4
Ulujendo lwe uMulungu akulusungwa
1 Ishi vhamwitu, musambiliiye kufuma kuli iswe vwe yikwanzilwa kutendama, inga kumuhondezya uMulungu. Mwe muumwo vwe mukuhonzya vhwevhulo. Ishi, tukuvhalambiilizya ku maha aga Mwene uYeesu kuuti, muvhombaje vhwevhulo nu kuluusya. 2 Mwe pe mumanyile hinza indajizyo zye twávhalajiziizye ku maha aga izina ilya Mwene uYeesu.
3 UMulungu akwanza muvhe mwe vhafinjile, kwe kuuti mutavhombaje uvhumalaaya. 4 Imwe mwenti mugakonzyaje amavhilia giinyu, mu vhufinjile nu kuyishindiha. 5 Mutahiime ni mpapilo imbiivhi inza avhantu avha kunzi vhe vhatamumanyile uMulungu. 6 Muli izyo, umuntu wonti atahamunanjile uwamwavho, poosye kumuhopenkanya. Inza vwe twávhavhuziizye nu kuvhasoha kuuti, vhonti vhe vhakuvhomba izyo, uMwene uYeesu aliivhapa isunde. 7 UMulungu atahatwita kuvhomba uvhumalaaya, nkandi ahatwita kuuti tutendamaje mu vhufinjile. 8 Pe umuntu wonti we akuhaana insambiilizyo izi, atakumuhaana muntu, nkandi akumuhaana wu Mulungu, we akuuvhapa imwe uMupepo waakwe uMufinjile.
9 Ishi, yitakwanzilwa kuuti tuvhasiimbile imwe inongwa izya kukundana, mwe pe uMulungu wuuyo avhasambiliziizye vwe yikwanzilwa kukundana. 10 Nalyoli vwe mukuvhavhombela vhwevhulo avhamwinyu vhonti vhe vhamwitisile uChilisiti avha mu shigavho isha nsi isha Makedooniya. Ishi tukuvhalaavha mukundanaje vhwevhulo nu kuluusya. 11 Muvhanje nu mwoyo uwa vhutehamu. Umuntu wonti atayisanganyaaje muzya vhanji, nkandi avhombaje imbombo zyakwe wuuyo, inza vwe twávhalajiziizye. 12 Ipo mukuvha mwalolesya ulujendo ulwinza pa minso aga vhe vhatamwitisile uMulungu, havhili mutakuvha mwe vha kusuuvhila ivwa vhanji.
Kwinza kwa Mwene uYeesu
13 Mwe vhamwitu, tukwanza mumanye zye zilifumila ku vhe vhámwitisile uMulungu vhe vhafuuye, inga muleshe kuvha nu vhuswimiilizu inza avhantu avhanji vhe vhatali nu lusuuvhilo. 14 Iswe, tumanyile kuuti uYeesu áfuuye, havhili ahazyuha. Kuli izyo tukusuuvhila kuuti uMulungu alivhavhiiha pooka nu Yeesu avhantu vhonti vhe vháfuuye mu lwitiho.b
15 Izi zye tukuvhavhuuzya nsambiilizyo izya Mwene uYeesu, kuuti iswe twe tuliivha twe vhapuuma lwe uweene akugaluha, te tuhavhalesheelele vhe vhafuuye. 16 Mwe pe uMwene wuuyo aliyiiha kufuma ku mwanya. Aliyanga kwi izwi ilya maha, pooka ni izwi ilya havhizya umupiti ni izwi ilya isaji ilya Mulungu. Pe vhaala vhe vháfuuye she vhamwitisile uChilisiti, vhalizyuha isuuti. 17 Pe iswe swe vhapuuma, twe tusyaye, tulisompolwa pooka navho mu mavhingo, inga tumuposheele uMwene uYeesu kumwanya. Pe tulitendama pooka nawo shiima shiima. 18 Ishi suvhalizanyaaji ku mazwi ganaago.