3
UPaavhuli akumusonteelezya uTiimoti ku Tesaloniiki
1 Pisinda tuhapootwa kujimbiilila, mwe pe tutámanyile zye zikuvhombeha ukwo. Pe tuhalola kuuti, tusyale tweka vhweleele mu nkaaya iya Aseene. 2 Tuhamusonteelezya uTiimoti umujenzi wiitu, havhili umuvhomvi uwamwitu uwa Mulungu kuzya kulumbiilila Izwi iLyinza ilya Chilisiti. Tuhamusonteelezya kuuti ayinze inga avhagomwe amooyo nu kuvhasuvhaalizya mu lwitiho lwinyu. 3 Twávhomvile vhwevhulo inga umuntu wonti atahavunzishe umwoyo kuzya mayimba iga. Imwe mumanyile kuuti, iswe tukwanzilwa kutuushila amayimba. 4 Mumanyile isho, mwe pe lwe twáli niimwe, tuhavhavhuzyaga kuuti tuliyimvilwa. Ishi vwe zili.
5 Pe lwe napootwa kujimbiilila, nkamusonteelezya uTiimoti kuli imwe, inga imanye inongwa izya lwitiho lwinyu. Nkavhomba vhwevhulo, mwe pe nkasiivha kuuti lumo We Akulingaa avhalinzile nu kuvhateezya. Pe imbombo yonti ye tuhayivhomba kuli imwe, yihaavhe ya vhweleele.
Intumi inyinza kufuma ku Vhatesaloniiki
6 Ishi uTiimoti ayinzile kufuma kuli imwe, atuvhuziizye inongwa inyinza izya lwitiho ni shikunzi shiinyu. Atuvhuziizye kuuti mukutusamba shiima ku luseshelo, havhili musamvile kulolana niiswe, inza vwe niiswe tusamvile kulolana niimwe.
7 Vhamwitu, inongwa izya lwitiho lwinyu, zyatugomwa amooyo mu malavha na mu mayimba giitu gonti. 8 Ishi tukulandila, mwe pe imwe musimfile mwa Mwene uYeesu. 9 Ishi tungamulipa uMulungu shintu vhuli inga tumusalifwe kuzya lwitiho lwinyu? Poosye kuzya luseshelo ulupiti lwe tuli nalwo ku nongwa zyinyu? 10 Uvhusiku nu musanya tukumulaavha uMulungu ku mute, kuuti atwavwe twinze havhili kuli imwe, inga tuvhaavwe she musovheliilwe mu lwitiho lwinyu.
11 Tukumulaavha uMulungu, uTaata wiitu wuuyo, nu Yeesu uMwene wiitu, atusenganizanye idala ilya kwinza kuli imwe. 12 UMwene avhape ishikunzi isha kukundana mweka nu kuvhakunda avhanji vhonti, inza iswe vwe tuvhakunzite imwe. 13 Havhili avhagomwe amooyo giinyu, inga muvhanje mwe vhafinjile. Muvhanje ishisita uvhunanzi ku minso aga Taata wiitu uMulungu, lwe akwinza uMwene wiitu uYeesu pooka na vhafinjileb vhaakwe vhonti.