahi dunia,
18 bona mokuasai mabaa hai kaindi hai bona mampopontani au mabaa hai au makaindi. Matana Pue Ala moita kamaroana apa au Napopewali iti.
19 Liumi kaindi, madondomi. Itimi alo au kaiba.
20 Mongkora mbulimi Pue Ala, Nauli, “Hangangaa arahe binata au tuwo i lalu owai, hai hangangaa ara worihe hinangka tadasi au membaro-mbaro i laerawa.”
21 Nodomi Pue Ala mampopewali binata, maroa au mahile ntepuu ba au kokoi au tuwo i tahi ba i hinangka owai. Napopewali worihe mampopengaa tadasi. Matana laluNa moita kamaroana ope-ope iti.
22 Roo indo, ope-ope au Napopewali iti, Nawati hai Naweihe parenta bona memule-mulehe duunda au tuwo i tahi mobukehi tahi hai tadasi tetambai kabosanda i dunia.
23 Liumi kaindi, madondomi. Itimi alo au kalima.
24 Mongkora mbulimi Pue Ala, Nauli, “Tampo hangangaa mampopesuwu mampopengaa binata, maroa au manondo ba au maila, maroa au mahile ba au kokoi.” Apa au Nauli mewali mpuumi.
25 Nodomi Pue Ala mampopewali mampopengaa binata, hai matana laluNa moita kamaroana apa au Napopewali.
26 Mongkora mbulimi Pue Ala, Nauli, “Ide-ide Ikita ina moteruKe manusia moula lenggeTa hai poantiTa. Ihira au ina mokuasai ope-ope ikane, tadasi, hai mampopengaa binata, maroa au manondo ba au maila, maroa au mahile ba au kokoi.”
27 Nodomi Pue Ala mampopewali manusia, hai manusia iti Napopewali moula wataNa haduduaNa. Napopewalihe tobalilo hai towawine.
28 Hangko indo, Nawatimohe, Nauli, “Memule-mulemokau duumi bosa bona pemuleami mopaidai hai mokuasai humalele dunia. Kuweikau bago moatoro hinangkana ikane, tadasi hai ope-ope binata au tuwo i tampo.”
29 Mongkora mbulimi Pue Ala, Nauli, “Paandemi, Kuweikau hinangkana tuda-tuda hai kau au molihu wuana.
30 Agaiana i ope-ope tadasi hai binata au maila, Kuweihe hinangkana hehi hai kau au motawe mewali paandenda.” Nodo mpuumi pewalina.
31 Napeitami Pue Ala hinangkana au Napopewali iti, hai matana mpuu laluNa moita kamaroana pewalina. Liumi kaindi, madondomi. Itimi alo au kaini.
