Ukalaata umutanzi uwa Paavhuli kwa
Tiimoti
Uvhwandilo
Ukalaata uno ásimviilwe nu Paavhuli umutumwa wa Yeesu Chilisiti (07-1TI-001.html#v1">1:1) kwa muntu we vhahatinji uTiimoti, umuhaaya uwa mu nkaaya iya Lisitila. UTiimoti áamile mwana wa mwantanda uMuyuuda, uyise waakwe áamile Muyunaani (iMbombo izya Vhatumwa 16:1). UTiimoti ápindusile lwe alumbiililwa nu Paavhuli, ge mazwi iga uPaavhuli akumutaha uTiimoti kuuti mwana waakwe mu lwitiho (1:2). UTiimoti ájenzite nu Paavhuli mu mbombo inyinji izya kulumbiilila Izwi iLyinza ilya Yeesu Chilisiti (yeenya iMbombo izya Vhatumwa 17:14-15; 18:5). Yikulolesya kuuti uPaavhuli ásimvile ukalaata uno, mu mwaha uwa 65 kufuma pe ápafiilwe uChilisiti. UPaavhuli lwe áshiili kusimba ukalaata uno, ámupiiye uTiimoti imbombo iya kwenyeelezya ivivhanza ivwa Vhachilisiti mu nkaaya iya Hefeeso (yeenya 1:3).
Insiivho zya Paavhuli kusimba ukalaata uno, zyámile kumuvhuuzya uTiimoti vwe zikwanzilwa kusevha nu kusambiilizya avhalongozi, na vhatuuli avha vivhanza vwa Vhachilisiti mu nkaaya ya mu Hefeeso. UPaavhuli ahanzaga kuuti uTiimoti na vhatuuli vhaakwe vhavhe vhagolosu, vhamanyizyaje uvhwanalyoli nu lujendo ulwa shifinjile ku Vhachilisiti. Havhili, ásivhiliiye kumuvhuuzya uTiimoti kuuti avhe shiholanyo ishinza ku vhantu vhonti (4:12). Insiivho zyakwe izyamwavho, zyámile zya kumulanganizya uTiimoti kuvhaavwa aVhachilisiti mu ntazyo zye zyáliipo mu vivhanza. UTiimoti avhe na maha kuhaana insambiilizyo zyonti izya malenga (1:3-7; 4:1-5; 6:3-5).