Ukalaata umutanzi uwa Paavhuli ku
Vhatesaloniiki
Uvhwandilo
Umusimvi uwa kalaata uno, wu Paavhuli umutumwa uwa Yeesu Chilisiti. Lwe ahasimbaga ukalaata uno, áali pooka nu Silwano nu Tiimoti. Ávhasimbiiye aVhachilisiti vhe vháali mu nkaaya iya ku Tesaloniiki. UPaavhuli ahalumbililaga Izwi iLyinza ilya Yeesu Chilisiti, ku Vhayuuda na vhe te Vhayuuda.
UPaavhuli na vhamwavho, lwe vhaafiha mu nsi iya Vhuyunaani, ahalumbiilila nu kushigomwa ishivhanza mu nkaaya impiti iya nsi iya Makedooniya. Inkaaya ino vhahatinji iTesaloniiki (vhaazya mwi kalaata ilya Mbombo izya Vhatumwa 17). Avhantu amavhiila mu mavhiila vhahiitiha amazwi gaakwe. UPaavhuli lwe akushigomwa ishivhanza isha ku Tesaloniiki, intamwo impiti zihataliha ku vhe vhámwitisile uChilisiti. Intamwo izyo zihavhombwaga na Vhayuuda. UPaavhuli ahaamula kwepa naluvhiilo. Lwe ayeepa ukwo, ahapootwa kugaluha havhili. Pe ahamusonteelezya uTiimoti, kuuti asogole avhagomwe umwoyo vhe vhámwitisile uChilisiti ivho. Uweene uPaavhuli atahasogola ukwo, ahajendeelela kulumbiilila intala izinji. Lwe hatuuha ahavhaliilizyo hansi, uTiimoti ahagaluha kwa Paavhuli, kumuvhuuzya izya lwitiho nu vhutendamo uvhwa vhe vhámwitisile uChilisiti ku Tesaloniiki. UPaavhuli lwe ayiivwa amazwi igo, ahaseshela nkaani, ahavhasimbila ukalaata uwa kuvhatiima, nu kuvhonjezya insambiilizyo izinji. Ahavhagomwa umwoyo, inga vhajendeelele nu vhutendamo uvhwa kumuhondezya uMulungu. Amazwi igo, gali mwa kalaata uno umutanzi uwa Paavhuli ku Vhatesaloniiki. Ásimvile kuzya kuvhagomwa mu mayimba na kuzya kuvha nu vhwanalyoli kuuti, uYeesu aligaluha, havhili vhe vhamwitisile uChilisiti vhalitendama pooka nawo.
Zye zili mwi kalaata ili
Indamunkano (1:1)
Insalifwo izya Paavhuli kuzya lwitiho ulwa Vhatesaloniiki (1:2-10)
Imbombo ye uPaavhuli na vhamwavho vhávhomvile nu kusamba kulolana na Vhatesaloniiki (2:1-3:13)
UPaavhuli akuvhasuvhaalizya kuuti vhajendeelele mu lwitiho (4:1-12)
Kugaluha ukwa Yeesu Chilisiti (4:13-5:11)
Ulujendo lwe lukwanzilwa ku vhe vhamwitisile uYeesu (5:12-24)
Amazwi aga kulagana (5:25-28)