5
Kuyisengaanya kwi siku ilya kwinza uMwene uYeesu
1 Mwe vhamwitu, tukulola kuuti tutahavhasimbile kuzya manda na havhaliilizyo aha kwinza uMwene uYeesu. 2 Twavhomba vhwevhulo, mwe pe imwe mweneemwe mumanyile kuuti isiku ilya kwinza uMwene, liliivha lya kwitushizya inza umwivha vwe akwinza uvhusiku. 3 Avhantu lwe vhakuti, “Tuli nu vhutehamu, havhili tutehiime”, ipo pe uvhunanjisu vhulivhinzila. Uvhunanjisu uvhwo vhulivhitushizya, inza uvhuvhaavi uvhwa kupaapa vwe vhukumwinzila umwantanda we ali pa vhumwamu. Kuli izyo te vhahaapokwe inga hansi.
4 Nkandi imwe, vhamwitu, isiku ilyo te lihavhitushizye inza umwivha, mwe pe mutali mu hiisi inza vhantu vhe vhakumusuufwa uMulungu. 5 Imwe mwenti mwe vhaana avha vhuzelu, havhili mwe vha musanya. Iswe te twe vhaana avha vhusiku poosye avha ku hiisi. 6 Ishi, tuleshe kuvha inza avhanji vhe vhakukaata utulo, nkandi tuvhe minso havhili tutatepwaje. 7 Mwe pe vhe vhakukaata utulo, vhakukaata vhusiku. Havhili vhe vhakuholwa, vhakuholwa uvhusiku.
8 Ileelo iswe, mwe pe tuli mu vhuzelu uvhwa musanya, tutatepwaje. Tuvhanje nu lwitiho ni shikunzi, ivwo vikuvha ngati mpinjiho ku shifuvha. Havhili tumusuvhilaje uMulungu kutupoha, pe tukuvha ngati tuzwaye impinjiho kwi itwe. 9 Mwe pe uMulungu atátusavhuuye iswe inga atulovwe ku vhuhalazu vhwakwe. Nkandi átusavhuuye inga tuvhwaje uvhuposhi kwi dala ilya Mwene wiitu uYeesu Chilisiti. 10 Uyo we ahafwa ku zyitu, inga tuvhanje pooka nawo, lwe twe vhapuuma poosye lwe tufuuye. 11 Ishi, suvhalizanyaaji nu kugomwanya amooyo inza vwe mukuvhomba.
Ulujendo lwe lukwanzilwa ku vhe vhamwitisile uChilisiti
12 Ishi vhamwitu, tukuvhalaavha muvhashindihaje vhe vhakuvhaavwa imwe, nu kuvhalongozya ku maha aga Mwene uYeesu nu kuvhasambiilizya ulujendo ulwa Shichilisiti. 13 Muvhashindihaje nkaani nu kuvhasungwa kulandatana ni mbombo yaavho. Havhili mutendamaje ku vhutehamu.
14 Vhamwitu, tukuvhalambiilizya, muvhasohaje avhahata nu kuvhagomwa vhe vhavunzisile amooyo. Havhili muvhagomwaje vhe vhatali na maha nu kuvhajimbiilila avhantu vhonti. 15 Yeenyi, umuntu wonti atamulanduzyaje uwamwavho ku mbiivhi. Nkandi amanda gonti muvhombelanaje inyinza mweneemwe nu kuvhavhombela avhantu vhonti. 16 Muvhanje nu luseshelo amanda gonti, 17 havhili mulaavhaje amanda gonti. 18 Mumusalifwaje uMulungu mu zyonti, mwe pe izyo zye uweene akwanza muzivhombaje inza vwe uYeesu Chilisiti atulolesiizye.
19 Mutamudindaje uMupepo uMufinjile. 20 Havhili mutavhusufwaje uvhukuvhwi, 21 nkandi muvhulingaje vhwonti nu kuvhulandata vhwe vhwinza. 22 Muyefwaje mu mbiivhi zyonti. 23 UMulungu wuuyo we akuutupa uvhutehamu, avhazelufwe imwe ku zyonti. Kwe kuuti ayenyelezyaje amooyo giinyu nu vhupuuma vhwinyu na mavhili giinyu, inga muvhe ishisita kukwinkwinwa kufishila lwe akwinza uMwene wiitu uYeesu Chilisiti. 24 UMulungu uweene we akuvhiita, alivhavhombela ziniizyo, mwe pe wa nalyoli.
Amazwi aga kulagana
25 Vhamwitu, niiswe mutulavhilaje kwa Mulungu. 26 Muvhalamushe avhamwitu vhonti ku lwofwanyo ulufinjile. 27 Nkuvhalajizya ku maha aga Mwene uYeesu kuuti, ukalaata uno muvhavhaziizye avhamwitu vhonti.
28 Uvhwila uvhwa Mwene wiitu uYeesu Chilisiti, vhuvhe pooka niimwe mwenti.