4
Insambiilizyo izyi lenga mu manda aga
1 UMupepo uMufinjile akutuvhuuzya shisita kuzyiha kuuti mu manda aga ku mpeleela, avhantu vhamo vhaligaleha amazwi aga lwitiho. Vhalitejelezyaga impepo imbiivhi zye zikuhopela, nu kuzilandata insambiilizyo zyavho. 2 Insambiilizyo ziniizyo zikwinza na vhe vhakuyanga izya malenga ku vhulumaluma. Amooyo gaavho amavhiivhi gatangalonga imbiivhi zyavho. 3 Vhakuvhahaana avhanaavuli kuuti vhatasendaje, na vhantanda vhatasendwaje. Vhakuvhalajizya avhantu kuuti vhatalyanje ivwakulya vimo. Ileelo uMulungu we ávipezile, kuuti avhantu vhe vhakumwitiha vhaviposheelaje nu kusalifwa, she avheene vhavhumanyile uvhwanalyoli. 4 Vwonti vwe uMulungu ávipezile vwinza, vitaliipo ivwa kuvihaana inga vwaposheelwa ku mpuuto izya kusalifwa. 5 Mwe pe uMulungu avwitisile kwi izwi lyakwe na ku mpuuto zyitu.
Umuvhomvi umwinza uwa Yeesu Chilisiti
6 Uvhavhuzyaje avhamwitu ganaago, pe kwe uvhe we muvhomvi umwinza uwa Yeesu Chilisiti. Havhili, we usunjiliilwe ahinza mu vhwanalyoli uvhwa lwitiho ni nsambiilizyo inyinza izyo zye ukuzilandata. 7 Ileelo uvihaanaje ivwili vwe vikupuvwa ni vwi lenga. Uyiluvhizyaje weneewe kumulandata uMulungu. 8 “Inga umuntu akuyiluvhizya umuvhili waakwe nkaani kuuti wuvhe na maha, akuvha ni lonka linsi vhweleele. Ileelo inga akumulandata uMulungu, pe akulyaga ilonka muli zyonti, ku vhulanzi uvhwa pansi ipa nu vhwa havhaliilizyo he hakwinza.”
9 Ili lizwi lya nalyoli, lye tuhondeeye tulyitihaje ku mwoyo wonti. 10 Inongwa ziniizyo zye zikutuvhiiha kuuti tuyifumwaje kuvhomba, she iswe tuvhiisile ulusuuvhilo lwitu kwa Mulungu we mulanzi, havhili we Muposhi wa vhantu vhonti vhe vhamwitisile.
11 Ziniizyo zye nakuvhuuzya, uvhalajizye avhantu nu kuvhasambiilizya, kuuti vhazilandataje. 12 Naawumo umuntu atahakusuufwe mwe pe we mulumendo. Nkandi, uvhe we shiholanyo ishinza ku Vhachilisiti ku njango yaaho, ku lujendo lwaho, ku shikunzi shaaho, ku lwitiho lwaho, na ku vhufinjile vhwaho. 13 Uvhe nu mute kuvhavhaazizya avhantu aMazwi aMafinjile, havhili uvhagomwaje amooyo nu kuvhasambiilizya. Shiima uzivhombaje ziniizyo, kufishila mu havhaliilizyo he ndiyinza. 14 Utahaleshe kushivhombela ishikunjilwa she uMulungu akupiiye, ku mazwi aga vhakuvhwi mu havhaliilizyo he avhasongo vhákuvhishiiye inyoovhe zyavho.