18
UPaavhuli mu nkaaya iya Kolinto
1 Lwe zyatuuha izyo, uPaavhuli aheepa mu Aseene, ahasogola mu nkaaya iya Kolinto. 2 Ukwo ahahomaana nu Muyuuda wumo, we izina lyakwe vhahatinji wu Aakila, uyo ápafiilwe ku Ponto. UAakila pooka nu mushi waakwe uPuliisila vháfumile mu nkaaya iya Luumi mu nsi iya Itaaliya insiku ziniizyo, mwe pe umwene uKilavhudiyoa álajiziizye kuuti, aVhayuuda vhonti vheepe mu Luumi. Pe uPaavhuli ahasogola kumulamuha uAakila nu mushi waakwe. 3 Avheene vhahavhombaga imbombo iya kusona amaheema, imbombo ye uPaavhuli woope ahavhombaga. Pe ahanda kutendama navho nu kuvhomba imbombo iyo pooka. 4 Insiku zyonti izya Sabaato, uPaavhuli ahinjilaga mwi sinagoogi, ahayangaga na Vhayuuda na vhe te Vhayuuda, kuuti pamo vhoope vhiitishe.
5 Lwe avha Siila nu Tiimoti vhaafuma ku Makedooniya, ahavhaliilizyo haakwe honti uPaavhuli ahanda kulumbiilila nu kuvhasimishizya aVhayuuda kuuti uYeesu wu Chilisiti. 6 Ileelo aVhayuuda lwe vhanda kumudinda nu kusaamula, pe uPaavhuli ahakunyunta amenda gaakwe,b ahavhavhuuzya ahati, “Inga uMulungu avhasunda pa zyinyu mweneemwe! Kwi izwi ilyo, ine intali nu vhunanzi naavhumo. Kufuma ileelo ili nasogola ku vhantu vhe te Vhayuuda.”
7 Pe uPaavhuli aheepa pi sinagoogi, ahasogola kwa muntu wumo, we izina lyakwe vhahatinji uTiiti uYuusito. Uweene atáali te Muyuuda, ileelo áyinjiiye mu shipuuto isha Vhuyuuda. Inyumba yaakwe yáali mu nshinji iya isinagoogi. 8 Usongo uwa isinagoogi ilyo, we izina lyakwe vhahatinji uChiliisipo, pooka na vhantu vhonti avha mu nyumba yaakwe, vhahamwitiha uMwene uYeesu. AVhakolinto avhinji lwe vhiivwa amazwi aga Paavhuli, vhoope vhahamwitiha nu kwozelwa.
9 Isiku limo uvhusiku, uMwene ahamuvhuuzya uPaavhuli mu njozi iya pa minso amazelu ahati, “Utogopaje! Jendeleela kulumbiilila. 10 Ine indi pooka niiwe, naawumo we angakuvhuushila kuuti akuvwalazye, mwe pe inkaaya ino yili na vhantu avhinji vhe vhali uluvhazu lwane.” 11 Pe uPaavhuli ahatendama ku Kolinto umwaha wooka na meezi sita, ahasambilizyaga avhantu izwi ilya Mulungu.
12 Ileelo ahavhaliilizyo he uGaaliyo áamile mupiti uwa mukowa uno uwa Akaaya, aVhayuuda vhahamuvhuushila uPaavhuli ku mwoyo wooka nu kumutwala kwa Gaaliyo kwi lonjelwi. 13 Vhahati, “Tukumulonjeela umuntu uno, mwe pe akuvhahopenkanya avhantu kuuti vhamupuutaje uMulungu kwi dala lye likulegana ni ndajizyo.”
14 Lwe uPaavhuli akuti ayanje, uGaaliyo ahavhavhuuzya aVhayuuda ahati, “Mwe Vhayuuda, inga mwamulongaga umuntu uno ku nongwa iya vhunanzi, poosye kutala umulandu, nkandi navhatejeelezya. 15 Ileelo mwe pe mukudalinkana izya mazwi na mazina ni ndajizyo zyinyu, mwamule mweneemwe. Ine ntakwanza kuvha ne mulonzi uwa izyo.” 16 Pe uGaaliyo ahalajizya kuuti vhavhashimbizye vheepe pi lonjelwi. 17 Pe avhantu vhe vhávhungiine paala vhahamulema uSositeeni,c usongo uwa isinagoogi, vhahanda kumuhoma pe pilongolela ilya ilonjelwi. Ileelo zye zihavhombehaga izyo, uGaaliyo atásajiiye.
UPaavhuli akugaluha havhili ku Antiyookiya
18 UPaavhuli ahajendeelela kutendama mu Kolinto amanda aminji. Pisinda, ahavhalaga aVhachilisiti avhamwavho, ahasogola pooka nu Aakila nu Puliisila mu nkaaya iya Kenkileeya. Lwe vhaafiha ku Kenkileeya, uPaavhuli ahavhegula insisi zyakwe, mwe pe ávhiisile ulufingwi,d pe ahalimbila imeeli kusogola mu mukowa uwa Siiliya. 19 Lwe vhaafiha mu Hefeeso, uPaavhuli ahavhaleha avha Aakila nu Puliisila. Ahasogola mwi sinagoogi, ahanda kuyanga na Vhayuuda. 20 Vhahamulaavha uPaavhuli kuuti ayonjezye insiku izya kutendama kumwavho, ileelo atahiitiha. 21 Ahalagana navho, ahavhavhuuzya ahati, “Inga uMulungu asungwa, ndigaluha havhili kuli imwe.” Pe ahalimbila imeeli aheepa ku Hefeeso.
22 Lwe uPaavhuli aafiha ku Kayisaaliya, ahasogola kushilamuha ishivhanza isha ku Yelusaleemu, pe ahasogola ku Antiyookiya. 23 Ahatendama ukwo ahavhaliilizyo hamo, pe ahajendeelela nu vhulendo kutuushila mu nsi iya Galaatiya ni ya Fuligiya, uku akuvhagomwa avhalandati vhonti.
UApoolo akulumbiilila ku Hefeeso
24 Ahavhaliilizyo iho, uMuyuuda wumo, we izina lyakwe vhahatinji uApoolo ahafiha mu Hefeeso. Uyo ápafiilwe mu nkaaya iya ku Alekizandeliya, áamile mumanyi nkaani kuyanga, havhili ámanyile nkaani uVhusimbe uVhufinjile. 25 Umuntu uyo ásambiliiye idala ilya Mwene uYeesu. Ahataliha kuvhasambiilizya avhantu izya Yeesu mu vhwanalyoli, mwe pe umwoyo waakwe wuhaahaga nkaani. Ileelo ámanyile ulwozyo lwe lwa Yoohani. 26 Ahinjila mwi sinagoogi, ahanda kulumbiilila ku vhudandamazu. Lwe uAakila nu Puliisila vhiivwa insambiilizyo zyakwe, vhahamunyatula nu kusogola nawo ku kwavho, vhahamusambiilizya idala ilya Mulungu mu vhwanalyoli vhwonti.
27 UApoolo ahanzaga kusogola mu mukowa uwa Akaaya, aVhachilisiti avhamwavho vhahamugomwa umwoyo. Vhahavhasimbila ukalaata avhalandati avhamwavho avha mu Akaaya kuuti vhamuposheele. Lwe aafiha kuula, ahavhaavwa nkaani vhe vhámwitisile uYeesu ku vhwila uvhwa Mulungu. 28 Ahavhapootaga aVhayuuda pilongolela ilya vhantu, kwi dala ilya kusimishizya ku Vhusimbe uVhufinjile kuuti, uYeesu wu Chilisiti.