IMbombo izya Vhatumwa
Uvhwandilo
Umusimvi
Umusimvi uwa ikalaata ilya Mbombo izya Vhatumwa wu Luuka. ULuuka atáamile Muyuuda (aVhakolosaayi 4:7-14). Havhili ahajendaga nu mutumwa uPaavhuli uku nuukwo, áamile mumanyani waakwe umutungamu (2 uTiimoti 4:11). UPaavhuli akuti, uLuuka áamile wooka mu vhavhomvi avhamwavho (uFilimooni 24), havhili áamile “muganga unkundwa” (aVhakolosaayi 4:14).
Ahavhaliilizyo he ikalaata lyásimviilwe
ULuuka ásimvile ikalaata ilya Mbombo izya Vhatumwa mu maaha aga 62-63 kufuma pe uYeesu ápafiilwe. Ahavhaliilizyo iho áamile pooka nu Paavhuli mu nkaaya iya Luumi.
Umuntu we vhámusimbiiye
Ikalaata ilya Luuka ni lya Mbombo izya Vhatumwa ámusimbiiye umuntu wumo we vhahatinji uTeyofiilo. Mwa Luuka 1:3, uLuuka akumusimbila uTeyofiilo, kuuti wa “mushinzi nkaani”. Avhasambiilile avhinji avha Bibiliya vhakusiivha kuuti, uTeyofiilo atáamile Muyuuda, uweene ámwitisile uYeesu kufuma mu vhapiti avha ku Luumi.
Insiivho izya musimvi kusimba ikalaata ili
Ikalaata ilya Mbombo izya Vhatumwa, wujendeelezyo uwa ikalaata ilya Luuka (iMbombo izya Vhatumwa 1:1-2), kwe kuuti likwandila paala pe ikalaata ilya Luuka likusilila. Mwi kalaata ilya Mbombo izya Vhatumwa, uLuuka akupanga inongwa izya maaha 30 aga shivhanza isha ku vhwandilo kufuma pe uYeesu ásogooye ku mwanya. Ulukasamo lwakwe ulupiti lwámile kulolesya vwe uMulungu ásasiizye Izwi iLyinza ilya Yeesu kwandila mu Yelusaleemu kufishila mu nsi zyonti zye zyámanyisile ahavhaliilizyo haala. Havhili ahanzaga kulolesya vwe uMulungu áshikuziizye nu kushiloota ishivhanza kwi dala ilya mbombo izya Mupepo uMufinjile. Umutumwa uPaavhuli we inongwa zyakwe nyinji nkaani mwi kalaata ili.
Zye zili mwi kalaata ili
Ishivhanza isha ku vhwandilo (1:1-5:42)
Amayimba nu kusaata ukwa Izwi iLyinza ilya Yeesu (6:1-9:31)
Imbombo izya Peeteli (9:32-12:25)
Uvhulendo uvhwa kwanda uvhwa Paavhuli kusogola kulumbiilila (13:1-14:28)
Ulukuvhato ulwa ku Yelusaleemu (15:1-41)
Uvhulendo uvhwa vhuvhili uvhwa Paavhuli kusogola kulumbiilila (16:1-18:22)
Uvhulendo uvhwa vhutatu uvhwa Paavhuli kusogola kulumbiilila (18:23-21:14)
Kulemwa ukwa Paavhuli nu vhulendo vhwakwe kusogola ku Luumi (21:15-28:31)