Ukalaata uwa vhuvhili uwa Paavhuli ku
Vhatesaloniiki
Uvhwandilo
Umusimvi uwa kalaata uno, wu Paavhuli umutumwa uwa Yeesu Chilisiti. Lwe ahasimbaga ukalaata uno, áali pooka nu Silwano nu Tiimoti. Ávhasimbiiye vhe vhámwitisile uChilisiti vhe vháali mu nkaaya iya ku Tesaloniiki. UPaavhuli ahalumbililaga Izwi iLyinza ilya Yeesu Chilisiti, ku Vhayuuda na vhe te Vhayuuda.
Ahavhaliilizyo hansi vhweleele, kufuma pe átumile ukalaata waakwe umutanzi, uPaavhuli ahiivwa kuuti, vhe vhámwitisile uChilisiti ku Tesaloniiki, vhatámanyile ahinza insambiilizyo zyakwe izya kugaluha kwa Yeesu. Vhamo vhahatinji uYeesu agalusile. Havhili vhamo, vhálesile imbombo zyavho zyonti, mwe pe vhahasuvhilaga kuuti, uYeesu te ahaavhe kugaluha. Vhamo vhatahanzaga kuvhomba imbombo, mwe pe vháali vhahata. Kuli izyo, uPaavhuli ahasimba ukalaata uno uwa vhuvhili, inga agalulanye insiivho zyavho, zye zitáali nu vhwanalyoli. Mwa kalaata uwa vhuvhili ahahomeelezya kuuti, uYeesu atahagaluha, havhili ahavhahomeelezya kuuti, vhajendeele kuvhomba imbombo ku mute.
Zye zili mwi kalaata ili
Indamunkano (1:1-2)
UPaavhuli akumusalifwa uMulungu kuzya Vhatesaloniiki nu kuvhagomwa umwoyo (1:3-12)
Kugaluha ukwa Yeesu Chilisiti (2:1-12)
Kusimpa nu kuzilema insambiilizyo (2:13-17)
Insambiilizyo kuzya lujendo ulwa vhe vhamwitisile uChilisiti na mazwi aga kumpeleela (3:1-15)
Amazwi aga kulagana (3:16-18)